John 21

Kalenjin Bible (BUKUIT NE TILIL)

← Chapter 20 Jump to:

1Kingobata tuguchu koborjigei Jesu kogeny alamalyet eng’ araraita ne bo Tiberia; kiiborjigei ko u ni.

2Kimi tugul, Simon Petero ak Tomas ne kiguure Didumo, ak Natanael ne bo Kana ne bo Galili, ak werikab Sebedi, ak aeng’ alak che bo alamalyennyi.

3Kolenji Simon Petero, Kawe aram njirenik. Kolenji chun alage, Kibendi agachek koboten. Koba anyun ak kolany moingetab beek: ak ma nam kiy kemounoto.

4Ago ye kimachei koeech, kotonon Jesu eng’ ngegut: ago ma nai alamalyet kole Jesu.

5Kolenji Jesu anyun, Lagochu, otinye kiy ne oame? Kowolji kolenji, Achicha.

6Ak kilenji ichek, Owirji regereiywot ne kiname njirenik komostab tai ne bo moinget, si onyoru. Kowirji anyun, ak mata komuch kochuut amu chang’indab njirenik.

7Komwachi age ne bo alamalyet, noto ne chamei Jesu, Petero, kolenji, Kiptaiyat nito. Ye kingogas anyun Simon Petero kole Kiptaiyat, kolaach kotit anyun (amu kimi ach ngor) ak kochorjigei araraita.

8Ago kibwa chun alage che bo alamalyet kobunu moinget ne ming’in (amu kima ko looen eng’ ngegut, ago ki olo bo kakwautik che bo eut bogol aeng’), kochuutu regereiywondonoto mi njirenik.

9Noto anyun, ye kingoit ngegut, kogeer eng’ yoto mat ne bo nesek, ak kiwatanat njiriot eng’ yoto, ak makatiat.

10Kolenji Jesu, Oibu njirenik alak chu korame nguno.

11Kolany Simon Petero moinget, ak kochuut regereiywot konyo ngegut, ak ki nyiitat njirenik che eechen, bogol agenge ak konom ak somok: ak nganda ki chang’ njirenik mising’, ko kima kerer regereiywondonoto.

12Kolenji Jesu ichek, Obwa oamisie. Ak ma kany age tugul eng’ alamalyet koteebe kole, I ng’o? Amu kiingen kole, inendet ko Kiptaiyat.

13Konyo anyun Jesu ak konam makatiat, ak kogochi, koboto njirenik agichek.

14Nito ko ne bo somok koborjingei Jesu alamalyet, ko kagong’eet inendet komong’ eng’ che kibek.

15Ye kingo kagoamis anyun, kolenji Jesu Simon Petero, Simon, weritab Johana, tos ichama kosiir chu? Kolenji inendet, Ee, Kiptaiyandani, ingen ile achamin. Kolenji, Bai arekyuk.

16Kolenji kogeny ne bo aeng’ Simon, weritab Johana, ichama? Kolenji, Ee, Kiptaiyandani, ingen ile achamin. Kolenji, Iyage kechirekyuk.

17Kolenji ne bo somok, Simon, weritab Johana, ichama? Koarogen Petero amu kamwachi ne bo somok, kolenji, Ichama? Ak kolenji, Kiptaiyandani, ingen tuguk tugul; ingen ile achamin. Kolenji Jesu inendet, Bai kechirekyuk.

18Amwaun, iman, iman, ale, Ye kita ko i ming’in, ko kiilaaksechinige, ak iwendi ole imache: ago ye tun iositu, iitoi euneguk, ak kolaakseun age, ak komutin ole memache.

19Komwa ni, kobortoi ole teptoi meet ne konyite Jehovah. Ak ye kingo kagomwa nito, kolenji, Isubwa.

20Kowelelgei Petero, kogeer noto bo alamalyet ne chamei Jesu, kosubi; ne kitiiegei tegetab Jesu eng’ amisietab lagat, ak kolenji, Kiptaiyandani, ng’o inendet, ne ng’wektoin?

21Kingogeer Petero inendet, kolenji Jesu, Kiptaiyandani, lyon chichi?

22Kolenji Jesu, Ngot amach kotebi agoi tun anyo, image nee? Isubwa inye.

23Kiyom anyun ng’olyondoni tupchosiek, kole mameei chichoto age ne bo alamalyet: ago kima mwachi Jesu inendet, kolenji, mameei; ago kilenji, Ngot amach kotebi agoi tun anyo, image nee?

24Nito anyun ko noto bo alamalyet ne baorianjin tuguchu, ak ne kisirei tuguchuto: ak kingen kele bo iman baornatennyi.

25Ak mi kogeny tuguk alak che chang’ che kiyai Jesu, che, nda kisirei age tugul, alen ta mayamei ng’ony bukusiek che kata kisirjin.

← Chapter 20 Jump to: