Leviticus 25 — Krio (Krio Fɔs Oli Baybul)

1We Mozis de na Mawnt Saynay nain PAPA GƆD se,

2mek i tɛl di Izrɛlayt dɛn se, wɛn dɛn rich na di land we i de gi dɛn, dɛn nɔ fɔ plant natin di ia we mek sɛvin fɔ mek dɛn go blo ɛn rɛspɛkt PAPA GƆD.

3I se na siks ia dɛn fɔ de wok na dɛn fam dɛn. Dɛn kin plant de ɛn avɛst wetin dɛn plant;

4bɔt insay di ia we mek sɛvin, dɛn fɔ blo ɛn de gɛda fɔ wɔship PAPA GƆD, na tɛm fɔ PAPA GƆD; dɛn kin plant de ɛn avɛst wetin dɛn plant.

5If tin gro fɔ insɛf, nɔ fɔ pik am we dɛn de avɛst, ɛn if dɛn nɔ bin gɛt tɛm fɔ gɛda dɛn greps, dɛn fɔ jɛs lɛf am so; na ia we di land fɔ blo.

6I se pan ɔl we dɛn nɔ go gɛt fɔ de plant ɔ avɛst, dɛn go gɛt tin fɔ it, fɔ dɛnsɛf, dɛn man ɛn uman slev dɛn ɛn fɔ ivin dɛn wokman wit ɛni trenja we tap wit dɛn;

7di animal dɛn we dɛn de mɛn na os wit di wayl animal dɛn, ɔl go gɛt it fɔ it.

8I se fɔ wet fɔ fɔti-nayn ia, dat na we dɛn de kɔnt sɛvin ia sɛvin tɛm.

9Di tɛn de insay di mɔnt we mek sɛvin na da fɔti-nayn ia de, dat na di Big De Fɔ Fɔgiv Sin, fɔ mek pipul go rawnd ɛn blo ɔn.

10Na so dɛn go tek fɔ mek ɔlman no se da de de na oli de we fɔ fri ɔltin dat na fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak.

11Na spɛshal ia we nɔ fɔ plant natin ɛn nɔ fɔ ivin pik wetin gro fɔ insɛf, dɔn if greps de na tik we yu nɔ bin dɔn pik nɔ fɔ bɔda fɔ pik am.

12Di wanol ia oli, na di ia dat we dɛn put wan say fɔ PAPA GƆD; na fɔ it wetin kɔmɔt na dɛn fam dɛn.

13I se na ia we fɔ fri ɔltin dat na fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak.

14Ɛn if pɔsin sɛl ɔ bay land nain kɔmpin in an, i nɔ fɔ rog in kɔmpin.

15Di prayz fɔ bi wetin pɔsin no se di ɔda pɔsin go pul bifo di ɔda ia we fɔ fri ɔltin dat na fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak kam igen

16If di tɛm we lɛf pan di ia bɔku, di prayz fɔ bɔku bɔt if di ia dɔn go fa, nɔ fɔ inchaj bɔku bikɔs na wetin di land gɛt fɔ pul di pɔsin de sɛl.

17Nɔbɔdi nɔ fɔ rog in kɔmpin bɔt fɔ fred dɛn PAPA GƆD; bikɔs nain na PAPA GƆD we na dɛn GƆD.

18I se, dɛn fɔ du ɔl wetin i tɛl dɛn fɔ du as na dat go mek natin nɔ ambɔg dɛn.

19Di land go gi dɛn plɛnti tin fɔ it ɛn dɛn go satisfay wit wetin dɛn ebul pul de; ɛn dat go mek natin nɔ ambɔg dɛn.

20Bɔt if dɛn bigin wɔndrin bɔt wetin dɛn go it, da ia we mek sɛvin we dɛn nɔ go de plant ɔ avɛst,

21PAPA GƆD se, in go mek di it we dɛn go gɛda di ia we mek siks so bɔku dat dɛn go ebul fɔ kip am fɔ tri mɔ ia.

22Ivin we dɛn go ebul plant di ia we mek et, dɛn nɔ go gɛt wetin dɛn plant da ia de fɔ it te di ia we mek nayn; na wetin dɛn bin kip di ia we mek siks nain dɛn go gɛt fɔ de it.

23Nɔ fɔ sɛl pan di land lɛkɛ se dɛn nɔ gɛt fɔ gɛt am bak, bikɔs na PAPA GƆD gɛt di land bay rayt; dɛn na trenja ɛn tɛnant dɛn nɔmɔ.

24Na di wanol land, fɔ gri mek di pɔsin we bin sɛl di land fɔ bay am bak.

25Fɔ gri mek ɛni pan dɛn kɔmpin we sɛl in prɔpati bikɔs po mit am in klos fambul bay di prɔpati bak.

26If i nɔ gɛt fambul we go bay am bak, insɛf fɔ tray fɛn di mɔni fɔ bay am bak.

27I fɔ kɔnt ɔmɔs dɛn dɔn pul na di land ɛn maynɔs dat frɔm wetin i bin sɛl am fɔ ɛn pe di balans mɔni, so dat i go gɛt in prɔpati bak.

28Bɔt if i stil nɔ mitɔp fɔ bay am insɛf, dɛn di pɔsin we bin bay di prɔpati fɔ kip am te di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak; so di man go ebul go nain prɔpati.

29If na wanol os we fɔ tap ɛn we de na siti we gɛt get pɔsin sɛl, wans i dɔn tek wan ia afta i sɛl am, i kin bay am bak. Nainsay da ia de nɔmɔ i gɛt di rayt fɔ bay am bak.

