2 Timothy 4

Kalenjin Bible (BUKUIT NE TILIL)

← Chapter 3 Jump to:

1Kang’atin anyun eng’ taitab Jehovah, ak Kristo Jesu, ne tun iruokyin che soptos ak che kigobek, ak eng’ toogunennyi ak eng’ bounatennyi;

2amde ng’olyot; choboge eng’ betut ne nyolu, ak eng’ betut ne ma nyolu; itigon, ker kong’, igiil, eng’ muitaet tugul ak konetisiet.

3Amu nyonei betut ne ma tun epchin it agot kitigin konetisiet ne bo imanit; ago, tinyei itik che iututos, iyumjingei konetik che isubi magutikwak;

4ak koesio koepchi it imanit, ak komasta kosub atindonik che bo buch.

5Ago ripge inye eng’ tuguk tugul, muite eng’ nyalilda, yai boisietab amdaetab logoiywek che miach, yai boisieng’ung’ kosulda.

6Amu kigoitoa nguno, ak kagoit betusiek che awendi.

7Kiayai luget ne mie, kaagesu labatet, kiarib kayanet:

8koboch nguno ko kagegonorua kutwet ne bo imanda, ne tun kona Kiptaiyat, kiruogindet ne bo imanda, eng’ betunoto: ago ma anege, ago icheget tugul agichek che kigocham toogunennyi.

9Igiilge nyonja ko negit:

10amu kigobagakta Dema, ko kagocham ng’onyuni bo betusiechu, ak kwo Tesalonika; kwo Kreske Galatia, kwo Tito Dalmatia.

11Luka inegei ne mi kobota. Imutu Mariko, ak obwa tuwai: amu toreta eng’ boisiet.

12Ago kiayokte Tukiko kwo Epeso.

13Ye inyo iibu sumet ak bukusiek, ago ne siirei ko magatok che kisirei che kiabagakyi Karpo eng’ Troa.

14Kiyaiywa ne ya mising’ Aleksandro, kitong’oindet ne bo sugunoik: tun yaakyin Kiptaiyat ko u boisionikyik:

15ribege inendet; amu kigirinda ng’alekyok mising’ kot.

16Ma biit chi ne kitoreta eng’ wolunennyu ne bo tai; kibagakta tugul: amat kiityi ichek ng’olyondonito.

17Ago kitonon Kiptaiyat kobota, ak kogimita; si kobiit keamda eng’ ane ng’alek komie, ak si kogas Bororiosiek tugul: ak kigisorua eng’ kutitab ng’etundo.

18Sorua Kiptaiyat eng’ boisiet age tugul ne ya, ak kosorua agoi ait bounatennyi ne bo kipsengwet: nenyi torornatet koigeny ak koigeny. Amen.

19Igat Priska ak Akula, ak bikab Onesiporo.

20Kitebi Erasto eng’ Korinto: ago kiabagach Tropimo eng’ Mileto komiani.

21Igiilge nyo kotom koit betusiek che bo kaititiet. Igatin Eubulo, ak Pude, ak Lino, ak Klaudia, ak tupchosiek tugul.

22Ingoteb Kiptaiyat koboto tamirmirieng’ung’. Ingoteb mieindo kobotok.

← Chapter 3 Jump to: