1 Timothy 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1Ne bo tai anyun aboru ale ingoyaak somutik, ak sautik, ak saisaet, ak mwaet ne bo kongoi agobo bik tugul;

2agobo laitorinik ak tugul che tinyei bounatet; si kobiit ketebe kalyet ak mutyonet eng’ kaiyweet ne kiywei Jehovah ak teegisto.

3Mie nito ak ko taagaksei eng’ taitab Jehovah Yetindennyo;

4ne machei kole kesor bik tugul, ak konyor naet ne bo imanit.

5Amu mitei Jehovah agenge, katuiyoindet agenge agine kwenutab Jehovah ak bik, noto chito, Kristo Jesu,

6ne kiigoitogei koek ne kitiage tugul; ne tun kibaorianjin eng’ betusiekyik;

7kigindea anyun agobo noto aek amdoindet ak ne kiyoktoi (amwae imanit, mamwae lembech), konetindetab Bororiosiek eng’ kayanet ak imanit.

8Amache anyun ale kosaei murenik eng’ komosta age tugul, konamjin barak eunekwak che tililen, ko mami neregek ak tiiyet.

9Ko u noto kobogorisiek ingolaach ge eng’ kalaakset ne nyolu, eng’ teegisto ak ribetab ge; ma eng’ laetab sumeek, ak tahabu anan sonoek che kororon anan ngoroik che bo kamanutiet ne o;

10ago (ko u ye nyoljin kobogorisiek che ibortogei kole bikab Jehovah icheget) eng’ boisionik che miach.

11Ingonetgei kobogoriot eng’ mutyonet koboto kasetab it.

12Ago machamjini kobogoriot konetis, anan koboi muren, ago kotebi eng’ mutyonet.

13Amu kigiyai Adam korok, si keyae Awa;

14ak kima king’al Adam, ago kingo kageng’al kobogoriot kobutyi bistoet;

15ago kisoru eng’ sigisiet, ngo tebyei ichek eng’ kayanet ak chamnyet ak katabanet koboto ribetab ge.

← Chapter 1 Jump to: Chapter 3 →