Exodus 35

Krio (Krio Fɔs Oli Baybul)

← Chapter 34 Jump to: Chapter 36 →

1Mozis gɛda ɔl di Izrɛlayt dɛn ɛn tɛl dɛn se, “Dis na wetin PAPA GƆD dɔn gi ɔda se una fɔ du.” I se,

2“Una gɛt siks de na di wik fɔ wok bɔt di de we mek sɛvin fɔ kip am oli ɛn kwayɛt to PAPA GƆD. Ɛnibɔdi we wok da de de dɛn fɔ kil am.

3Una nɔ fɔ ivin mek faya sɛf da de de we na fɔ pre ɛn blo.”

4Mozis tɛl ɔl di Izrɛlayt dɛn se, dis na ɔda we PAPA GƆD gi.

5“Una fɔ gi sɔntin to PAPA GƆD. Udat gɛt fri an we want fɔ gi fɔ briŋ gold, silva ɛn bras,

6fayn linin matirial, blu, pɔpul ɛn rɛd wul matirial we dɛn tek got ia mek,

7rɛd ship kanda; fayn lɛda ɛn akeshia bod;

8ɔyl fɔ lamp; difrɛn kayn spays dɛn we gɛt fayn sɛnt fɔ mek ɔyl fɔ anɔynt ɛn fɔ mek insɛns,

9ɔniks ston ɛn ɔda dia tiŋs dɛn fɔ mek ifɔd ɛn di pawch we di edman fɔ dɛn man we de mek sakrifays fɔ pipul sin de wɛr.

10Mozis tɛl di pipul dɛn se ɔl dɛn wan dɛn we gɛt skil fɔ mek sɔntin fɔ mit am fɔ lɛ dɛn go mek ɔl wetin PAPA GƆD dɔn se dɛn fɔ mek.

11Di tin dɛn fɔ mek na di Tɛnt ɛn ɔl wetin de pan am, di uk dɛn, di frem dɛn, di pila dɛn, di ba dɛn wit dɛn bes;

12di Kɔvinant bɔks wit in pol dɛn in kɔba ɛn in klos fɔ kɔba am;

13di tebul wit in pol dɛn ɛn ɔl di ɔda tin dɛn we de de pan am; di bred we dɛn fɔ ɔfa to PAPA GƆD;

14di stand we de lamp di de pan fɔ sho layt wit ɔl di ɔda tin dɛn ɛn di lamp dɛn; wit di ɔyl fɔ di lamp;

15di ɔlta fɔ bɔn insɛns wit in pol dɛn ɛn di ɔyl fɔ anɔynt wit dɛn fayn insɛns, di klos fɔ di domɔt ɛn di Tɛnt;

16di ɔlta fɔ bɔn sakrifays wit in bras gretin, in pol dɛn wit ɔl wetin fɔ de pan am, di bol ɛn di bes;

17di ɔda klos dɛn na di Tɛnt wit in pila ɛn in bes dɛn, ɛn di skrin fɔ di kɔt in get;

18di tabanakul in pɛg dɛn, wit di kɔt in yon pɛg dɛn ɛn dɛn kɔd;

19di fayn gawn dɛn fɔ di man dɛn we de mek sakrifays fɔ pipul sin fɔ de sav na di oli ples, di oli gawn fɔ Erɔn we na di edman fɔ di man dɛn we de mek sakrifays fɔ pipul sin ɛn in bɔypikin dɛn.

20Ɔl di Izrɛlayt dɛn lɛf Mozis go.

21Dɔn dɛn ɔl briŋ difrɛn difrɛn tiŋs dɛn fɔ bil di Tɛnt we PAPA GƆD go de. Ɔlman gi wetin in at tɛl am fɔ gi ɛn matirial fɔ mek di man dɛn we de mek sakrifays fɔ pipul sin dɛn gawn.

22Man ɛn uman dɛn ɔl briŋ gold tiŋs dɛn we dɛn de wɛr lɛkɛ broch, yerin, riŋ, chen ɛn ɔl kayn gold as dɛn ɔfrin to PAPA GƆD.

23Ɔl dɛn wan dɛn we gɛt dɛn fayn linin matirial lɛkɛ blu, pɔpul, rɛd wul, got ia klos, rɛd ship kanda ɛn dɛn fayn lɛda briŋ dɛn kam.

24Dɛn wan dɛnsɛf we sabi mek bras ɛn silva briŋ dɛn yon kam. Dɛn wan we gɛt akeshia bod sɛf briŋ dɛn kam.

25Dɛn uman dɛnsɛf we sabi mek tred briŋ wetin dɛn dɔn mek lɛkɛ blu, pɔpul ɛn rɛd wul,

26ɛn trɛd we dɛn tek got ia mek.

27Di edman dɛn, dɛn briŋ miniral dɛn lɛkɛ ɔniks ston ɛn ɔda ston dɛn fɔ dɛkɔret di ifɔd ɛn di pawch,

28wit spays ɛn ɔyl fɔ di lamp, ɔyl fɔ anɔynt ɛn dɛn insɛns we gɛt fayn sɛnt.

29Ɔl di Izrɛlayt dɛn, man o, uman o, dɛn ɔl briŋ sɔntin to PAPA GƆD fɔ di wok we i dɔn gi Mozis fɔ du.

30Mozis tɛl di Izrɛlayt dɛn se, PAPA GƆD dɔn pik Bɛzalɛl, dat na Yuri in bɔypikin we sɛf na Ɔ in grampikin we kɔmɔt na Juda fambul.

31I se PAPA GƆD dɔn gi am in pawa wit sɛns ɛn skil fɔ du ɔlkayn bildin wok,

32lɛkɛ fɔ dizayn, fɔ drɔ ɛn fɔ mek gold, silva ɛn bras tiŋs dɛn,

33fɔ kav wud ɛn fɔ yuz skil mek ɛnitin.

34I se PAPA GƆD dɔn gi Bɛzalɛl ɛn Oolayab we insɛf na Aisamak in bɔypikin we na Dan fambul i kɔmɔt di sɛns fɔ lan pipul ɔl dɛn skil ya.

35I se i dɔn gi dɛn di sɛns fɔ mek ɔlkayn tin dɛn lɛkɛ aw man kin yuz in an fɔ dizayn matirial. Dɛn kin yuz blu, pɔpul, rɛd wul ɛn ɔda matirial. I se dɛn sabi mek ɔlkayn tin.

← Chapter 34 Jump to: Chapter 36 →

Recommended Reading

Commentary Exodus Commentaries → Devotional Exodus Devotional Guide → Get This Bible Krio (Krio Fɔs Oli Baybul) Study Bible →