Song of Solomon 1

Krio (Krio Fɔs Oli Baybul)

Jump to: Chapter 2 →

1Di Siŋ we pas Ɔl Siŋ we Sɔlɔmɔn rayt.

2If nɔmɔ yu kin kis mi wit ɔl di kis dɛn na yu mɔt; Bikɔs yu lɔv swit pas wayn.

3Yu sɛnt dɛn we yu de rɔb, gɛt swit smɛl; yu nem na lɛk we dɛn tɔn sɛnt; na dat mek di yɔŋ gyal dɛn lɛk yu.

4Drɔ mi biɛn yu, lɛ wi mekes Di kiŋ dɔn briŋ mi kam insay in rum. Wi go gladi ɛn gladi pan yu wi go prez yu lɔv pas wayn dɛn nɔ mis we dɛn lɛk yu.

5A blak o, bɔt a fayn, Jerusɛlɛm in gyal pikin dɛn, A blak lɛk Kida tɛnt lɛk Sɔlɔmɔn in winda blaynd dɛn.

6Una nɔ wach mi bikɔs a blak o bikɔs san dɔn bɔn mi Mi mama in bɔypikin dɛn vɛks pan mi, dɛn mek mi edman fɔ di greps gadin dɛn, bɔt mi yon greps gadin a nɔ luk kam!

7Tɛl mi, yu we mi sol lɛk, usay yu de fid yu ship dɛn, usay yu de mek dɛn lidɔm santɛm; a nɔ si wetin mek a fɔ tan lɛk udat de waka waka nia yu kɔmpin dɛn ship dɛn.

8If yu nɔ sabi Uman we fayn pas ɔl uman, fala di ship dɛn mak ɛn fid yu yɔŋ got dɛn nia di shɛpad dɛn tɛnt dɛn.

9Mi lɔv, a de si yu lɛk uman ɔs pan Fero in chariɔt dɛn.

10Yu jɔ dɛn fayn wit trinkɛt, yu nɛk wit dɛn pal bid.

11Wi go mek gold trinkɛt fɔ yu, dɛn go dɔt dɔt am wit silva.

12Wɛn di kiŋ de nain kawch mi pafyum skata fayn sɛnt.

13Mi bilɔvɛd tan to mi lɛk wan bag sɛnt we lidɔm midul mi bɔbi dɛn.

14Mi bilɔvɛd to mi na lɛk wan bɔnch rɛd flawa we de bɔs na di greps gadin dɛn we de Ɛngɛday.

15Bo yu fayn o mi lɔv; bo yu fayn; yu yay dɛn tan lɛk dɔv yay.

16Luk we yu fayn, mi man we a lɛk fɔ tru, yu fayn fɔ luk. Wi kawch na grin kawch.

17Di tik dɛn we ol wi ruf, na Sida tik, wi rafta dɛn na Payn tik.

Jump to: Chapter 2 →