John 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Kinam anyun Pilato Jesu, ak kobire kipcharitit.

2Ak kitaa askarik ngatiet ne bo katok, ak konde metit, ak kolaakyi inendet ngoriet ne arus ne birir;

3ak kobwa ole mi inendet kole, Kigatin, Laitoriatab Yahudik! Ak korabach inendet.

4Ak kimanda Pilato kogeny, ak kolenji ichek, Ogeero, kamutwak inendet konyo taing’wong’, si onai ole ma anyorji ane lelut inendet.

5Komong’ Jesu anyun konyo sang’, ko kerat metit eng’ ngatietab katok, kolaagonu ngorionoto arus ne birir. Ak kolenji Pilato bichoto, Ogeer chichi anyun-o!

6Ye kingogeer anyun inendet tisiik che eechen ak kiptainik, kobolyo, kole, Igartat, igartat. Kolenji Pilato, Omut okwek inendet ak ogartat: amu ma anyorji lelut.

7Kowolji Yahudik kolenji, Kitinye ng’atutiet, ak kanyol kome amu ng’atutionoto, amu kiyaigei koek Weritab Jehovah.

8Ye kingogas anyun Pilato mwaonato, koiywei mising’;

9ak kiwa Praitorium orit kogeny, ak kolenji Jesu, Ibunu ano? Ago ma wolji Jesu inendet.

10Kolenji Pilato anyun inendet, Metwekwa? Mengen ile atinye kimnatet atiachin, ak atinye kimnatet agartatin?

11Kowolji Jesu kolenji, Kama ko tetinye kimnatet iyaiywa kiy, nda kama kigonin eng’ barak; noto anyun, tinyei inendet ne koindea euneguk tengekto ne o kosiir.

12Koboch yoto kocheng’ Pilato kotiach inendet: ago kibolyo Yahudik, kole, Ngot itiach chichi, ko ma i choruet ne bo Kaisari: renyei Kaisari chi age tugul ne yaegei koek laitoriat.

13Ye kingogas anyun Pilato ng’alechuto, komut Jesu komong’ sang’, ak koteb ng’ony eng’ ng’echeretab kiruoget eng’ ole kiguure Tetetab Koik, ago kiguure eng’ kutitab Hebranik, Gabata.

14Ki Chobetab paska betunoto: ak ki olo bo sait lo. Ak kilenji Yahudik, Ogeero, Laitoriandeng’wong’!

15Kobolyo bichoto, kole, Iste inendet, iste, igartat inendet. Kolenji Pilato anyun ichek, Agartat Laitroriandeng’wong’? Kowol tisiik che eechen, kole, Magitinye laitoria kobate Kaisari.

16Kogoito anyun Pilato inendet kigartat. Konam anyun ichek Jesu ak komut:

17ak komanda, koibei inegei kimurtoiyot, agoi koit ole kiguure Koretab terta, ne kiguure eng’ kutitab Hebranik, Golgota:

18ole kiigartate ichek inendet, koboto aeng’ alak, age komosi ak age komosi, ak kimi Jesu kwen.

19Ak kisir anyun Pilato siret, ak konde kimurtoiyot. Kigisir kele, JESU NE BO NASARET, LAITORIAT NE BO YAHUDIK.

20Kosoman anyun Yahudik che chang’ sironito: amu ki negite nganaset ole kigigartate Jesu: ak kigisir eng’ kutitab Hebranik, ak Romanik, ak Yunanik.

21Kolenji anyun tisiik che eechen che bo Yahudik Pilato, Amesir ile, Laitoriat ne bo Yahudik: ago, kimwa kole, A Laitoriat ne bo Yahudik.

22Kowol Pilato kole, Kit ne kaasir ko kaasir.

23Ye kingo kagogartat anyun askarik Jesu, konam ngoroikyik, kopchei koek kebeberwek ang’wan, koib askarindet age tugul kebeberta age; ak ko u noto sumet agine: ak kima kotinyei sumet ole kigituiye, kiginab koek agenge kongeete barak agoi kapkelyen.

24Kolenjigei anyun ichegei, Amongegerer, ago ongeser barbarek, si kenai chito ne bunjin: si kosulda sirutiet ne mwaei kole, Kipchechigei ngoroikyuk, Ak kolotyigei ngoriennyu. Kiyai anyun askarik tuguchuto.

25Ago kitonondos eng’ ye negite kimurtoiyotab Jesu kamet, ak chepkametab kamet, Maria ne bo Klopa, ak Maria Magdalene.

26Ye kingogeer Jesu anyun kamet, ak noto ne bo alamalyet ne kichamei Jesu kotonondos eng’ yoto, kolenji kamet, Chebiosoni, keer wering’ung’!

27Kolenji anyun noto ne bo alamalyet, Keer komet! Ak koboch sainato komut inendet chebiosonato kwo gonnyi.

28Kingobata choto, ko kagonai Jesu kole kagogesgei tuguk tugul, si kobiit kosulda sirutiet, komwa kole, Ama melel.

29Kiga kinde yoto teret ne nyiitat siki: konyiit anyun sibonjit siki ak koyogochine husop, konde kutinnyi.

30Ye kingo kagotaach Jesu siki, komwa kole, Kagogesgei: ak koabuch metinnyi, ak kogoito tamirmiriennyi kwo.

31Amu ki Chobet ak kima kemakyin muswek kotebe kimurtoiyot eng’ sabato (amu ki o betunoto bo sabato), kosom Yahudik Pilato kole keiri kelyekwak, si kesutei.

32Kobwa anyun askarik, ak koiri kelyekab ne bo tai, ak ne bo age ne kiga kigartat koboto inendet.

33Ago ye kingobwa ye mi Jesu, ak kogeer kole kagome, ko mata koiri kelyekyik:

34ago kitoore ng’otit karastanyi age eng’ askarik, ak ngunoto komong’ korotik ak beek.

35Ak kibaorian inendet ne kigeer, ak ko bo iman baornatennyi: ak ingen inendet kole mwaei iman, si kobiit oyan ak okwek.

36Kiyaak tuguchu, si kobiit kosulda sirutiet ne kile, Magiiriei kowennyi.

37Ak kogeny mwaei sirutiet age kole, Tun keerei ichek inendet ne kitoorei.

38Ak kingobata tuguchu, kwo Josep ne bo Arimatea, ne ki age eng’ alamalyetab Jesu eng’ ung’ot, amu kiiywei Yahudik, kosom Pilato kole kosut mustab Jesu: ak kichamji Pilato. Konyo anyun koib bortanyi.

39Ak kinyo agine Nikodemo, ne kinyonji Jesu kemoi atkinye tai, koibu tuguk che u igomoik che kigiburukto nyamdutik alak, che ki olo bo ratilisiek bogol.

40Kisut anyun mustab Jesu, ak kotaa eng’ ngoroik che bo katanit koboto nyamdutik, ko u biteetab Yahudik ye tubisiei.

41Kimi mbaret ole kigigartate inendet; ak kimi mbaranato kererit ne leel ne kitom ketupchi chi.

42Kiinde anyun Jesu oloto amu betutab Chobetab Yahudik, amu ki negit kererit.

← Chapter 18 Jump to: Chapter 20 →

Recommended Reading

Commentary John Commentaries → Devotional John Devotional Guide → Get This Bible Kalenjin Bible (BUKUIT NE TILIL) Study Bible →