Song of Solomon 3

Krio (Krio Fɔs Oli Baybul)

← Chapter 2 Jump to: Chapter 4 →

1Na mi bed na nɛt, A luk fɔ am am, di wan we mi sol lɛk; A sach fɔ am, bɔt a nɔ fɛn am; A kɔl am, bɔt i nɔ ansa.

2“A go grap naw ɛn go na di siti, insay di trit dɛn ɛn dɛn opin ples; A go luk fɔ di wan we mi sol lɛk.” A luk fɔ am, bɔt a nɔ fɛn am.

3Dɛn wachman dɛn si mi we dɛn de patrol na di siti. “Duya, una si di wan we mi sol lɛk?”

4I nɔ te sɛf we a pas dɛn, nain a fɛn di wan we mi sol lɛk. A ol am, a nɔ gri lɛf am te a briŋ am kam nan mi mama in os, ɛn insay di wan we bɔn mi in rum.

5Duya o, Jerusɛlɛm in gyal pikin dɛn, a tek di fritambo ɔ uman dia we de na bush beg una, una nɔ provok ɔ wek lɔv, te in tɛm rich.

6Wetin dat de kɔmɔt na di dɛzat lɛk smok, lɛkɛ pila, pafyum ɛn frankinsɛns smɛl pan am, wit ɔl dɛn fayn sɛnt pawda we dɛn treda de sɛl.

7Na Sɔlɔmɔn dɛn tot nain tron! Na siksti trɛnk man dɛn pan di sojaman dɛn na Izrɛl.

8Dɛn ɔl gɛt sɔd na dɛn wes Dɛn ɔl na masta sabi man dɛn pan wa ɔlman gɛt in sɔd nain lɛg fɔ ɛnitin we go apin na nɛt.

9Sɔlɔmɔn mek in tron we i de tek waka wit dɛn wud we kɔmɔt Libanɔn.

10Di pol dɛn le wit silva Di bak na gold, di sit na pɔpul; dɛn wok am fayn insay; na Jerusɛlɛm in gyal pikin dɛn du am.

11Una go, Zayɔn in gyal pikin dɛn, ɛn luk Kiŋ Sɔlɔmɔn, Wit di krawn we in mama krawn am di de we i mared, di de we in at gladi.

← Chapter 2 Jump to: Chapter 4 →