2 Corinthians 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Amu kingen kele ngobutok got ne bo ng’onyuni ne borwekyok, ketinye teekset ne bunu Jehovah, got ne kima kiteech eng’ eunek, bo koigeny, eng’ kipsengwet.

2Amu iman kitigendosi eng’ ni, kimache mising’ kilaakwech meng’otennyo ne bunu kipsengwet:

3ye tun kagilaakwech ko ma kemi ach ngor.

4Iman, achek che kimi eng’ borito, ketigendosi, ketinye laiset; ma kele kimache kereegunenech, ago kimache kilaakwech, si kobiit kolugui sobondo noto meei.

5Ara anyun, ne kiyaech agobo nito, ko Jehovah, ne kigonech Tamirmiriet, koek tangoaniatab tuguk che bwanei.

6Eng’ noto anyun ki nyigonen kotugul, ak kingen kele, ye ta kemi eng’ borto, ko kagimi koboto Kiptaiyat

7(amu kibendoti eng’ kayanet, ma eng’ keeret);

8amwae ale, ki nyigonen, ak kemache kele, kaigai kemande eng’ borto, ak ketebi koboto Kiptaiyat.

9Noto anyun ko kit ne kitokyinige, ngemi eng’ bori, anan ngo magimi, keegu che iboiboi inendet.

10Amu kanyol kibartech achek tugul eng’ taitab ng’echeretab kiruoget ne bo Kristo; si kobiit kotaach chi age tugul tuguk che te che kiyai eng’ borto, ngo miach anan ngo yaach.

11Amu kingen anyun kaiyweisietab Kiptaiyat, kichuutu bik, ago kibortaech eng’ taitab Jehovah; ak amang’u ale kibortoech eng’ taitab kabwateng’wong’.

12Magimwauge kogeny eng’ taing’wong’, ago kigonok boroindo si kobiit olosuge amu achek, si kobiit onyoru kit ne kowoljini icheget che ilosugei eng’ tuguk che toogu, ama eng’ muguleldo.

13Agot ngo kogobetech met, ko eng’ Jehovah; anan ngo litit ng’omnatennyo, ko amu okwek.

14Amu ichiichech chamnyetab Kristo; amu kigeere ko u ni, kele kimechi chito agenge tugul, noto anyun kibek tugul;

15ak kimechi inendet tugul, si ma kosoptos agobo ge icheget che soptos, ago agobo inendet ne kimechi ak kong’eet kogeny.

16Noto anyun koboch nguno ko magingen chi age tugul eng’ borto: ago ngot kigingen Kristo eng’ borto, ko magingen inendet nguno ko u noto kogeny.

17Noto anyun, ngo mi chi age tugul eng’ Kristo, ko kigeyai inendet koek chito ne leel: kagosiirto tuguk che bo keny; ogeero, kagoek che leelach.

18Ago bo tuguk tugul Jehovah ne kiituiyenech ge eng’ Kristo, ak kigonech achek boisiet ne bo katuiyet;

19kele kimi Jehovah eng’ Kristo kotuitos ng’ony ak inendet, ko maiityin ichek yaitwogikwak, ko kagogonech ng’olyotab katuiyet.

20Noto anyun ki tononjinik agobo Kristo, ko u ye igoigook Jehovah eng’ achek; kigoigook agobo Kristo, kele otuiyege ak Jehovah.

21Inendet ne kima kongen tengek, ko kiyai inendet koek tengek amu achek; si kobiit keegu imanda ne bo Jehovah eng’ inendet.

← Chapter 4 Jump to: Chapter 6 →