Song of Solomon 8

Kalenjin Bible Revised (BUKUIT NE TILIIL Sireet ne Dutero Kanon)

← Chapter 7 Jump to:

1Kita kaigai nda ki iuu weeriit ne kitupche, ne ki chuchun kinetap kamennyu! Nda anyoorchinin saang', ta ang'ututin; ama mi chii ne sasa.

2Ak amutin iwe kootap kamennyu, ne po ineendet ne ki ineeta, ak anagin divaik che ki kiburukto nyamdutik, che po peegap logoekyuk che piriireen.

3Oiye, agase ta tiye metinnyu eunnyi ne po kaataam, ak komuureno eunnyi ne po tai!

4Asoomok, ee tiibiigap Jerusalem, ale, amat otwaa, anan oong'et chamyet, agoi koit kasartanyi.

5Ng'oo ni togosu eng' surkwen, ne tiegei chamanennyi? Ki ang'eetin eng' kelutap keetitap logoek. Ole ki ame moet kamenng'ung' komachei kosichin, kimi yooto koamei moet si kosichin.

6Indea muguleldang'ung' ko uu ng'ookset, ko uu ng'ookset eng' eung'ung'. Amu kiim chamyet ko uu meet, korom ng'et konda ko uu kererit. Lalennyi ko uu laletap maat, liplibenet ne koroom miising'.

7Ma imuuchi peek che chaang' kotis chamyet, ama imaluuchi maranosyek. Ngot kogoito chiito tuguukyik tugul che po koonnyi agobo chamyet, kesasei miising' kot.

8Kitinyei chepto ne ming'in ne kitupche, ne tomo kogun kinet. Ki itoi nee cheptonyo ye tuun kait ye kibwanune koito?

9Ngot ko inaatut ineendet, keteechei paragunnyi irimeet ne po fedha. Ak ngot ko kereiywotap kurgeet, keng'ote ineendet pagoinigap taragonik.

10Aa inaatut ak ko uu kinaikyuk teeksosyekyik che kooen. Ki aegu anyun eng' konyekyik ineendet ne ibu kaalyeet.

11Ki tinyei Solomon mbareetap sabibuk eng' Baal-hamon. Ki imanakyi mbaranooto po sabibuk riibiik, kinyooljin chii tugul koip fedhaisyek eliphuut che po logoekyik.

12Mbareennyu ne po sabibuk, ne nenyu, komi tainnyu. Inyee, ee Solomon, inyooru eliphunooto, ak nyooru pogol aeng' icheeget che riibei logoekyik.

13Inyee ne imenye mbareenik, epchin iit choronok kuting'ung'; koono agas kutinooto.

14Chaakte, chamanennyu, kergeitu ak kenyeleet anan aarwetap teweretyot eng' tuloonoogap tuguuk che ng'uu ne anyiny.

← Chapter 7 Jump to: