Matthew 27

Kurukh (पुना गच्छरना NT (BSI))

1बिज्‍जा गनेम लॆम ओर्मा मुध नैगर अरा सेयान आलर भेंट मंजर ती येसुसिन पिटत'आ गे सलहा नं‍जर।

2फिन आर येसुसिन हॆंचर अरा आसिन होच्‍चर ती ‍यूदेया ही रोमी राजीख़ापुस पिलातुसी ख़ेक्खा नू चिच्‍चर।

3येसुसिन धरत'आ गे संगे नंजका यूदस अक्‍खस का येसुस पिटा गे गुन्‍हा ठेकाबातारस ख़ने, आस पस्‍तारस ती अब़डा तीस गोटंग चाँदी ढिबन मुध नैगर अरा सेयान आलर गुसन किर्ताचस ओन्‍द्रस।

4अरा बाचस, “आ बिगर गुन्हा नेम्‍हा उजगो आलासिन पिटा गे धरताचकन ती पाप नंजकादन।” अबड़र बाचर, “अदगे एमा एन्‍देर? नीनिम अदही हदा र'अदय।”

5औंगे आस अबड़ा ढिबन धर्मेसी मन्दिर नू हिबिड़यस ती किर्रिम बिच्‍चियस, अरा केरस ती टंगरस केच्‍चस।

6मुध नैगर अबड़ा ढिबन होच्‍चर ती बाचर, “इबड़न भंडार नू सजना नॆग ही बिड़दो र'ई, एन्‍देरका ईद ख़ॆंस ही दाम हवे।”

7औंगे आर सलहा मंजर ती नन-राजियारिन माड़ा गे अबड़ा ढिबा ती कुम्‍हरासी ख़ल्‍लन ख़िन्‍दियर।

8ई चड्डे आद इन्ना गूटी ख़ॆंस ही ख़ल्‍ल बार'ई।

9ख़ने एका कत्‍था धर्मेसी कत्‍था तिंगू येरेमियास ती बारकी रहचा आद मंजा, “इस्राऎल आलर आसी म‍इय्‍याँ ई दामन ओकताचकाचर आर आ तीस चाँदी ढिबन होच्‍चर,

10अरा उर्बस एकासे एंगन पॆसकाचस अन्नेम आर अबड़ा तीस गोटंग ढिबा ती कुम्‍हरासी ख़ल्‍लन ख़िन्‍दियर।”

11अक्‍कु येसुस राजीख़ापू पिलातुसी मुन्‍दहारे इज्‍जकाचस, अरा पिलातुस आसिन मेंजस, “नीन यहूदीर ही बॆलय का?” येसुस किर्त'अर बाचस, “नीन ब'अदय अन्ने दिम हवे।”

12लिकिन मुध नैगर अरा सेयान आलर आसी म‍इय्‍याँ दोस ठे‍का ब'आलियर ख़ने, आस एन्‍देर हूँ किर्त'अर मल बाचस।

13ख़ने पिलातुस आसिन बाचस, “एन्‍देर नीन मल मेन्‍दय, ईर निंग्‍है बिड़दो नू ऎ बग्‍गे गोवाह चि'आलनर?”

14लिकिन आस आसिन ओन्‍टा कत्‍थन हूँ किर्त'अर मल बाचस, ईद ती पिलातुस गे कोड़हे अकबक मंजा।

15राजीख़ापुस चाँनुम कट्टना परब ही उल्‍ला नू ओन्‍टा गुड़ुरकासिन नॆकन आलर अम्‍बत'आ बेद्दनर आसिन अम्‍बा चि'आलियस।

16अबड़ा उल्‍ला नू बरब्‍बस नामे ही ओन्‍टा गुड़ुरकस रहचस। आस हुलहुली नू आलारिन लौचका पिटका रहचस।

17आलर पिलातुसी एड़पा नू ख़ॊंड़रर ख़ने, पिलातुस आरिन बाचस, “नीम एन्‍देर बेद्ददर, ऎन निमा गे नॆकन अम्‍बोन चि'ओन? बरब्‍बसिन का मलता येसुसिन एकास मसी बातारदस?”

18एन्‍देरगेका आस अक्‍खस का आर येसुसिन इस्गहा ती आस गे सों‍पचका रहचर।

19पिलातुस नेंवई नन्‍ना गदिया नू उक्‍काचस ख़ने, तंग्‍आली आसिन बाचा तइय्या, “नीन आ उजगो आलासी पत्त नू ख़ेक्खा अमके नना, एन्‍देरगेका ऎन चेरो माख़ा तुंगुल नू आसी चड्डे नगदे दुक्‍खे सारचकन।”

20लिकिन मुध नैगर अरा सेयान आलर आलारिन मेना गे तुतकाचर का आस बरब्‍बसिन अम्‍बत'ओस, अरा येसुसिन पिटतोस।

21राजीख़ापुस आरिन मेंजस, “इबड़ा इरबर ती नीम नॆकन बेद्ददर का ऎन निमा गे अम्‍बोन चि'ओन?” आर बाचर, “बरब्‍बसिन।”

22पिलातुस आरिन अउरिम मेंजस, “होले येसुसिन, नॆ मसी बारदस, एन्‍देर ननोन?” ओर्मर बाचर, “ईसिन क्रुस नू ठोक'आ।”

23पिलातुस आरिन मेंजस, “एन्‍देरगे, ईस एन्‍देर दोस नंजकादस?” लिकिन आर अउरिम जॊर ती चिच्चि‍यारते र'आलियर, “ईसिन क्रुस नू ठोक'आ।”

24पिलातुस ईरियस का गोंहड़ा ही चिच्‍चियारना मल मड़'आ लगी, अरा आस एन्द्रा हूँ इदही पत्त नू नना पुल्‍लियस। अरा आस अम्मु नॆचस ती गोंहड़ा ही मुन्‍दहारे ख़ेक्खा नॊंढरस ती बाचस, “ऎन ई उजगो आलासी खे'अन‍ ही बदी ती बछ्रदन, निम्‍है म‍इय्याँ दिम ईद मनो।”

25ओर्मर आनाकिर्ताचर, “ईसी बदी एम्‍है मइय्याँ अरा एम्‍है ख़द्दर मइय्याँ मनन।”

26ख़ने पिलातुस बरब्‍बसिन आर गे अम्‍बियस। अरा येसुसिन कोर्रा ती लौ'अरकी क्रुस नू ठोक'आ गे रोमी सैनर गे सों‍पचस।

27ख़ने राजीख़ापुसी सैनर येसुसिन प्रिटोरिओन बारना गढ़िया ही भितरी चाली नू होच्‍चर केरर। अरा आर असन आसी मुन्‍दहारे उर्मी फ‍उदन ख़ॊंड़चर।

28अरा आर आसी किचरिन चड्डर ती आसिन ख़ॆंसो किचरी अत्ताचर।

29अरा आर अच्‍चोन बिन्‍डो लेक्खा मोड़चर ती आसी कुक्‍कु नू अत्ताचर। अरा आसी तीना ख़ेक्खा नू बॆत डंडा धरताचर ती आसी मुन्‍दहारे मूकलिदरर ती भेंसड़'आ हेलरर, “अना यहूदीर ही बॆलायो” बाचर।

30अरा आर आसी म‍इय्‍याँ तुप्‍पियर अरा आ बॆत डंडन होच्‍चर ती येसुसी कुक्‍कु नू लौ'आ हेलरर।

31आसिन भेंसड़ाचर अदही ख़ॊख़ा ख़ॆंसो किचरिन इच्‍चियर ती आसी किचरिन अत्ताचर। अदही ख़ॊख़ा आर येसुसिन क्रुस नू ठोक'आ गे प्रिटोरिओन ती बहरी होच्‍चर।

32फिन सैनर येसुस गने नगरे ती बहरी काला लगियर ख़ने, आर सिमॊन नामे ओन्‍टा कुरॆनॆ नगरे ता आलासिन येसुसी क्रुस आबोन चेड़'आ गे बिट्ठी नू धरचर।

33आर ओर्मर गोलगोता नामे अड्डा नू बरचर। गोलगोता ही माने “खपरोही ही अड्डा” हवे।

34अरा आर येसुस गे गन्‍धरस भिड़ाबाचका अंगुर रासी अबोन ओना गे चिच्‍चर। लिकिन आस टट्टी ईरियस ती अदिन मल ओं‍डस।

35फिन आर आसिन क्रुस नू ठोकचकाचर ख़ने, आसी किचरिन चिठी टिड्डर ती तम्‍है नू ख़ट्टरर ।

36अरा असन उक्‍कियर ती आसिन ख़ापा लगियर।

37अरा आसी दोस चिठी लिख'अरकी आसी कुक्‍कु म‍इय्‍याँ क्रुस नू लगाबाचर का “ईस यहूदीर ही बॆलस येसुस हवे”।

38तहाँ आर आस गने ऎंड़ डाकू आलारिन, ओर्तोसिन आसी तीना अरा ओर्तोसिन डेब्‍बा चोक्‍ख क्रुस नू ठोकचर।

39डहरे नू कालू बरऊ आलर कुक्‍कुन नुक'अरकी भेंसड़'आ लगियर।

40आर एन्ने ब'आलियर, “नीन, धर्मेसी मन्दिर आबोन धस'ऊ अरा तीन उल्‍ला नू कम'ऊ। नीन धर्मेसी ख़द्दय होले क्रुस म‍इय्‍याँ ती एत्ता अरा निंगन बछाब'आ।”

41एन्नेम मुध नैगर अरा सेयान आलर अरा नॆग सिखाब'उर आसिन भेंसड़ाचर ती ब'आ लगियर,

42“ईस नन्नारिन बछाबाचस अन्‍ति तंगन बछाब'आ पोलदस। ईस तंगन इस्राऎल ही बॆलस बाचस, अक्‍कु क्रुस म‍इय्‍याँ ती एत्तोस बर'ओस होले, ऎम आसिन पत्त'ओम।

43ईस तान धर्मेसी ख़द्दन बाचस ती धर्मेस मइय्याँ असरा नंजकादस। धर्मेस ईसिन पत्तारदस होले अक्‍कु आस ईसिन नाड़दस नेक‍अन।”

44अरा डाकू आलर नॆ आस गने क्रुस नू ठोक्राचर आर हूँ येसुसिन एन्नेम भेंसड़'आ लगियर।

45अक्‍कु लोहाड़ी बारा बजे गोट्टा चक ऊख़ा मं‍जा केरा, अरा आद तीन बजे गूटी रहचा।

46ओनबीड़ी तीन बजे येसुस जॊरसरिया चिच्चियारनुम बाचस, “ऎलॊइ, ऎलॊइ लेमा सबख़तानी।” इदही माने, “एंग्‍है धर्मे, एंग्‍है धर्मे नीन एंगन एन्‍देरगे अम्‍बकय?”

47असन हेद्दे र'ऊ जोक्को आलर इदन बुझुर'आ पोल्‍लर ती बाचर, “ई आलस एलियसिन मॆख़दस।”

48अबड़र ती ओर्तोस लेम बोंगस ती तूलिन तिस्‍सा अंगुर रासी नू चेदस ती डंडा नू पुज्‍जयस ती येसुस गे चीपा गे चिच्‍चस।

49लिकिन नन्नस बाचस, “रहा, ऎरोत एलियस ईसिन नाड़ा गे बर'ओस का मला!”

