1 Timothy 6

Kalenjin Bible (BUKUIT NE TILIL)

← Chapter 5 Jump to:

1Ingoiityi otwogik alak tugul che ratotin kole nyoljin kiptainikwak teegisto tugul, si ma kichub kainetab Jehovah ak konetisiet.

2Ak ichek che tinyei kiptainik che iyanotin, ko mat kosas ichek, amu tupchosiek; ago kaigai koot ichek, amu icheget che nyoru toretet ko che iyani ak ko chamanik. Inet ng’alechu ak iteechi.

3Ngoneti chi age tugul konetisiet ne ter, ama chamei ng’alek che bo iman, ng’alekab Kiptaiyandennyo Jesu Kristo, ak konetisiet ne namegei ak atebet ne bo kaiyweisietab Jehovah;

4komenei, ama naei kiy, ago tinyei miando agobo teebutik ak tiiyosiekab ng’alek che bunu ng’etkonda, suriet, chemereret, kabwatutik che yaachen,

5boriosiekab bik che kigong’emogis kabwatutikwak, ak che kigirebe imanit, kolen kaiyweet ne kiywei Jehovah ko oret ne kibore.

6Ago kaiyweet ne kiywei Jehovah koboto yametab ge eng’ tuguk che kitinye, ko borotet ne o:

7amu kima kiibu kiy konyo ng’ony, ama kimuchi keib kiy komanda eng’ ng’ony;

8ago kitinye amitwogik ak ngoroik; yamech choto.

9Ago ichek che machei koek magorek kobutyin yomset ak mestet ak magutik che chang’ che berberen, che ibu ng’wanindo, che lugui bik koba ng’emisiet ak luset.

10Amu chametab siling’isiek ko tigitiot agenge ne bo yaitwogik alak tugul: che kigong’asyigei alage kot kometo kayanet ak kigotorgei eng’ arogenosiek che chang’.

11Ago inye, ee, chitab Jehovah, mwee tuguchuto; ak isub imanda, ak kaiyweet ne kiywei Jehovah, kayanet, chamnyet, muitaet, mutyonet.

12Yai luget ne mie ne bo kayanet, nam sobondo ne bo koigeny, noto ne kigiguurjin, ak kiing’any ng’ang’et ne mie eng’ taitab baorinik che chang’.

13Kang’atin anyun eng’ taitab Jehovah, ne ribei tuguk tugul kosopcho, ak eng’ taitab Kristo Jesu, ne kibaorian ng’ang’et ne mie eng’ taitab Pontio Pilato;

14ale irib ng’atutiet amanyor berut, ne magimuchi keger kong’, agoi toogunetab Kiptaiyandennyo Jesu Kristo:

15ne tun ibortoi eng’ betusiekyik, ne inendet ne iberurot ak ko Kamuktaindet inegei, Laitoriat ne bo laitorinik, ak Kiptaiyat ne bo kiptainik;

16ne tinyei inegei sobondab koigeny, ne menyei eng’ lapkeiyet ne magimuchi kerikyi; ne tomo kogeer chi, ama imuchi kogeer: ingobunji inendet teegisto ak kamuktaet koigeny. Amen

17Ng’at magorek che bo betusiechu, si mamenio, anan konde kamang’unenywa magornatosiek che matonondos, ago eng’ Jehovah inendet ne konech tuguk tugul eng’ aiyebindo si kobiit keboiboitune;

18ile koyai ne mie, si kobiit koek magorek eng’ boisionik che miach, si kochobogis kogoito, koyomogei ak alak;

19kogonorjigei lumdaet ne mie, agobo betusiek che bwanei, si kobiit konam sobondo noto ne bo iman.

20Ee, Timoteo, rib anyun noto kigegonin, istoege ng’alek che manamegei ak oretab Jehovah, ak kabeletab ge ne bo naet, noto kiguure eng’ lembech naet;

21ne kigosub alage ak kigochiliil eng’ kayanet. Ingoteb mieindo koboten.

← Chapter 5 Jump to: