Song of Solomon 1

Kalenjin Bible Revised (BUKUIT NE TILIIL Sireet ne Dutero Kanon)

Jump to: Chapter 2 →

1Tyendo ne siirei tugul, ne po Solomon.

2Ingong'ututena `ineendet kutinnyi, amu siirei chamyeng'ung' divaik.

3Tinyei nyamdutyet ne myee mwaniguk, uu kaineng'ung' mwaita ne kirong'u, chamin anyun pergeinik amu nooto.

4Imuta, ngechakte keebe tuwai. Kagomutwaa laitoryat anyo kooriikyik che po oriit. Kigasigei ak keboiboitu eng' inyee, kimwaitoi acheek chamyeng'ung' kosiir divaik. Chamin icheek eng' iman.

5Ee, tiibiigap Jerusalem, aa tuui ak ko atinye itoon, ko uu emaisyegap Kedar, ko uu angoogap emaisyegap Solomon.

6Ametang'ang'ja amu atuui, amu ki peela asiista. Ki nereekyo weeriigap kamennyu, ki indea aek riibindetap mbareenigap sabibuk. Ago ma ariip mbareennyu ne po sabibuk.

7Ee chamanennyu, mwaiwo anyun ole iyage akweetap keechiireguk, ole igoochine komuung'e ko katelel asiis? Amu nee si aigei chii ne tugoot met eng' ole neegitee akwotisyegap choronoguk?

8Ngo mengen, ee inyee ne ii karaaran isiir tiibiik tugul, ui isup ole kabun akweetap keechiirek, ak iyage aareguk che po ng'oroor eng' ole neegitee emaisyegap mestoweek.

9Ee chamanennyu, kaaragenden paraisiit ne kirgit ne po kariisyegap Pharaoh.

10Korooron matong'oik kobooto lelestang'ung', ak kaating'ung' kobooto sonoek che korooron.

11Kiyaun acheek tuguugap lele che po thahabu, kobooto tuguugap lelesta che po fedha.

12Ye ki tebyei laitoryat eng' itogunnyi, ko kas anyinyindap nyamdutik.

13Uu chamanennyu loletap tuguuk che uu igomoik, ne ruee kwenutap kinaikyuk.

14Uu chamanennyu temeet ne mi taaptogap piribirinik che mi mbareenigap sabibuk che po En-gedi.

15Keero, ii karaaran miising' inyee chamanennyu; keero, itinye itoon; uu konyeguk che po cheptugenik.

16Itinye itoon, chamanennyu, ee iboiboo iman! Uu susweek che nyaliileen itogunnyo;

17pambanigap koonnyo ko taragonik, ak kureiywekyok ko piribirinik.

Jump to: Chapter 2 →