50ख़ने येसुस अउर हूँ जॊरसरिया चिच्चियारस ती तंग्‍है जियन बिच्‍छरस।

51आ बारिम धर्मेसी मन्दिर ही परदा म‍इय्‍याँ ती किइय्‍या गूटी चर्रा ती ऎंड़ फड़ा मंजा केरा। अरा ख़ॆख़ेल नुकुर ख़च्‍चिया, अरा चचड़ी पलकरा केरा।

52अरा मसड़ा गुट्ठी तिसग्रा केरा, अरा नगदे केचका नेम्‍हा आलर ही मॆद उज्‍जा चॊचा।

53अरा आर मसड़ा गुट्ठी ती उरखर, अरा येसुसी उज्‍जा चॊचका ख़ॊख़ा आर नेम्‍हा नगरे येरुसलॆम नू कालरकी नगदे आलर गे ऎथ्रर।

54रोमी सैनर ही मुद्धस अरा आसी गने र'अरकी येसुसिन ख़ापा लगियर आर ख़ॆख़ेल नुक्रनन अरा अबड़ा मंजकन ईरियर ख़ने, आर नगदे इल्‍चियर अरा अनचकरर, अरा बाचर, “ईस मानिम नू धर्मेसी ख़द्दस रहचस।”

55असन नगदे बग्‍गे मुक्‍कर गलिलेया ती येसुसी सुसर नना गे आसी गने चॊंख़्रका रहचर, आर गेच्‍छा ती इबड़न ऎरा लगियर।

56आर नू मगदला पद्दा ता मरियम अरा याकॊब अरा यॊसॆसी तंगियो मरियम अरा जेबदयुसी ख़द्दर ही तंगियो रहचर।

57बीड़ी पुत्त लेक्‍खा बारी, अरिमतिया पद्दा ता यॊसॆफस नामे ओन्‍टा उरुब आलस असन बरचस, आस तानिम येसुसी चेला मंजका रहचस।

58आस पिलातुस गुसन केरस अरा येसुसी मॆदन नॆचस। ख़ने आस येसुसी मॆदन यॊसॆफस गे चिताचस।

59ख़ने यॊसॆफस येसुसी मॆदन एत्ताचस ती सफा कफन किचरी ती मुसगियस,

60अरा तंग्‍है पुना मसड़ा नू कीदस, एकदा चचड़ी नू पत्तरकी कम्रकीचा। अरा मसड़ा ही बली नू ओन्‍टा कोहाँ पखनन उर्दियस ती किर्रिम बिच्‍चियस।

61अरा असन मरियम मगदलेनी अरा नन्ना मरियम मसड़ा ही मुन्‍दहारे उक्‍काचर।

62नन्‍ना उल्‍ला ख़न्न ऎख़्रना उल्‍ला रहचा, औंगे मुध नैगर अरा फरिसीर पिलातुस गुसन केरर ती बाचर,

63“अना बॆलायो, एमा सुरता र'ई का आ भुरइउस उज्‍जालियस ख़ने, बाचकाचस, ‘ऎन तीन उल्‍ला ख़ॊख़ा उज्‍जा चो'ओन।’

64औंगे मसड़न ख़ापा गे पॆस'आ का तिसर उल्‍ला गूटी मसड़ा ख़ापतार'ओ। मलता एन्ने अम्‍बो मना आसी चेलर बर'ओर ती आसी मॆदन ख़ड़'ओर हो'ओर, अरा आलारिन ब'ओर का, ‘आस केचका ती उज्‍जा चॊचकादस।’ एन्ने मनो होले ई ख़ॊख़ा ता भोड़ मुन्‍द ता ती कोड़हे मलदौ मनो।”

65पिलातुस आरिन बाचस, “निम्‍है गुसन ख़ापू आलर गा र'अनर। कला, निम्‍है मने लेक्‍खा ख़ापत'आ।”

66औंगे आर ख़ापू आलारिन संगे होच्‍चर ती केरर, अरा पखना नू छपा नंजर ती मसड़न ख़ापियर।

← Chapter 26 Jump to: Chapter 28 →