Romans 8

Kalenjin Bible Revised (BUKUIT NE TILIIL Sireet ne Dutero Kanon)

← Chapter 7 Jump to: Chapter 9 →

1Nooto anyun ma komi kirwooget eng' icheek che miitei eng' Kristo Jeso.

2Amu kagotyacha ng'atuutyetap Kabuusetap saboon eng' Kristo Jeso amang'une ng'atuutyetap tengek ak meet.

3Amu kiit ne ki ma imuuch Ng'atuutyet koyai, amu nyaluletap poorto, koyook Kamuktaindet Weeriinnyi eng' kergeindap poortap tengek si koek kagoochinet ne po tengekto, kogikyi tengekto eng' poorto:

4si kobiit kosulda kayomisetap Ng'atuutyet eng' acheek, che ma kisubi poorto, ago Kabuuset ne Tiliil.

5Amu icheek che isubi poorto kogereeri met agobo tuguugap poorto; ago icheek che isubi Kabuuset ne Tiliil kogereeri met agobo tuguugap Kabuuset ne Tiliil.

6Amu kererwegap met che po poorto ko meet; ago kererwegap met che po Kabuuset ne Tiliil ko saboondo ak kaalyeet:

7amu kererwegap met che po poorto ko puunyoondit eng' Kamuktaindet; amu ma kase iit Ng'atuutyetap Kamuktaindet, amaimuuchi:

8ak icheeget che mi poorto kotemenee kobaibai Kamuktaindet.

9Ago ma omi eng' poorto ago eng' Kabuuset ne Tiliil, ngo menyok Kabuusetap Kamuktaindet. Ago ngo ma tinyei chii Kabuusetap Kristo koma nenyi.

10Ak ko ngo mi Kristo eng' okweek, ko nga ki kome poorto amu tengekto; ko sabei saboondo amu imanda.

11Ago ngo menyok Kabuusetap ineendet ne ki ing'eet Jeso komang'une che ki pek, kosoobi poorwekwok che pegu ineendet ne ki ing'eet Kristo Jeso komang'une che ki pek, eng' Kabuusennyi ne menyei eng' okweek.

12Nooto anyun, che kitupche, ki che kiyaachei, ma eng' poorto, si kisubi poorto:

13amu ngo subi poorto, obegu matiny; ago ngo par eng' Kabuuset ne Tiliil poisyonigap poorto, osaptosi.

14Amu tugul che indochin Kabuusetap Kamuktaindet, ko weeriigap Kamuktaindet chooto.

15Amu ki ma otaach kogeny muguleldap otwoknot ne koonok oiyweisye; ago ki otaach Kabuuset ne Tiliil ne ki kiyaenak oegu lagogap Kamuktaindet. Eng' nooto anyun ye kiriire keele, Abba, Kwanda

16ko paoryani Kabuuset ne Tiliil ineendet ak mugulelwekyok kole ki lagogap Kamuktaindet;

17ak ngo ki lagok, ko ki che punjinech tuguuk; che punjinech tuguugap Kamuktaindet, ak che punjinech tuguuk kobooto Kristo; ngot kenyalildosi kobooto ineendet, si kitoroorech kobooto ineendet.

18Amu aiiti ale nyalilwogik che po peetuusyechu koma nyolu kiroge toroornatet ne tuun king'ang'wech.

19Amu igeni miising' ak koganyei yaeet komugul ng'ang'et ne po weeriigap Kamuktaindet.

20Amu ki kigoochi yaeet tugul kogas iit kiit ne ma tilei kiy, ma ko uu ye machei, ago amu ineendet ne ki igoochi kogas iit ko uu nooto eng' kamang'unet,

21si kobiit kityaach yaeet komugul agine eng' otwoknateetap ng'emisyet agoi katyaget ne po toroornatetap lagogap Kamuktaindet.

22Amu kingen keele tigeni ak kogasei ng'wanindo yaeet komugul kobootech agoi nguno.

23Ak ma uu nooto kityo, ago agot acheek, che ki tinyei tongoanigap Kabuuset ne Tiliil, ketigendosi agacheek eng' oriit, kigeni keyaech keegu lagok, nooto ko katyagetap poorwekyok.

24Amu kigesarwech eng' kamang'unet: ago kamang'unet ne kigeerei koma kamang'unet; amu ng'oo ne imang'u nooto keerei?

25Ago ngimang'u nooto ma kigeere, kigeni nooto anyun eng' muitaet.

26Ak toreti ko uu nooto agine Kabuuset ne Tiliil nyalulennyo: amu ma kingen kesaa ko ye nyolu; ago saiywech Kabuuset ne Tiliil ineendet eng' tigenoik che ma kimuuchi kemwa;

27ak ineendet ne isyachi mugulelwek kongen kiit ne ibwaati Kabuuset ne Tiliil, amu saaei agobo piik che tiliileen ko uu mageetap Kamuktaindet.

28Ak kingen keele, eng' icheek che chamei Kamuktaindet, kotuitos tuguuk tugul si kobois koreu che myach eng' icheek che kigeguur ko uu magennyi.

29Amu Kamuktaindet ne kisip konai icheek, ko ineendet ne kisip kolewen icheek si kogergeit ak itoondap Weeriinnyi, si koek ne po tai eng' che tupcho che chaang':

30ak icheeget che kisip kolewen, koguur chooto; ak chooto che kiguur, ko ki ityi imanda: ak chooto che kiityi imanda, ko ki itoroor.

31Kimwae nee anyun eng' tuguuchuuto? Ngo mi Kamuktaindet komostanyo, ko ng'oo ne kirindaech?

32Ineendet ne ki ma riiree Weeriinnyi, ago kigon ineendet agobo acheek tugul, tos ma koonech tuguuk tugul eng' aiyebindo kobooto ineendet?

33Ng'oo ne itaami che ki lewen Kamuktaindet? Kamuktaindet ne iityin imanda;

34ng'oo ineendet ne igikyin? Kristo Jeso ne kime, ee, ineendet ne ki king'eet komang'une che ki pek, ne mi eutap tai ne po Kamuktaindet, ne saiywech agine.

35Ibestoseech ng'oo eng' chamyetap Kristo? Nyalilda, anan pichiindo, anan usiisyet anan rubeet anan aach ngor, anan ng'oiyondit, anan rotwetap chok?

36Ko uu ye ki kisir, keele, “Kibarech peetuut komugul agobo inyee; ki kiitech ko uu keechiirek che po eng'seet.”

37Ago, ki katerterik kot kosiir eng' tuguuchu tugul eng' ineendet ne ki chamech.

38Amu angen komyee ale ma imuuchi kobesyech meet, anan saboondo, anan malaikaisyek, anan pounatosyek, anan tuguuk che miitei, anan tuguuk che pwoonei, anan kimnatosyek,

39anan toroorindo, anan asurto, anan kiy age tugul ne ki kiyai, eng' chamyetap Kamuktaindet, ne mi eng' Kristo Jeso Kiptaiyandennyo.

← Chapter 7 Jump to: Chapter 9 →