30If i nɔ bay am bak insay da wan ia de, dɛn i nɔ go gɛt di os fɔ tap we de insay di siti we gɛt get bak. Na di pɔsin we bay am in jɛnareshɔn go gɛt da prɔpati de ɛn i nɔ go gi nɔbɔdi we di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak.

31Bɔt if di os fɔ tap de na wan pan dɛn vilej we nɔ gɛt wɔl, we kin tan lɛk na ɔlman yon, i sɛl, we di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak, kam, if i nɔ bay am bak, na fɔ gi am.

32Bɔt we i kam to di siti dɛn we di Livayt dɛn gɛt fɔ prɔpati, dɛn kin bay am bak ɛnitɛm we dɛn want.

33Ɛn if ɛniwan pan di Livayt dɛn nɔ bay di os fɔ tap bak, dɛn we di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak kam, na fɔ gi di Livayt di os we de na di siti wit get we dɛn sɛl bak, bikɔs na dɛn os dɛn de na di Livayt dɛn yon prɔpati pan di prɔpati dɛn we di Izrɛlayt dɛn bin gɛt.

34Bɔt nɔ fɔ sɛl dɛn land we de rawnd di siti dɛn; na di Livayt jɛnareshɔn nɔmɔ fɔ gɛt am.

35I se if tin traŋa fɔ dɛn brɔda te te i nɔ ebul fɔ du tin fɔ insɛf, dɛn fɔ mek shɔ se dɛn ɛp am. I go de wit dɛn lɛk trenja.

36If na mɔni dɛn lɛnt am, nɔ fɔ mek i pe bak wetin pas wetin i bin lɛnt, fɔ sho se dɛn de fred PAPA GƆD wans i tap wit dɛn.

37Nɔ fɔ lɛnt am mɔni ɛn se i fɔ pe intrɛst ɔ sɛl it gi am pas wetin i fɔ pe.

38I se nain na PAPA GƆD we na dɛn GƆD ɛn nain pul dɛn kɔmɔt pan slev layf na Ijipt fɔ gi dɛn di land we bay rayt nain yon ɛn fɔ mek i bi dɛn GƆD.

39I se, if, fɔseka di po we dɛn kɔmpin po, i sɛl insɛf as slev, nɔ fɔ mek i wok lɛk slev:

40i fɔ de wit di wan we gɛt lɛk pɔsin we i de pe ɔ lɛk trenja we tap nain os. I fɔ mek i wok fɔ am te di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak;

41da tɛm de, i fɔ mek di poman wit di pikin dɛn we i bɔn we i bin de de go bigin layf bak fɔ insɛf nain famili prɔpati.

42I se na dɛn ɔl i pul kɔmɔt pan slev layf na Ijipt so dɛn nɔ fɔ kam bi slev bak.

43Noto fɔ mek bɔs pan am bɔt fɔ biev lɛk udat de fred PAPA GƆD.

44We dɛn want man ɔ uman slev, na fɔ bay dɛn na dɛn ɔda neshɔn dɛn we de rawnd dɛn dɛn an.

45Dɛn kin ivin bay di fɔrina dɛn we tap wit dɛn ɛn dɛn pikin dɛn fɔ bi slev ɛn dɛn kin bi dɛn prɔpati.

46Dɛn kin gi dɛn pikin dɛn we bɔn leta di slev dɛn we dɛn bay fɔ bi dɛnsɛf yon prɔpati sote go; dɛn wan dɛn de kin bi di Izrɛlayt dɛn slev bɔt dɛn nɔ fɔ mek bɔs pan dɛn kɔmpin Izrɛlayt.

47I se, if di trenja ɛn fɔrina jɛntri ɛn wan Izrɛlayt we po go sɛl insɛf to am as slev,

48dɛn afta di trenja ɔ fɔrina dɔn bay am, wan pan in Izrɛlayt brɔda kin go bay am bak,

49i kin bi in ɔnkul, in kɔzin ɔ ɛni ɔda klos fambul; ɔ if i ebul leta ɔn, i kin pe fɔ fri insɛf.

50Di Izrɛlayt we sɛl insɛf fɔ bi slev fɔ kɔnt ɔmɔs dɛn bin fɔ pe am if na wok i bin de wok te di ia kam we na fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak; ɛn na dat i go pe fɔ fri insɛf.

51If di tɛm bifo di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak lɛf bɔku, i fɔ gi di man we bin bay am bak, sɔm pan di mɔni we i bin tek bay am.

52If di tɛm we lɛf bifo di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak nɔ bɛtɛ, na wetin i bin fɔ gi di wan we i de pe nɔmɔ, i go gɛt fɔ gi am bak.

53Di trenja ɔ fɔrina fɔ trit di Izrɛlayt slev lɛk udat i de pe; i nɔ fɔ mek bɔs pan am.

54If in ɔ in fambul dɛn nɔn nɔ ebul bay am bak, na we di ia we fɔ fri di wan we na slev ɛn fɔ gi dɛn land we dɛn bin dɔn tek na dɛn an dɛn bak kam, na dat tɛm de fɔ fri in ɛn in pikin dɛn.

55Bikɔs di Izrɛlayt dɛn na PAPA GƆD in slev, slev dɛn we i pul kɔmɔt pan slev layf na Ijipt: I se nain na PAPA GƆD we na dɛn GƆD.