2 Thessalonians 1

Khmer 2014 (អាល់គីតាប)

Jump to: Chapter 2 →

1យើងខ្ញុំ ប៉ូល ស៊ីលវ៉ាន និងធីម៉ូ‌ថេ សូមជម្រាបមកក្រុម‌ជំអះនៅក្រុងថេស្សា‌ឡូនិក ដែលរួមជាមួយអុលឡោះជាបិតានៃយើង និងរួមជាមួយអ៊ីសា‌អាល់ម៉ា‌ហ្សៀសជាអម្ចាស។

2សូមអុលឡោះជាបិតា និងអ៊ីសា‌អាល់ម៉ា‌ហ្សៀសជាអម្ចាស់ប្រទានសេចក្តីប្រណី‌សន្តោស និងសេចក្ដីសុខ‌សាន្ដដល់បងប្អូន។

3បងប្អូនអើយ យើងត្រូវតែអរគុណអុលឡោះស្ដីអំពីបងប្អូនជា‌និច្ច យើងធ្វើដូច្នេះពិតជាត្រឹមត្រូវមែន ព្រោះជំនឿរបស់បងប្អូនកាន់តែចំរើនឡើង ហើយបងប្អូនក៏មានចិត្ដស្រឡាញ់គ្នាទៅវិញទៅមក រឹតតែខ្លាំងឡើងៗដែរ។

4ដូច្នេះ យើងបានខ្ពស់មុខ នៅចំពោះក្រុម‌ជំអះនានារបស់អុលឡោះ ព្រោះតែបងប្អូន ដ្បិតបងប្អូនចេះស៊ូទ្រាំ និងមានជំនឿ ទោះបីត្រូវគេធ្វើទុក្ខបៀត‌បៀន និងត្រូវរងទុក្ខវេទនាគ្រប់បែបយ៉ាងក៏ដោយ។

5ហេតុ‌ការណ៍នេះ សឲ្យឃើញថា អុលឡោះវិនិច្ឆ័យត្រឹមត្រូវណាស់ គឺទុក្ខលំបាករបស់បងប្អូន ធ្វើឲ្យបងប្អូនសមនឹងចូលទៅក្នុងនគររបស់អុលឡោះមែន ដ្បិតបងប្អូនរងទុក្ខលំបាក ព្រោះតែនគរនេះឯង។

6អុលឡោះនឹងសម្រេចការមួយដ៏ត្រឹមត្រូវ គឺទ្រង់នាំទុក្ខវេទនា យកមកសងពួកអ្នកដែលធ្វើឲ្យបងប្អូនវេទនា

7ហើយទ្រង់នឹងប្រទានឲ្យបងប្អូនដែលរងទុក្ខវេទនា បានសម្រាកជាមួយយើង នៅពេលអ៊ីសា‌ជាអម្ចាស់លេចចេញពីសូរ៉កាមក ជាមួយពួកម៉ាឡា‌អ៊ីកាត់ដ៏មានអំណាច។

8គាត់មកក្នុងភ្លើងសន្ធោ‌សន្ធៅ ដើម្បីធ្វើទោសអស់អ្នកដែលមិនស្គាល់អុលឡោះ និងអស់អ្នកដែលមិនស្ដាប់តាមដំណឹង‌ល្អ របស់អ៊ីសា‌ជាអម្ចាស់នៃយើង។

9ពួកគេនឹងទទួលទោស គឺត្រូវវិនាសអន្ដរាយអស់‌កល្បជា‌និច្ច។ ពួកគេនៅឆ្ងាយពីអ៊ីសា‌ជាអម្ចាស់ និងឆ្ងាយពីអំណាចប្រកបដោយសិរី‌រុង‌រឿងរបស់គាត់។

10នៅថ្ងៃនោះ ពេលអ៊ីសាមក ប្រជា‌ជនដ៏‌បរិសុទ្ធនឹងលើកតម្កើងសិរី‌រុង‌រឿងរបស់គាត់ ហើយអស់អ្នកដែលជឿក៏នាំគ្នាស្ងើចសរសើរគាត់ដែរ។ ចំពោះបងប្អូនវិញ បងប្អូនបានជឿសក្ខី‌ភាពរបស់យើង។

11ហេតុនេះហើយបានជាយើងចេះតែទូរអាឲ្យបងប្អូនជា‌និច្ច សូមអុលឡោះជាម្ចាស់នៃយើង ប្រទានឲ្យបងប្អូនរស់នៅបានសមនឹងការត្រាស់ហៅ របស់ទ្រង់។ សូមទ្រង់ប្រទានឲ្យបងប្អូនអាចបំពេញបំណងដ៏ល្អគ្រប់យ៉ាង និងឲ្យជំនឿរបស់បងប្អូនបង្កើតផលបានបរិបូណ៌ ដោយ‌សារអំណាចរបស់ទ្រង់។

12ដូច្នេះ នាមរបស់អ៊ីសា‌ជាអម្ចាស់នៃយើង មានសិរី‌រុង‌រឿងនៅក្នុងបងប្អូន ហើយបងប្អូនក៏មានសិរី‌រុង‌រឿងក្នុងគាត់ ដោយ‌សារក្តីមេត្តារបស់អុលឡោះជាម្ចាស់នៃយើង និងអ៊ីសា‌អាល់ម៉ា‌ហ្សៀសជាអម្ចាស់ដែរ។

Jump to: Chapter 2 →