Psalms 44

Krio (Krio Fɔs Oli Baybul)

← Chapter 43 Jump to: Chapter 45 →

1PAPA GƆD, wi dɔn yɛri fɔ wisɛf; wi fɔstɛm pipul dɔn tɛl wi wetin yu bin du fɔ dɛn dɛn yon tɛm.

2Bay yu pawa, yu drɛb ɔl dɛn neshɔn we bin tap na Kenan, dɛn pipul we bin de wɔship lay lay gɔd; ɛn mek wi papa dɛn sidɔm fayn wan na dɛn ples bɔt yu pɔnish di ɔda neshɔn dɛn.

3Noto di tin dɛn we dɛn gɛt fɔ fɛt ɔ di fɛt we dɛn fɛt sɛf mek dɛn gɛt di land; na bikɔs yu bin de wit dɛn ɛn bikɔs yu lɛk dɛn.

4Yu na mi PAPA GƆD ɛn kiŋ, we dɔn se yu go gi viktri to Jekɔb in pipul ɔltɛm.

5Na bay yu pawa wi de ebul win wi ɛnimi dɛn; na bay yu pawa we de ivin ebul tinap na dɛn ed.

6Noto mi wɛpɔn dɛn a abop pan we a de fɛt, dɛn nɔn nɔ ebul mek a win;

7na bikɔs yu pawaful mek wi de win, yu de mek wi ɛnimi dɛn rɔnawe wit shem ɛn disgres.

8Wi go bost ol de bɔt wetin PAPA GƆD dɔn du ɛn wi go prez in nem sote go.

9Naw yu dɔn lɛf wi to wisɛf ɛn disgres wi; yu nɔ ivin de de wit wi sojaman dɛn we dɛn de go fɛt igen

10Yu mek wi rɔn pan wi ɛnimi dɛn, ɛn mek wi ɛnimi dɛn tek wi tin dɛn na wi an.

11Yu de mek dɛn kil wi lɛkɛ aw dɛn de kil ship. Wi skata ɔlɔbɔt.

12Yu sɛl wi to wi ɛnimi dɛn pan ɔl we i nɔ gɛt fɔ bɛnifit yu fɔ natin.

13Di ɔda trayb dɛn we liv rawnd wi nɔ rɛspɛkt wi igen Yu dɔn mek dɛn de provok wi ɛn nɔ luk wi wit ɛni bɛtɛ yay.

14Yu dɔn gi pipul na ɔda kɔntri dɛn tɔk fɔ tɔk; we dɛn de pas, na shumɔ nɔmɔ dɛn de shumɔ pan wi.

15Di shem ɛn disgres we de mit mi nɔ gud fɔ tɔk

16a nɔ ebul waka ɛn es mi ed ɔp bikɔs di provok so bɔku ɛn mi ɛnimi dɛn de gladi pan dat.

17Wi nɔ fɔgɛt yu ɛn wi nɔ brok yu Kɔvinant yet pan ɔl we dɛn kayn tin ya de bi to wi.

18Wi nɔ chenj wi maynd bɔt yu yet ɛn wi nɔ go disobe yu.

19Yu dɔn lɛf wi mek wayl animal atak wi ɛn lɛf wi fɔ day.

20If wi bin lɛf di tru PAPA GƆD go wɔship lay lay gɔd lɛk dɛn ɔda neshɔn,

21PAPA GƆD bin fɔ no. I no wetin de na wi at.

22Bikɔs wi nɔ kɔmɔt biɛn yu, na dat mek dɛn de kil wi so; wi fiba ship dɛn we dɛn dɔn kɛr go fɔ kil.

23PAPA GƆD wek nɔ, yu de mek lɛkɛ udat de slip. Grap. Tinap fɔ wi! Nɔ lɛf wi to wisɛf. Du sɔntin fɔ pul wi kɔmɔt na wi ɛnimi dɛn an.

24Wetin mek yu de gi wi dɛfyes? Nɔ mek se yu nɔ de si aw wi de sɔfa.

25Dɛn dɔn ib wi dɔŋ wi nɔ ebul grap igen

26Kam lɛ yu kam ɛp wi bikɔs di lɔv we yu gɛt fɔ wi na di sem.

← Chapter 43 Jump to: Chapter 45 →

Recommended Reading

Commentary Psalms Commentaries → Devotional Psalms Devotional Guide → Get This Bible Krio (Krio Fɔs Oli Baybul) Study Bible →