1 Samuel 16

Kalenjin Bible (BUKUIT NE TILIL)

← Chapter 15 Jump to: Chapter 17 →

1Ak kimwachi Jehovah Samuel kolenji, Irirjini Saul agoi kotianit amu koaesie inendet si mata koek laitoriat eng’ Israel? Inde mwaita laleng’ung’ konyi, ak iwe, ayoktoin iwe oldab Jesii Betlehemindet: amu kaalewenjige laitoriat eng’ werikyik.

2Ak kimwa Samuel kole, Awetitoi ano? Ngot kogas Saul, kobara. Ak kilenji Jehovah, Kweri roriat, ak imwa ile, Kanyo aeng’ji Jehovah.

3Ak iguur Jesii konyo ole itisisie, si aborun kit ne iyae: ak iilwa chito ne amwaun.

4Ak kiyai Samuel kioto kiga mwa Jehovah, ak kinyo Bet-lehem. Ak kitorok inendet boisiekab nganaset, kobotanionu, ak kolenji, Inyone eng’ kalyet?

5Ak kile, Ee, anyone eng’ kalyet: kanyo anyo aeng’ji Jehovah: otabange anyun, ak obwa kebe ole atisisie. Ak kiitaban Jesii ak werikyik, ak koguur ichek kobwa ole tisisie.

6Kingoit, kogeer Eliab, ak kole, Mitei iman ne iilat ne bo Jehovah tainnyi.

7Ago kilenji Jehovah Samuel, Amat igeer togennyi, anan ko koindab tononennyi; amu kaesie inendet: amu mageerei Jehovah ko u ye keerei bik; amu keerei bik itonda, ago keerei Jehovah muguleldo.

8Koguur anyun Jesii Abinadab, ak kolenji kosiirto eng’ taitab Samuel. Ak kile, Ma lewen agine Jehovah nito.

9Yeityo kolenji Jesii Sama kosiirto. Ak kile, Ma lewen agine Jehovah nito.

10Ak kilenji Jesii werikyik tisab kosiirto eng’ taitab Samuel. Ak kilenji Samuel Jesii, Ma lewen Jehovah chuto.

11Ak kilenji Samuel Jesii, Mi yu lagoguk tugul? Ak kile, Ta komi ne ming’in, keero, iyagi kechirek. Ak kilenji Samuel Jesii, Iyokte chito kwo komut inendet: amu magitebye ng’ony agoi koit.

12Ak kiiyokto chito, ak kiimut inendet. Ki birir, ak ki kararan togennyi, ak ki kararan. Ak kile Jehovah, Ng’eet, iil inendet: amu inendet nito.

13Konem anyun Samuel lalet ne mi mwaita, ak koiil inendet eng’ kwenutab tupchosiekyik: ak kinyonji Tamirmirietab Jehovah Daudi eng’ kimnatet koboch betunoto agoi. Kong’eet anyun Samuel, ak kwo Rama.

14Ak kiga kwo Tamirmirietab Jehovah eng’ Saul, ak kiimu inendet tamirmiriet ne ya ne kibunu Jehovah.

15Ak kimwachi otwogikyik Saul, kolenji, Keero, imuin tamirmiriet ne ya ne bunu Kamuktaindet.

16Ingong’at kiptaiyandennyo otwogikyik, che mi tainnyi, kocheng’ chito ne butin ketubet: ye nyonji tamirmiriet ne ya ne bunu Kamuktaindet, kobut ketubet eng’ eunnyi, si isob.

17Ak kilenji Saul otwogikyik, Ocheng’wa chito ne ingen kobut ketubet komie, ak omutwa inendet.

18Kowolji anyun age eng’ murenjoto chiget, kolenji, Keero, kiageer werit age ne bo Jesii Bet-lehemindet, ne butin, ak ko chito ne kim ne tinyei nyiganatet, ak ko chitab luget, ak ko ng’om eng’ ng’alalet, ak ko chito ne kararan, ak komi Jehovah koboto inendet.

19Koyokto anyun Saul bik koba oldab Jesii, koba kolenji, Iyokwa Daudi wering’ung’, ne iyagi kechirek.

20Ak kichob Jesii sigiriet ak koganapchi amitwogik, ak sotet ne mi divaik, ak aruetab ng’oror, koyoktae Daudi werinnyi koipchi Saul.

21Ak kiit Daudi oldab Saul, ak kotonon eng’ tainnyi: ak kicham Saul inendet mising’; ak kiek chito ne ipchin karikyik.

22Ak kiiyokto Saul chito kwo oldab Jesii, kwo kolenji, Asomin ale, chamji Daudi kotonone tainnyu: amu kogonyor chamet eng’ ane.

23Ak ye kiga nyonji Saul tamirmiriet ne ya ne bunu Kamuktaindet, konem Daudi ketubet ak kobut: kogaigait anyun Saul, ak komieit kogeny, ak kiwa eng’ inendet tamirmiriet ne ya.

← Chapter 15 Jump to: Chapter 17 →