Philippians 3

Kurukh (पुना गच्छरना NT (BSI))

← Chapter 2 Jump to: Chapter 4 →

1छेद्दे नू, अना एंग्‍है भईरो, उर्बस नू रिझ्र'आ। ऎन मुन्द बाचका कत्था गुट्ठिन अउर हूँ लिखना ती एंगा एन्‍द्रा हूँ ओत्‍था मल लग्‍गी, अरा ईद निमा दौ गेम र'ई।

2अल्‍ला गुट्ठी लेक्खा ठकवा सिखाब'उर ती चिहुंक र'आ, आर मलदौ ननुर अरा नाड़रना गे खतना मन्ना र'ई एन्ने ब'ऊ आलर हिकनर।

3एन्‍देरगेका मॆद ही पत्त ता कत्था गुट्ठी नू असरा मल उइय्यदत ती, अरा धर्मेसी बॊलतासी संगरा ती महबा नन्दत ती, अरा मसी येसुस नू फुलई मनू नाम दिम मानिम नू खतना मंजका आलर हिकदत।

4ऎन एंग्है अपन चिहुट ही मइय्याँ असरा गा नना ओंग्दन। अरा एकअम नन्नस गे तंग्है चिहुट ही मइय्याँ असरा नना गे आस गे इन्द्रिइम कत्था र'ई होले, एंगा अदिन ती बग्गे र'ई।

5एंग्हा कुन्द्रका ती आठ उल्ला नू एंग्है खतना मंजा, अरा ऎन इस्राऎल आलर ता हिकदन, अरा ऎन बेनियमिन गोतोर ता हिकदन, अरा एंग्है अयंग बंगर निमन इब्रानी आलर हिकनर ती ऎन हूँ निमन इब्रानी आलन हिकदन, अरा मूसासी नॆग उर्मिन पॆस्रना ही पत्त नू गा ऎन फरिसी हिकदन।

6अरा धर्मेस मइय्याँ ता एंग्है सकत ओत्था ती ऎन कलीसिया गुट्ठिन सताबाचका आलन रहचकन। अरा यहूदी नॆगन पॆस्रना ही पत्त नू ऎन उर्मी नॆगन पॆस्रका ती बिगर बदी ही रहचकन।

7लिकिन एका एका कत्‍था एंग्‍है फैदा गे रहचा, अबड़न अक्कु ऎन मसीसी र'अना चड्डे फैदा मल चि'ऊ अक्‍कन।

8ईद लेका मला, ऎन एंग्‍है उर्बस मसी येसुसिन अख़ना लूर ही कोड़हे बॆस गने अबड़न जोक्ख'ओन ख़ने, उर्मी कत्‍था गुट्ठिन अनभनियाँ अक्‍कन। अरा आसी चड्डे अबड़ा उर्मी आलॊ गुट्ठिन फोकोरकन, अरा ऎन मसीसी मना गे अबड़न खतू सोचदन।

9होले ऎन आसी गने ओन्टा मना गे ओंग्दन। अरा यहूदी नॆगन पॆस्रना ती बरना उजगो ती मला, लिकिन मसीसिन पत्त'अना ती बरना उजगो गने र'आ गेम ऎन बेद्ददन। ई उजगो धर्मेस तरती मसीसी मइय्याँ ता एंग्है पत्त'अना चड्डे बर'ई।

10अरा ऎन मसीसिन अख़'आ गे, अरा आसी उज्‍जा चो'अना ही सवंगन अख़'आ गे बॆद्दन। अरा आस गने दुक्‍खे गुट्ठिन चॊदना नू बटा मना गे, अरा आसी लेक्खा खे'आ गे बेद्ददन।

11ई लेक्खम ऎन एकअम रकम ती हूँ केच्‍कर ही उज्‍जा चो'अनन ऎन हूँ ख़क्खा गे बेद्ददन।

12इबड़ा उर्मिन ऎन ख़क्‍खा ख़च्चकादन, महले पखड़ मंज ख़च्चकादन एन्ने मल सोचरकी, मसी येसुस ती ऎन एन्देरगे चजरकादन अदिन पूरा नना गेम ऎन कोड़हे चिहुट नन्तेम र'अदन।

13अना भईरो, ऎन अख़दन का ऎन इदन पूरा मल नंज ख़च्चकादन। लिकिन ओन्टा नलख लेका नन्दन का एका कत्‍था ख़ॊख़ा अम्‍ब्रकी र'ई अदिन मॊध्रदन ती, मुन्दहारे ‍ता कत्‍था गुट्ठी तरा अबड़न ख़क्खा गे कोड़हे चिहुट नन्दन।

14ऎन धर्मेस चि'अना इनामन ख़क्खा गे एंग्है लच्छय तरा अंड़सा गे कोड़हे चिहुट नन्दन। आ इनाम मेर्ख़ा उज्जनन ख़क्खा गेम धर्मेस एंगन मसी येसुस ती मीख़कादस।

15औंगे नम्‍है नू एवंदा आलर बड़ियर मंज ख़च्चकानर, आर ओर्मर एन्नेम सोचनर नेकअन। अरा एकअम कत्‍था नू नीम नन्नम सोच नू र'अदर होले, अदिन हूँ धर्मेस दिम फरी ननोस।

16अन्नु हूँ नाम एका गूटी पखड़ मंज ख़च्चकादत अदही लेक्‍खम उज्जा गे चिहुट नन्ना र'ई।

17अना भईरो, नीम ओर्मर ओन संगे एंग्‍है लेक्‍खा उज्जा ऎका, अरा नॆ एम्है उज्जना ओक्कना बेसे उज्जा ओक्कनर आरिन हूँ चॊख़्र'आ।

18एन्‍देरगेका अजम बग्‍गे आलर नन्ना लेक्खम उज्जनर ओक्कनर। आर मसीसी क्रुस ही बैरिर एन्ने ऎन निमा गे घड़ी घड़ी तिंकन। अक्‍कु अउर हूँ इदन चींख़ा चींख़ा ब'अदन।

19आर ही छेद्द नठारना हवे। आर ही धर्मेस कूल हवे। आर तम्है लजरना ही कत्था गुट्ठी नू फुलई मन्नर। अरा आर ई ख़ॆख़ेल ता आलॊ गुट्ठी नू लेका सोच नू र'अनर।

20लिकिन नम्‍है र'अना अड्डा मेर्ख़ा नू र'ई, अरा असन तिम नाड़ुस उर्बस येसु मसीस बर'ओस एन्ने नाम रिझ ती पाब ऎरदत।

21आस नम्है पैहा नठारना ही मॆदन तंग्है महबा ही मॆद लेक्‍खम कम'ओस चि'ओस। उर्मी आलॊ गुट्ठिन तंग्है तबे नू ओन्द्रना गे पया चि'ऊ सवंग ती आस इदन ननोस।

← Chapter 2 Jump to: Chapter 4 →