Ecclesiastes 11

Kalenjin Bible (BUKUIT NE TILIL)

← Chapter 10 Jump to: Chapter 12 →

1Wirji amitwogiguk beek; amu tun inyoru ko kagosiirto betusiek che chang’.

2Igochi kebeberta bik tisab, ee bik sisiit; amu mengen yaitiet ne biitu eng’ ng’ony.

3Ngo nyi ropta bolik, korong’jigei ng’ony: ak ngo lulji ketit murot ne bo tai, anan ko murot ne bo katam, ko komosta ne kalulji, kotebe yoto.

4Magolsei inendet ne ribei usonet; ama kesei inendet ne keerei bolik.

5Ko u ye mengen oretab usonet anan ole nertoi kowekab lakwet eng’ moetab inendet ne managat; u noto mengen boisietab Kamuktaindet ne yaei tuguk tugul.

6Kolse karon, amesis koskoleny: amu mengen che rurtos, ngo ni anan ni, anan ngo miagitu tuwai.

7Anyiny iman lapkeiyet, ak kit ne kararan asista kegeerei.

8Ee, ngo sob chito kenyisiek che chang’, ingobaibait eng’ choto tugul; ago ingobwat inendet betusiekab mesundeito, amu chang’. Buch tugul che bwanei.

9Ee, baibaitu murenoni, eng’ betusiekab ming’inateng’ung’; ak ingobaibain muguleldang’ung’ eng’ betusiekab ming’inateng’ung’, ak isub ortinwekab muguleldang’ung’, ak ko u ye igeere: ago nai ile, imutyinin Kamuktaindet kiruoget amu tuguchuto tugul.

10Iste anyun arogenet eng’ muguleldang’ung’, ak iste yaitiet eng’ bortang’ung’: amu buch betusiekab ming’inateng’ung’ ak che bo nerateng’ung’.

← Chapter 10 Jump to: Chapter 12 →