Philippians 2

Kurukh (पुना गच्छरना NT (BSI))

← Chapter 1 Jump to: Chapter 3 →

1औंगे नीम मसीसी र'अना ती जिया सालना, अरा चोन्‍हा ती डिढ, अरा नेम्हा बॊलतासी गने मेस्रका अरा दया अरा सोग्‍गे ऎरना र'अना ती,

2नीम ओन्टा सोच अरा ओन्टे लेक्खा चोन्हा र'अरकी मेस्रका जिया ती ओन्टम सोचना ती एंग्है रिझ आबोन पूरा ब'आ।

3लोभिया ही चड्डे महले ठकवा फुलई मन्ना चड्डे एन्‍देर हूँ अमा नना। लिकिन लुदऊ जिया ती ओर्त ओर्तारिन तंग्है ती कोड़हे बॆस अख़ना र'ई।

4नीम ओर्मर तम्है तम्है दौ गे लेका मला, लिकिन नन्नर ही दौ गे हूँ घोख नन्ना र'ई।

5मसी येसुस नू रहचका सोचना लेक्खा दिम निम्है नू हूँ र'अना र'ई।

6आस धर्मेसी रूपे नू रहचस, अन्नु हूँ धर्मेसी जोक्खा र'अनन धर'अर उइय्का र'आ गे मल सोच्चस।

7लिकिन आस तंगा उर्मिन अम्बियस चिच्चस अरा तंगन बिट्ठी ननू जॊंख़ बेसे सन्नी मंजस ती ओन्टा आल मंजस केरस। अरा आस आल रूप नू उज्जियस ख़ने,

8तान तंगन एन्ने कोड़हे लुदऊ कमचस अरा खे'अना गूटी धर्मेसिन पॆस्रस का तंगन क्रुस नू खे'आ गे हूँ चिच्चस।

9ई चड्डे धर्मेस आसिन उर्मी ती मेच्छा मईन ही अड्डा नू चॊदस अरा आस गे उर्मी नामे ती कोड़हे बॆस नामे चिच्चस।

10औंगे मेर्ख़ा नू अरा ख़ॆख़ेल नू अरा ख़ॆख़ेल किय्या ता उर्मी येसुसी नामे गे मूकलिदर'ओ।

11अरा धर्मे बंगसी महबा गे उर्मी ततख़ा तेंग्र'ओ का येसु मसीस दिम उर्बस।

12औंगे अना एंग्है चोन्हा आलारो, नीम सगरो एंग्‍है पॆसका गुट्ठिन पॆस्रनुम बर'आ लगदर, अन्नेम एंग्‍है र'अना बेड़ा नू लेका मला, अक्‍कु ऎन निंग्‍है ती गेच्‍छा र'अना नू हूँ अउर कोड़हे पॆस्र'आ। अरा निम्है नाड़रना पूरा मना गे इल्‍चनुम अरा असरनुम नलखन नन्नुम कला।

13एन्देरगेका धर्मेस निम्है नू नलख नन्दस, अरा तंग्‍है दौ चिताबुता ही लेक्खा नीम निम्है बॆस मने ती पॆस्र'आ गे अरा नना गे आस दिम सवंग चि'अदस।

14उर्मिन बिगर कुटमुटर'आ ती अरा बिगर नग्‍गानख्रकम ती नना।

15होले नीम ई कुचुरहा अरा करतअंग आलर ही मझी नू गुन्‍हा मलका बिगर बदी ही अरा निमन ही धर्मेसी ख़द्द-ख़र्रा मना ओंगोर। अरा आर ही मझी नू नीम मेर्ख़ा ता बीन्को गुट्ठी लेक्खा बिल्‍चना र'ई।

16नीम उज्‍जना ही कत्‍थन धर'आ ती मेन्त'अना बारी नीम एन्नेम बिल्चोर। होले निम्है नू ता एंग्है कोड़हे चिहुट नन्ना महले अर्ज'अना अनभनियाँ मल मंजा एन्ने ऎन निम्है चड्डे मसीस ख़ॆख़ेल नू किर्रना उल्‍ला नू फुलई मनोन।

17लिकिन निम्‍है पत्त'अना धर्मेस गे अरगतारना दाँड़े बेसे र'ई। ई लेक्खम ऎन एंग्है ख़ॆंसन बाहतारना बेसे धर्मेस गे एंगन दाँड़े अरग'ओन होले हूँ, ऎन निम्‍है ओर्मर गने रिझ्र'ओन अरा रिरयार'ओन।

18अन्नेम नीम हूँ एंग्‍है संगे रिझ्रना अरा रिरयारना र'ई।

19चाँड़हेम ऎन निम्‍है गुसन तीमोथियुसिन तइय्योन एन्ने उर्बा येसुस नू असरा नन्दन। होले ऎन आस ती निम्‍है हलन मेनोन ती रिझ्र'ओन।

20एन्‍देरगेका आसी लेक्‍खा नॆ हूँ एंग्‍है गुसन मलकस का नॆ मानिम जिया ती निम्‍है दौ ही पत्त नू घोख ननोस।

21अउर नन्ना ओर्मर तम्है तम्है पत्त ता कत्था गुट्ठी गे लेका घोख नन्नर, येसु मसीसी कत्था गुट्ठी गे घोख मल नन्नर।

22लिकिन तीमोथियुस गा ओन्टा ख़द्दस तम्बस गने नलख नू र'अना बेसे, आस एंग्है गने दौ कत्था तेंगना ही नलख नू सुसराचकादस। इत्रु ती आस तंगन पुरुब नंजकादस, अदन नीम अक्कर।

23इसन एंगा गे एन्‍देर मनो एन्ने ऎन अख़'ओन ख़ने, चाँड़हेम आसिन निम्है गुसन तइय्या गे असरा नंजकादन।

24अन्नु हूँ उर्बस नू एंगा असरा र'ई का ऎनिम चाँड़हेम निम्है गुसन बर'ओन।

25लिकिन एंग्है चाड़ नू एंगा गे संगरा नना गे नीम तइय्का निम्है पैकस एपाफ्रोदितोसिन निम्है गुसन किर्तर तइय्या गे चाड़ र'ई एन्ने ऎन सोचदन। आस एंग्है भईस, अरा एंग्‍हा गने सुसर नलख ननुस, अरा एंग्है गने ओन्टा सैनस लेक्खा दौ कत्था तेंगना नू संगरा ननुस र'अदस।

26आस नीम ओर्मारिन ऎरा गे कोड़हे पत्तारदस। अरा आस बेमार खत्रकाचस एन्ने नीम अक्का ती आस अउरिम दुक्खे सारचस।

27आस मानिम नू ई बेमार ती खे'आ बेद्दालियस। लिकिन धर्मेसी सोग्गे आसी मइय्याँ मंजा। आस नू लेका मला एंग्है नू हूँ मंजा, एकत्रु एंगा दुक्‍खे नू अउर हूँ दुक्‍खे चॊदना मल मनो।

28कोड़हे गा ऎन आसिन इदगे तइय्या गे पत्तारदन का, नीम आसिन ऎरोर ती रिझ्रर'ओर अरा एंग्है घोख हूँ जुक्‍की मनो।

29औंगे उर्बस नू कोड़हे रि‍झ ती आसिन परिघ'आ, अरा ईसी लेक्खा आलारिन मईन नना।

30एन्देरगेका निम्है ती एंगा गे नना पोलना सहाड़ा आबोन आस एंगा गे नना गे आस तंग्‍है जियन हूँ अपलोक नू नंजस। एन्नेम मसीसिन सुसर'अना नलख गे खे'आ गे हूँ मल इल्चियस।

← Chapter 1 Jump to: Chapter 3 →