Haggai 1

Khmer 2014 (អាល់គីតាប)

Jump to: Chapter 2 →

1នៅឆ្នាំទីពីរនៃរជ្ជកាលស្តេចដារី‌យូស នៅថ្ងៃទីមួយ ក្នុងខែទីប្រាំមួយ អុលឡោះ‌តាអាឡា មានបន្ទូលតាមរយៈណាពីហាកាយ មកកាន់លោកសូរ៉ូ‌បាបិល ជាកូនរបស់លោកសាល‌ធាល និងជាទេសា‌ភិបាលនៃអាណា‌ខេត្តយូដា ព្រមទាំងមូស្ទីយេសួរ ជាកូនរបស់លោកយ៉ូសា‌ដាក ដូចតទៅ:

2អុលឡោះ‌តាអាឡា ជាម្ចាស់នៃពិភពទាំងមូលមានបន្ទូលថា៖ «ប្រជា‌ជននេះពោលថា “មិនទាន់ដល់ពេលសង់ដំណាក់របស់ អុលឡោះ‌តាអាឡា ឡើងវិញទេ”»។

3ពេលនោះ អុលឡោះ‌តាអាឡា មានបន្ទូលមកពួកគេតាមរយៈណាពីហាកាយ ដូចតទៅ៖

4«ពេលដំណាក់របស់យើងបាក់បែកនៅឡើយ តើអ្នករាល់គ្នាគួររស់នៅក្នុងផ្ទះដែលតាក់‌តែង ដោយឈើដ៏មានតម្លៃដូច្នេះឬ?»។

5ឥឡូវនេះ អុលឡោះ‌តាអាឡា ជាម្ចាស់នៃពិភពទាំងមូល មានបន្ទូលថា៖ «ចូររិះ‌គិតអំពីសភាព‌ការណ៍របស់អ្នករាល់គ្នា!

6អ្នករាល់គ្នាសាបព្រោះច្រើន តែច្រូតបានផលតិច អ្នករាល់គ្នាបរិភោគ តែមិនចេះឆ្អែត អ្នករាល់គ្នាផឹកស្រា តែមិនចេះស្កប់ អ្នករាល់គ្នាស្លៀកពាក់ តែមិនកក់ក្ដៅ អ្នកធ្វើការទទួលប្រាក់ឈ្នួល តែដូចជាទុកនៅក្នុងថង់កណ្ដាច»។

7អុលឡោះ‌តាអាឡា ជាម្ចាស់នៃពិភពទាំងមូលមានបន្ទូលថា៖ «ចូររិះ‌គិតអំពីសភាព‌ការណ៍របស់អ្នករាល់គ្នា!

8ចូរនាំគ្នាឡើងទៅលើភ្នំ យកឈើមកសង់ដំណាក់របស់យើង។ យើងពេញចិត្តនឹងដំណាក់នេះ ហើយយើងនឹងបង្ហាញសិរី‌រុង‌រឿងរបស់យើង» នេះជាបន្ទូលរបស់ អុលឡោះ‌តាអាឡា ។

9«អ្នករាល់គ្នាប្រាថ្នាចង់បានផលច្រើន តែអ្នករាល់គ្នាទទួលបានតិច។ អ្នករាល់គ្នាយកផលនោះមកដាក់ក្នុងផ្ទះ តែយើងបានផ្លុំបំបាត់អស់ទៅ។ ហេតុអ្វីបានជាដូច្នេះ? គឺមកពីដំណាក់របស់យើងបាក់បែកនៅឡើយ ហើយអ្នករាល់គ្នាគិតតែខ្នះ‌ខ្នែង ពីរឿងផ្ទះសំបែងរបស់ខ្លួន - នេះជាបន្ទូលរបស់ អុលឡោះ‌តាអាឡា ជាម្ចាស់ នៃពិភពទាំងមូល។

10ហេតុនេះហើយបានជាមេឃទប់មិនឲ្យ មានភ្លៀងធ្លាក់ ដីក៏មិនផ្ដល់ភោគ‌ផលឲ្យអ្នករាល់គ្នាដែរ។

11យើងនឹងធ្វើឲ្យកើតរាំងស្ងួត គ្មានភ្លៀងធ្លាក់នៅក្នុងស្រុក តាមភ្នំ លើស្រែ លើចម្ការទំពាំង‌បាយជូរ លើចម្ការអូលីវ លើដំណាំឯទៀតៗ លើមនុស្ស លើសត្វ។ ដូច្នេះ កិច្ចការទាំងអស់ដែលមនុស្សធ្វើ ឥតបង្កើតបានផលអ្វីឡើយ»។

12ណាពីហាកាយបាននាំយកបន្ទូលដែល អុលឡោះ‌តាអាឡា ថ្លែងមកកាន់គាត់ ទៅជម្រាបលោកសូរ៉ូ‌បាបិល ជាកូនរបស់លោកសាល‌ធាល និងមូស្ទីយេសួរ ជាកូនរបស់លោកយ៉ូសា‌ដាក ព្រមទាំងប្រជា‌ជនទាំងប៉ុន្មានដែលនៅសេស‌សល់។ ពួកគេស្ដាប់សេចក្ដីដែល អុលឡោះ‌តាអាឡា ជាម្ចាស់របស់ពួកគេ មានបន្ទូលតាមរយៈណាពីហាកាយ ហើយកោតខ្លាច អុលឡោះ‌តាអាឡា ។

13ហាកាយ ដែល អុលឡោះ‌តាអាឡា ចាត់ឲ្យមកមានប្រសាសន៍ទៅកាន់ប្រជា‌ជន តាមបន្ទូលរបស់ អុលឡោះ‌តាអាឡា ។ ទ្រង់មានបន្ទូលថា៖ «យើងស្ថិតនៅជាមួយអ្នករាល់គ្នា» - នេះជាបន្ទូលរបស់ អុលឡោះ‌តាអាឡា ។

14អុលឡោះ‌តាអាឡា ដាស់ស្មារតីលោកសូរ៉ូ‌បាបិល ជាកូនរបស់លោកសាល‌ធាល និងជាទេសា‌ភិបាលរបស់អាណា‌ខេត្តយូដា ព្រមទាំងមូស្ទីយេសួរ ជាកូនរបស់លោកយ៉ូសា‌ដាក ហើយទ្រង់ក៏ដាស់ស្មារតីរបស់ប្រជា‌ជនដែលនៅសេស‌សល់ដែរ។ ពួកគេនាំគ្នាមក ហើយចាប់ផ្ដើមសង់ ដំណាក់របស់ អុលឡោះ‌តាអាឡា ជាម្ចាស់នៃពិភពទាំងមូល ជាម្ចាស់របស់ពួកគេ

15នៅថ្ងៃទីម្ភៃបួន ខែទីប្រាំមួយ ក្នុងឆ្នាំទីពីរនៃរជ្ជកាលស្តេចដារី‌យូស។

Jump to: Chapter 2 →