2 Chronicles 13

Khmer BFBS (ព្រះគម្ពីរបរិសុទ្ធ ១៩៥៤)

← Chapter 12 Jump to: Chapter 14 →

1នៅឆ្នាំទី១៨ ក្នុងរាជ្យស្តេចយេរ៉ូ‌បោម នោះអ័ប៊ីយ៉ាចាប់តាំងសោយ‌រាជ្យឡើងលើស្រុកយូដា

2ទ្រង់ក៏សោយ‌រាជ្យ៣ឆ្នាំ នៅក្រុងយេរូ‌សាឡិម ព្រះ‌មាតាទ្រង់ព្រះ‌នាមជាមីកាយ៉ា ជាបុត្រីអ៊ូរាល អ្នកក្រុងគីបៀរ អ័ប៊ីយ៉ា នឹងយេរ៉ូ‌បោមក៏ច្បាំងគ្នាដែរ

3ឯអ័ប៊ីយ៉ាទ្រង់ចាប់តាំងតចំបាំង មានពល‌ទ័ពសុទ្ធតែមនុស្សថ្នឹកចំបាំង ហើយជ្រើស‌រើស មានចិត្តក្លាហានចំនួន៤សែននាក់ ហើយយេរ៉ូ‌បោមក៏ដំរៀបទ័ពច្បាំងនឹងទ្រង់ មានមនុស្សជ្រើស‌រើស ហើយក្លាហាន៨សែននាក់

4ឯអ័ប៊ីយ៉ាទ្រង់ឈរនៅលើភ្នំសេម៉ា‌រែម ដែលនៅស្រុកភ្នំអេប្រា‌អិម មានបន្ទូលថា ឱយេរ៉ូ‌បោមនឹងពួកអ៊ីស្រាអែលទាំងអស់គ្នាអើយ ចូរស្តាប់ចុះ

5គួរឲ្យឯងរាល់គ្នាដឹងថា ព្រះ‌យេហូវ៉ា ជាព្រះនៃសាសន៍អ៊ីស្រាអែល បានប្រទានអំណាចលើសាសន៍អ៊ីស្រាអែលដល់ដាវីឌ ឲ្យសោយ‌រាជ្យជាដរាបទៅ គឺដល់ទ្រង់នឹងវង្សា‌នុវង្សរបស់ទ្រង់តទៅ តាមសេចក្ដីសញ្ញាដែលតាំងដោយអំបិល

6ប៉ុន្តែយេរ៉ូ‌បោម ជាកូននេបាត ដែលជាអ្នកបំរើរបស់សាឡូម៉ូន បុត្រាដាវីឌ វាបានលើកខ្លួនឡើងបះ‌បោរនឹងចៅហ្វាយរបស់ខ្លួន

7ហើយមានមនុស្សជាអសារឥតការ នឹងមនុស្សចោល‌ម្សៀត បានរួមគ្នាជាមួយនឹងវា ចំរើនកំឡាំងឡើងទាស់នឹងរេហូ‌បោម ជាបុត្រាសាឡូម៉ូន ក្នុងកាលដែលរេហូ‌បោមនៅខ្ចីគំនិត ហើយចិត្តទន់ មិនអាចទប់នឹងគេបានឡើយ

8ឥឡូវនេះ ឯងរាល់គ្នាគិតតតាំង នឹងនគររបស់ព្រះ‌យេហូវ៉ា ដែលនៅក្នុងអំណាចកូនចៅដាវីឌទៀត ឯងរាល់គ្នាមានគ្នាសន្ធឹកណាស់ ហើយកូនគោមាស ដែលយេរ៉ូ‌បោមបានធ្វើទុកជាព្រះរបស់ឯង ក៏នៅជាមួយនឹងឯងដែរ

9តើឯងរាល់គ្នាមិនបានបណ្តេញពួកសង្ឃផងព្រះ‌យេហូវ៉ា គឺជាពួកកូនចៅអើរ៉ុន នឹងពួកលេវីចេញ ហើយបានតាំងពួកអ្នកដទៃឲ្យធ្វើជាពួកសង្ឃ តាមរបៀបអស់ទាំងសាសន៍ដទៃទេឬអី ដល់ម៉្លេះបានជាអ្នកណាក៏ដោយ ដែលយកគោស្ទាវ នឹងចៀមឈ្មោល៧មកចង់បំបួសខ្លួន នោះនឹងបានធ្វើជាសង្ឃដល់ព្រះទាំងនោះ ដែលមិនមែនជាព្រះទេក៏បាន

10តែខាងឯយើងរាល់គ្នាវិញ គឺព្រះ‌យេហូវ៉ាទ្រង់ជាព្រះនៃយើង យើងរាល់គ្នាមិនបានបោះ‌បង់ចោលទ្រង់ទេ យើងមានពួកសង្ឃជាពួកកូនចៅអើរ៉ុន នឹងពួកលេវីដែលធ្វើការ‌ងារថ្វាយព្រះ‌យេហូវ៉ាវិញ

