Ecclesiastes 12

Kalenjin Bible (BUKUIT NE TILIL)

← Chapter 11 Jump to:

1Ibwat kogeny Yaindeng’ung’ eng’ betusiekab ming’inateng’ung’, kotom koit betusiek che yaach, ak korik kenyisiek che imwae ile, Mabaibaitune chuto;

2kotom koimenit asista, anan lapkeiyet, anan arawet, anan kecheik, ak koweek bolik ye kagorobon;

3eng’ betut ye tun botanso ribikab got, ak kong’urugis che kimen ak kosisyo che ng’aisei amu ng’ering’, ak koimenitu che ititoi eng’ tirisiok,

4ak keger kurgotik eng’ oret, ye ma kegasei mising’ ng’aiset, ak kong’eet chito eng’ kateetab taritiet, ak koming’in tibik tugul che bo tienwogik;

5ee, iywei ichek noto toror, ak kobiit kamuiset eng’ oret; ak koiyesio taptokab ketit ne kiguure almond, ak konyigisit talamwet, ak kobet maget: amu wendi chito gonnyi ne bo koigeny ak kobendat che ririoti eng’ ortinwek:

6kotom kitaach borowetab feda, anan kotom ketui teretab tahabu, anan kotom koiye teret eng’ kondametut, anan kotom koil cheptiret eng’ ole kisiile beek,

7ak koweekyigei ng’ung’unyek ng’ony ko u ye kinye, ak koweekyigei sobondo Kamuktaindet ne kigonu.

8Mwaei Amdoindet kole, Buch, matilei kiy; buch tugul.

9Ago, amu ki ng’om Amdoindet, kita koneti bik naet; ee, kiibwat, ak kocheng’, ak kotet kalewenaik che chang’.

10Kicheng’ Amdoindet ng’alek che taachaksei, ak choto che kigisir eng’ lititindo ng’alek che bo iman.

11U kiplitok ng’alekab bik che ng’omen, ak u kipchumarisiek che kigigiich komie, ng’alekab konetikab tuiyosiek, che kigigon kobun mestowot agenge.

12Kas anyun werinnyu kateunet: mami ole igesunegei siretab bukuisiek che chang’: ak ng’etei borto eng’ somanosiek che chang’.

13Kagesunetab tuguchu ni; kagogasak tugul: iywei Kamuktaindet ak irib ng’atutikyik; amu nyoljin chito boisionito tugul.

14Amu ipchin Kamuktaindet boisiet age tugul oldab kiruoget, koboto kit age tugul ne ung’at, ngo kiy ne mie anan ngo ne ya.

← Chapter 11 Jump to: