Judges 12

Kalenjin Bible (BUKUIT NE TILIL)

← Chapter 11 Jump to: Chapter 13 →

1Ak kiiyumgei bikab Epraim, ak koba kotokyigei murot ne bo katam; ak kimwachi ichek Jepta kolenji, Amu nee si ilande obarge ak lagokab Amon, ama imwawech kebe tugul? Kibeeldoin gong’ung’.

2Ak kimwachi Jepta ichek kolenji, Kigitinye boriet ne o ak lagokab Amon, ane ak bikyuk, ak ye kiaguurok ko ma osorua eng’ eunywa.

3Ak ye kiageer ale ma osorua, ande sobondanyu ng’oiyondit, alande kebarge ak lagokab Amon, ak kiinde Jehovah ichek eunnyu: ko amu nee anyun si obwanja rani, oboriena?

4Yeityo koyum Jepta bik tugul che bo Gilead, ak kobargei ak Epraim: ak kibar bikab Gilead Epraim, amu kile, Okwek Gileadik ko kiomweune Epraim, che omi kwenutab Epraim, ak kwenutab Manase.

5Ak kinam Gileadik tabarwekab Jordan, korat Epraimik: ak ye mwa che kimweune Epraim, kole, Chamwa alanda, kolenji inendet bikab Gilead, I Epraimindet? Ye le, Achicha;

6kolenji anyun ichek inendet, Mwa ile Shibolet; ak kile Sibolet; amu kima komuchi komwa komie; konam anyun inendet, ak kobar eng’ tabarwekab Jordan: ak kibek eng’ betunoto che bo Epraim elfusiek artamu ak aeng’.

7Ak kiiruokyi Jepta Israel kenyisiek lo. Yeityo kome Jepta Gileadindet, ak kigitupchi nganaset age ne bo Gilead.

8Ak kingobata, koruokyi Ibsan ne bo Bet-lehem Israel.

9Ak kitinyei werik sosom, ak tibik sosom che kiigoito kitunot eng’ komoswek alak, ak kiimutyi werikyik tibik sosom che bo komoswek alak. Ak kiiruokyi Israel kenyisiek tisab.

10Ak kime Ibsan, kigitupchi Bet-lehem.

11Ak kingobata, koruokyi Elon Sebulunindet Israel; ak kiiruokyi Israel kenyisiek taman.

12Ak kime Elon Sebulunindet agine, ak kigitupchi Aijalon eng’ emetab Sebulun.

13Ak kingobata koruokyi Abdon weritab Hilel Piratonindet Israel.

14Ak kitinyei werik artam, ak werik sosom che bo werikyik che kilanyei moek tamanwogik tisab che bo sigirok: ak kiiruokyi Israel kenyisiek sisiit.

15Ak kime Abdon weritab Hilel Piratonindet, ak kigitupchi Piraton eng’ emetab Epraim, eng’ emetab tulonok ne bo Amalegik.

← Chapter 11 Jump to: Chapter 13 →