11រាល់តែព្រឹកល្ងាច គេតែងដុតដង្វាយដុត នឹងគ្រឿងក្រអូបថ្វាយព្រះ‌យេហូវ៉ាជានិច្ច ក៏រៀបនំបុ័ងតាំងទុកដាក់លើតុបរិសុទ្ធ ព្រមទាំងថែជើងចង្កៀងមាស នឹងចង្កៀងទាំងប៉ុន្មាន ដែលសំរាប់ដុតរាល់តែល្ងាច ដ្បិតយើងរាល់គ្នារក្សាបញ្ញើរបស់ព្រះ‌យេហូវ៉ា ជាព្រះនៃយើង តែឯឯងរាល់គ្នា បានបោះ‌បង់ចោលទ្រង់វិញ

12ហើយមើល ព្រះ‌ទ្រង់គង់ជាមួយ ក៏ជាអ្នកនាំមុខយើង ពួកសង្ឃរបស់ទ្រង់ក៏កាន់ត្រែ សំរាប់នឹងផ្លុំឲ្យស្លន់ឡើងទាស់នឹងឯងរាល់គ្នា ឱពួកកូនចៅអ៊ីស្រាអែលអើយ កុំឲ្យច្បាំងនឹងព្រះ‌យេហូវ៉ា ជាព្រះនៃពួកឰយុកោឯងរាល់គ្នាឡើយ ពីព្រោះឯងរាល់គ្នានឹងមិនចំរើនទេ។

13តែឯយេរ៉ូ‌បោមទ្រង់ចាត់ពួកទ័ពបង្កប់ ឲ្យវាងទៅខាងក្រោយ ដូច្នេះ មានពួកគេនៅពីខាងមុខ នឹងពួកទ័ពបង្កប់នៅពីខាងក្រោយនៃពួកយូដា

14កាលពួកយូដាបានក្រឡេកបែរមើលទៅក្រោយ នោះក៏ឃើញមានចំបាំងពីមុខពីក្រោយដូច្នេះ គេក៏អំពាវ‌នាវដល់ព្រះ‌យេហូវ៉ា ហើយពួកសង្ឃក៏ផ្លុំត្រែឡើង

15ពួកទ័ពយូដា គេស្រែកឡើង ហើយកំពុងដែលពួកយូដាស្រែកឡើងដូច្នោះ នោះព្រះ‌ទ្រង់ក៏វាយយេរ៉ូ‌បោម នឹងពួកអ៊ីស្រាអែលទាំងអស់ នៅមុខអ័ប៊ីយ៉ា នឹងពួកយូដា

16ពួកកូនចៅអ៊ីស្រាអែល គេបាក់ទ័ពរត់ពីមុខពួកយូដា ហើយព្រះ‌ទ្រង់ប្រគល់គេមកក្នុងកណ្តាប់ដៃនៃពួកយូដា

17អ័ប៊ីយ៉ា នឹងពួកទ័ពទ្រង់ ក៏ប្រហារសំឡាប់គេយ៉ាងសំបើម មានពួកអ៊ីស្រាអែល សុទ្ធតែជាមនុស្សជ្រើស‌រើស បានដួលស្លាប់អស់៥សែននាក់

18នៅវេលានោះពួកកូនចៅអ៊ីស្រាអែលត្រូវក្រាបចុះ ឯពួកកូនចៅយូដា គេមានជ័យ‌ជំនះ ដោយព្រោះគេបានពឹងដល់ព្រះ‌យេហូវ៉ា ជាព្រះនៃពួកឰយុកោគេ

19អ័ប៊ីយ៉ាទ្រង់ដេញតាមយេរ៉ូ‌បោម ដណ្តើមយកបានទីក្រុងខ្លះរបស់ទ្រង់ គឺក្រុងបេត-អែល នឹងតំបន់នៅជុំវិញ ក្រុងយេសាណា នឹងតំបន់នៅជុំវិញ នឹងក្រុងអេប្រុន ព្រមទាំងតំបន់នៅជុំវិញដែរ

20ហើយនៅក្នុងរាជ្យអ័ប៊ីយ៉ា នោះយេរ៉ូ‌បោមមិនបានចំរើនកំឡាំងឡើងវិញទៀតឡើយ រួចព្រះ‌យេហូវ៉ាប្រហារទ្រង់ឲ្យសុគតទៅ

21ឯអ័ប៊ីយ៉ាទ្រង់មានអំណាចកាន់តែខ្លាំងឡើង ទ្រង់យកភរិយា១៤ ហើយបង្កើតបានបុត្រា២២អង្គ នឹងបុត្រី១៦អង្គ

22រីឯដំណើរឯទៀតពីអ័ប៊ីយ៉ា ហើយពីការរបស់ទ្រង់ នឹងព្រះ‌បន្ទូលនៃទ្រង់ នោះសុទ្ធតែបានកត់ទុកក្នុងសៀវភៅបរិយាយនៃហោរាអ៊ីដោហើយ។

← Chapter 12 Jump to: Chapter 14 →