2 Corinthians 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Noto anyun, amu kitinye boisioni, ko u ye kigenyoru rirenetab ge, ko mameech mugulel:

2ago kigeesie tuguk che ung’otin che bo kalilanet, ama kibendoti eng’ ng’alset, anan keboisie ng’olyotab Jehovah eng’ kaberberisiet; ago eng’ kabartaetab imanit, kiborjinige kabwatetab chi age tugul eng’ taitab Jehovah.

3Ago ngo tugotin logoiywekyok che miach, ko tugotin eng’ ichek che lustos:

4eng’ ichek che katuch cheptalelitab ng’onyuni kabwatutikab che maiyani, si mailuuchi ichek lapkeiyetab logoiywek che miach che bo torornatetab Kristo, ne inendet ko itondab Jehovah.

5Amu magiamdoti agobo ge, ago Kristo Jesu ne Kiptaiyat, ak acheget ko ki otwogikwok amu Jesu.

6Amu Jehovah ne kimwa kole, Tun iluu lapkeiyet kobunu mesundeito, inendet ne kiiluuchi mugulelwekyok, si kogon lapkeiyet ne bo naetab torornatetab Jehovah eng’ togetab Jesu Kristo.

7Ago kitinye konoruani eng’ terenik che bo ng’ung’unyek, si kobiit kobunji Jehovah oindo ne siirtoot mising’ ne bo kamuktaet, ago ma achek;

8kinyalilech eng’ komosta age tugul, ago magigiichech; kitobtobeni, ago mabetwech kamang’unet;

9Kionwech, ago magibagaktaech; kiwirtaech ago magibarech;

10kiiboti kotugul eng’ borto meetab Jesu, si kobiit kong’ang’ak agine sobondab Jesu eng’ borwekyok.

11Amu acheget che kisoptosi kimutyinech meet kotugul amu Jesu, si kobiit kong’ang’ak agine sobondab Jesu eng’ borwekyok che begu.

12Noto anyun boisiei meet eng’ achek, ago sobondo eng’ okwek.

13Ago amu kitinye tamirmiriet noto bo kayanet, ko u ye kigisir kele, Kiayan, noto anyun kiang’alali; kiyani agachek, ak keng’alali amu noto;

14kingen kele inendet ne kiing’eet Kiptaiyat Jesu ko tun ing’eetech agachek koboto Jesu, ak kobartech kobotok.

15Amu tuguk tugul ko agobo okwek, si ye tesak mieindo eng’ che chang’, koyai kagoitoetab kongoi kotesak eng’ katororetab Jehovah.

16Noto anyun, mameech mugulel; ago agot ngo ng’emak chinnyo ne bo barak, kewalei chinnyo ne bo orit kileeliti betut age tugul.

17Amu bichiindanyo ne nyamnyum, ne matebyei, koyaiywech torornatet ne o ne bo koigeny, ne tesoksei mising’ kosiir;

18ye magigeere tuguk che toogu, ago tuguk che ma toogu, amu tuguk che toogu kosiirtoi; ago tuguk che ma toogu ko bo koigeny.

← Chapter 3 Jump to: Chapter 5 →