Romans 11

Kalenjin Bible Revised (BUKUIT NE TILIIL Sireet ne Dutero Kanon)

← Chapter 10 Jump to: Chapter 12 →

1Amwae anyun ale, Tos ki toorta `Kamuktaindet piikyik? Achicha, ma uu nooto. Amu aa Yahudyot agane, ne po kesweegap Abraham, ne po ooreetap Benjamin.

2Ki ma toorta `Kamuktaindet piikyik che kisip konai. Anan ma onai ne mwaei sireet agobo Elijah? Ko uu ye king'andoi `ineendet Yahudik eng' taitap Kamuktaindet kole,

3“Kiptaiyat, ki kobar maotiguk, ak ki koluul ole ki tisiisye; ak kaang'etu aneege, ak cheeng'ei icheek saboondanyu.”

4Ago leenjin nee waluunetap Kamuktaindet? Kaatukyigei murenik eliphuusyek tisap, che ma kutung'ji Baal.

5Agot ko uu nooto anyun agine eng' peetuusyechu, miitei che ng'etunotiin ko uu lewenet ne po myeeindo.

6Ago ngot ko po myeeindo, koma ko po poisyonik: ngo ma uu nooto, ko mata koek `myeeindo myeeindo.

7Nee anyun? Ki ma nyoor Israel nooto ki cheeng'ei; ago kinyoor lewenik, ak ki kiuuiit chuun alak:

8ko uu ye siraat kole, “Ki kogoochi `Kamuktaindet ne Toroor icheek rwondo ne nyigiis, ak koonyek che ma keerei kiy, ak iitiik che ma kasei kiy, agoi peetuuniito.”

9Mwaei Daudi kole, Ingoek meesennywa meset ak rigeito, Ak kanagutyet, ak yaaktaet eng' icheek:

10Ingoimenitu konyekwak, si ma keer kiy, Ak iyai patoikwak kogumbu kotugul.

11Amwae anyun ale, Tos, kiterteryot kot kobutyo? Achicha, ma uu nooto: ago ki nyoonji yetunet Pororyosy ek eng' kabutennywa, si kobiit kogoochi icheek ng'etkonda.

12Ngot koegu kabutennywa mogornatosyegap ng'wony, ak koek luseennywa mogornatosyegap Pororyosyek; kosiirei ne tya anyun nyiennywa?

13Ago ang'alaalwok okweek che oo po Pororyosyek. Ko uu ye aa kayooktoindet ne po Pororyosyek, atoroori poisyennyu:

14si agoochi ng'etkonda eng' oor age tugul icheeget che kiborto agenge, ak asaru alak eng' icheek.

15Amu ngo toortaennywa ko katuiyetap, ko tos nee anyun taagetap icheek, kobatee saboondo ne mang'une che ki pek?

16Ak ngo tiliil tongoaniat, ko tiliil kiit komugul agine: ak ngo tiliil tigityot, ko tiliileen ak icheek mooriik.

17Ago ngot ko ki kiiri mooriik alak, ak inyee ne ii mseitunitap timiin, ko ki kinamnyenen icheek eng' kwenunnywa, ak ki oyamde kobooto icheeget ne po tigityot ak akwaiyetap mseituni;

18mechauge ile isiire mooriik: ago, ngot ichauge, koma inyee ne igeseni tigityot, ago tigityot ne kesenin.

19Imwae anyun ile, Ki kiiri mooriik, si kinamnyena.

20Myee; ki kiiri icheek amu pistoennywa, ak itononi eng' kayaneng'ung'. Amelaske, ago iyweisye:

21amu ngo ki ma riiree Kamuktaindet mooriik che ki po keetoto ye kinye, koma rireenen ak inyee.

22Keer anyuno myeeindo ak koroomnatetap Kamuktaindet: eng' icheek che kibutyo, ko koroomnateet; ago eng' inyee, ko myeeindap Kamuktaindet, ngitebi eng' myeeindonyi: ngo ma uu nooto ketilin aginye.

23Ak ngo ma tebi icheek eng' pistoennywa, kinamdos: amu imuuchi Kamuktaindet konamnyo icheek kogeny.

24Amu ngo kigetilin eng' mseituni ne po timiin eng' piteennyi, ak ki kinamnyenen mseituni ne myee ne ki ma ko po timiin eng' piteennyi: ko siirei anyun ne tya kinamnye mooriik che ki po ye kinye emdinnywa!

25Amu ma mache oegu che mongen ung'ootyoni, che kitupche, si moiityige ole oo ng'oomen eng' loseng'wong' pogei, ale kanyonji Israel uuindo eng' kebeber, agoi konyo nyiyet ne po Pororyosyek;

26ak uu nooto tuun kisaru Israel tugul: ko uu ye siraat kole, Tuun mang'une Zion Katyagindet; Ak koistoe Jakobo pistoet:

27Ak ni arorutyennyu eng' icheek, Ye tuun aiste tengekwogikwak.

28Ago puunik icheek eng' okweek, amu logoiywek che myach: ago eng' ng'olyootap lewenet, ko chamanik icheek amu kwanisyek.

29Amu ma tinyei ndara konunoigap Kamuktaindet ak kuursennyi.

30Amu ko uu ye ki ongelelji Kamuktaindet eng' peetuusyek che ki kosiirto, ago nguno ko kaonyooru rireenetapkei eng' pistoennywa,

31ko uu nooto ak icheek chu, ki kobistoe, si konyoor ak icheek rireenetapkei eng' rireenetapkei ne ki kiboorwok.

32Amu ki koratyi Kamuktaindet tugul eng' pistoet, si kobiit koriiree tugul.

33Ee tyanitu anyun ooindo ne po mogornatosyegap utaatyet ak naetap Kamuktaindet! Ak kirwoogutikyik che ma isiagaksei, ak ortinwekyik che ma cheeng'oksei!

34“Amu ng'oo ne ki konai kabwaatutigap Kiptaiyat? Anan ng'oo ne ki koek kaneetindennyi?

35Anan ng'oo ne kisip kogoochi kiy, si kobiit koyaakyi ineendet kogeny?”

36Amu pou ineendet, ak kobunu ineendet ak koweekyingei ineendet, tuguuk tugul. Punjin ineendet toroornatet koigeny. Amen.

← Chapter 10 Jump to: Chapter 12 →