Mark 4

Kalenjin Bible Revised (BUKUIT NE TILIIL Sireet ne Dutero Kanon)

← Chapter 3 Jump to: Chapter 5 →

1Ki toi kogeny koneetis eng' tabandap araraita. Ki iyumjigei ineendet tuiyet ne oo miising' kot kolaany moingetap peek kotebee araraita, ak kotebee tuiyet tugul ngeguutap araraita.

2Ki ineet icheek tuguuk che chaang' eng' kalewenaik, ak eng' kaneetisyennyi kogileenji icheek:

3“Oep iit! Ki wo leetaindet koleetais.

4Ak ye kileetaisye, kobutyi kesweek alak ooreet taban, ak ki pwa toriitik ak koam.

5Ki ibutyi alage ole mi koik, ole ki ma kotya ng'ung'unyek, ak ki piityo anyun kochook, amu ng'ering' ng'ung'unyek.

6Ak kingo chor asiista, komel; ak ki yaamyo, amu ki ma kotinyei tigitik.

7Ki ibutyi alage ole mi katook, ak ki piityo katook ak kogiich, si ma iiyo logoek.

8Kobutyi alage ng'ung'unyek che myach ak koiiyo logoek, kieegitu ak kotesak ak ki iyo sosom ak tamanwogik lo ak pogol.”

9Ak ki mwa kole, “Ne tinyei iitiik che kastoe, kogas!”

10Ye ki mi ineegei, kobwanji inee `kasubikyik tamanu ak aeng' kobooto chooto ki mi tugul ak koteebe ineendet agobo kalewenaichooto.

11Ki leenji `ineendet icheek, “Kagegoonok okweek onai ung'ootyet ne po laitornatetap Kamuktaindet, ago icheek che miitei saang', kobwanjin tuguuk tugul eng' kalewenaik;

12si eng' ‘keeret kogeerei ama ibestos, ak eng' kaseet kogasei ama iguitos; si ma week ak kenyochi kaat.’ ”

13Ki leenji icheek, “Ngot ko moguitosi okweek kalewenoni, ko tos onaite ano kalewenaik tugul?

14Ineendet ne leetoi ng'olyoot ko koolsei.

15Chu che mi tabandap ooreet ole kagilechi ng'olyoot, ak ye kagogas, konyo Setani ak konem nooto kagigoolji icheeget.

16Ak chu ak icheek ko chooto che kagilechi ole mi koik, ak ye kagogas ng'olyoot, kotaach eng' poiboiyet.

17Ago ma tinyei tigitik, ak tebyei peetuusyek che matya, ak ye it nyalilda anan ko usiisyet agobo ng'olyoot, kobutos ne matiny.

18Ak alak, ko che kagilechi ole mi katook; chooto ko icheeget che kagogas ng'olyoot,

19ak ye kait kaimutigap ng'wony, ak kaberberisyetap mogornateet, ak magutigap tuguuk alak, kogiich ng'olyoot si ma sich logoek.

20Ak chooto che kagilechi ng'ung'unyek che myach, ko icheeget che kasei ng'olyoot ak kotaach, ak koiiyo logoek sosom, ak tamanwogik lo, ak pogol.”

21Ki leenji icheek, “Ma ki ibu tait ak kinde kitonget oriit anan kurereetap itoogut, ago kindoi ole tonone.

22Ma miitei kiy ne ung'aat ne ma tuun king'aanyei, anan ng'olyoo ne po ung'oot ne ma tuun taagu.

23Ngo tinyei chii iitiik che kastoe, kogas.”

24Ak ki mwachi icheek koleenji, “Oriibegei tuguuk che ogase; kerutyet ne ogere ko tuun kegerunenok nooto, ak keteswook.

25Amu ineendet ne tinyei, ko tuun kigoochin; ak ineendet ne ma tinyei, ko tuun keibe agot che tinyei.”

26Ak ki mwa kole, “Uu laitornatetap Kamuktaindet chii ne leechin kesweek ng'wony,

27ak koru ak kong'eet, kemoi ak peet, ak kobiityo kesweek ak koeegitu, amaingen ole pititoi.

28Yiei ng'wony ineegei; rutu, yeityo konyo metit, yeityo koiywa peek.

29Ago ye kagoruryo peek, eng' yooto koip ineendet chepkeswet amu kait kesisyet.”

30Ki le, “Kiyanie nee laitornatetap Kamuktaindet anan nee kalewenet ne kimuuchi kemwaitae?

31Kergei ak keswootap karadali, ne ye kageminji ng'wony, nganda ming'in eng' kesweek tugul che mi ng'wony,

32ko ye kagemin, ko piitei koeetu kosiir minutik tugul che po mbar, ak kosich mooriik che eecheen kot komuuch koteekyi kesonok oriit `toriitigap parak.”

33Ak eng' kalewenaik alak che chaang' che uu chooto, ko ki ng'alaaljin icheek ng'olyoot ko uu ye ki imuuchi kogas.

34Ak ki ma ng'alaalji icheek ama eng' kalewenet, ago ki ineet tuguuk tugul kasubikyik komi taban icheegei.

35Ak kingo kagoek koskoleny eng' peetuunooto, koleenji icheek, “Ongelande pitoniin.”

36Ak kingo pagaakta tuiyet, komut ineendet amu ki miitei moingetap peek. Ak ki mi moingonik alak kobooto ineendet.

37Ki ng'eet anyun usoonet ne koroom, ak kiryebei `peek che mildogei moinget kot kogineegit konyi peek moinget.

38Ki mi ineendet moinget let, korue kiit ne kitiie metit; ak ki ing'eet ineendet ak koleenji, “Kaneetindoni, mema kenech kiy ago kagibegu?”

39Kingo kaging'eet, koger kong' usoonet, ak kong'alaalji araraita kole, “Tonon! Siis!” Ki tonon anyun usoonet, ak kosiis araraita.

40Ki leenji icheek, “Kalya si oiyweisye? Agoi nguno ko motinye kayaneet?”

41Ki iyweis miising' ak komwachingei koleen, “Ng'oo niito, ne kase iit agot usoonet ak araraita?”

← Chapter 3 Jump to: Chapter 5 →