2 Timothy 1

Kalenjin Bible (BUKUIT NE TILIL)

Jump to: Chapter 2 →

1Paulo, ne kiyoktoi ne bo Kristo Jesu eng’ magetab Jehovah, ko u arorutiet ne bo sobondo ne mitei eng’ Kristo Jesu,

2asirjini Timoteo, lakwennyu ne achame mising’: Ingoteb koboten mieindo, rirenetab ge, kalyet, che bunu Jehovah Kwanda ak Kristo Jesu Kiptaiyandennyo.

3Amwachini Jehovah kongoi, ne aote ko u ye kiyaei kwanisiekyuk che bo tai eng’ kabwatet ne tilil, ale masisei kabwatet ne abwatin eng’ somutikyuk, kemoi ak bet,

4atinye emosto ageerin, abwati beeguk bo kong’, si konyiia boiboiyet;

5ye kingibwatwa kayanet ne matinyei kenisiet ne mi eng’ inye; ne kimenyei korok eng’ ingogo Lois, ak komet Eunike; ak, ayani ale menyin aginye.

6Abwatun anyun amu nito ale iyuokyi konunet ne bo Jehovah, ne mi eng’ inye amu kagonooretab eunekyuk.

7Amu kima konech Jehovah tamirmirietab nyogoriet, ago ne bo kamuget ak chamnyet ak ribetab ge.

8Amelilanji anyun baornatetab Kiptaiyandennyo, anan ane kimonjororiondennyi: ago nam yamdaetab nyalilwogik amu logoiywek che miach ko u ye te kamuktaetab Jehovah;

9ne kisoruech ak koguurech eng’ kuurset ne tilil, ma ko u boisionikyok, ago ko u magennyi ak mieindanyi, ne kigigonech eng’ Kristo Jesu koboch kenyisiekab koigeny,

10ago kagotook nguno eng’ toogunetab Yetindennyo Kristo Jesu, ne kigobar meet, ak kong’any sobondo ak ng’emisiet ne ma komi, eng’ logoiywek che miach,

11kigindea agobo noto aek amdoindet, ak ne kiyoktoi, ak konetindet.

12Anyoru anyun nyalilwogichu agichek agobo noto: ago malilani; amu angen inendet ne kiayan, ak ayani komie ale imuchi korib noto ne kiagochi inendet agoi betunoto.

13Nam itondab ng’alek che bo iman che kiigasena, eng’ kayanet ak chamnyet ne mitei eng’ Kristo Jesu.

14Rib eng’ Tamirmiriet ne Tilil ne menyei eng’ achek, noto mie ne kigigonin.

15Ingen ni ile, kigoistoenagei tugul che mi Asia; eng’ ichek ko Pugelo ak Hermogene.

16Ingogochi Kiptaiyat rirenet gotab Onesiporo: amu kitoreta konyil che chang’, ama ililan amu monjororinnyu;

17ago, ye kingomi Rom, kocheng’a eng’ kagiiletab ge, ak kinyorua,

18(ingogochi Kiptaiyat inendet konyor rirenet ne bo Kiptaiyat eng’ betunoto;) ak ingen komie ole te boisiet ne kiyai eng’ Epeso.

Jump to: Chapter 2 →