Judges 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Ak kingobata betusiekab Abimelek kong’eet Tola weritab Pua, weritab Dodo, chitab Isakar, kosor Israel; ak kimenyei Samir eng’ emetab tulonok ne bo Epraim.

2Ak kiiruokyi Israel kenyisiek tiptem ak somok, ak kime, ak kigitupchi Samir.

3Ak kingobata betusiekyik, kong’eet Jair, Gileadindet; ak kiiruokyi Israel kenyisiek tiptem ak aeng’.

4Ak kitinyei werik sosom che kilanyei moek sosom che bo sigirok, ak kitinyei nganasok sosom, che kiguure Habot-jair agoi ra, che mi emetab Gilead.

5Ak kime Jair, ak kigitupchi Kamon.

6Ak kiyai lagokab Israel yaitiet kogeny eng’ taitab Jehovah, ak kiot Baalik, ak Astarot, ak kanamonikab Suria, ak kanamonikab Sidon, ak kanamonikab Moab, ak kanamonikab lagokab Amon, ak kanamonikab Pilistik; ak kimeto Jehovah, mata koot inendet.

7Ak kilalyo neregekab Jehovah agobo Israel, ak kialdochi eunekab Pilistik, ak eunekab lagokab Amon.

8Ak kiim ak konyalil lagokab Israel kenyinoto ak kiinyalil lagokab Israel tugul che kimi Jordan bitonin eng’ emetab Amorik, ne mi Gilead, eng’ kenyisiek taman ak sisiit.

9Ak kilandae Jordan lagokab Amon koba kobargei ak Juda, ak Benjamin agichek, ak gotab Epraim; kiginyalil anyun Israel mising’.

10Ak kirirji lagokab Israel Jehovah, kolenji, Kigeyaun tengekto, amu kigemete Kamuktaindennyo, ak kigeot Baalik.

11Ak kimwachi Jehovah lagokab Israel, kolenji, Tos kima asoruok eng’ Misrik, ak eng’ Amorik, ak eng’ lagokab Amon, ak eng’ Pilistik?

12Kiinyalilak agichek Sidonik, ak Amalegik, ak Maonik; ak kiorirja, ak kasoruok eng’ eunekwak.

13Ago kiometa, ak oot kanamonik: noto anyun, ma asoruok kogeny.

14Oba orirji kanamonik che kiolewen; ingosoruok ichek eng’ betutab nyalildang’wong’.

15Ak kilenji lagokab Israel Jehovah, Kigeyai tengekto: yaiywech kit age tugul ne igeere ile nyolu; ago kisain kityo kele isoruech betuni.

16Ak kiisto kanamonik che too eng’ kwenunywa, ak koot Jehovah: ak kiarogen sobondanyi amu nyalildab Israel.

17Kiiyumgei anyun lagokab Amon, koba koteech Gilead. Ak kiiyumgei lagokab Israel ak koteech Mispa.

18Ak kimwachigei bik, bounikab Gilead, kole, Ng’o ne tau kobaregei ak lagokab Amon? Egu inendet ne o eng’ tugul che menyei Gilead.

← Chapter 9 Jump to: Chapter 11 →