Job 29

Kituba (BIBILIYA NA KITUBA)

← Chapter 28 Jump to: Chapter 30 →

1Na manima, Yobi tatamanaka na kutuba kingana yayi:

2Aa, nani ke sala ti mu zinga mutindu mu vwanda na bangonda ya ntama, bilumbu yina Nzambi vwandaka keba munu,

3ntangu yandi vwandaka lemisa mwinda ya yandi na zulu ya yintu ya munu, nsemo ya yandi vwandaka twadisa munu na kati ya kitombe!

4Aa, ntangu mu vwandaka ntete na ngolo ya munu, ntangu kindiku ya Nzambi vwandaka na kati ya yinzo ya munu ya lele,

5ntangu Nzambi-Mpungu vwandaka ntete na munu, mpe bana ya munu ya babakala vwandaka zunga munu,

6ntangu mu vwandaka sukula makulu na kati ya miliki ya kilo, mpe ntangu ditadi vwandaka basisila munu mwila ya mafuta!

7Ntangu mu vwandaka basika samu na kwenda na mwelo ya mbanza, mu vwandaka sala ti ba kubikila munu kyandu, na kisika yina bantu ke yonzamaka.

8Bantwenya vwandaka tala munu, bawu vwandaka bumbama, biboba vwandaka telama, bawu vwandaka bikana kaka ya kutelama.

9Bakuluntu vwandaka zenga kinzonzi ya bawu, bawu vwandaka tula diboko na bayinwa ya bawu.

10Bamfumu vwandaka dingama, baludimi ya bawu vwandaka kangama na kati ya bayinwa ya bawu.

11Samu ti muntu yina vwandaka kuwa munu, vwandaka tuba kyese na munu, muntu yina vwandaka tala munu, vwandaka sala kimbangi ya munu.

12Samu ti mu vwandaka sadisa mputu yina vwandaka dila ti ba sadisa yandi, nsaana yina ata muntu vwandaka pesa lusalusu.

13Kana muntu me kufwa, lusakumunu ya yandi vwandaka kuma ya munu, mpe mu vwandaka fulusa ntima mufwidi na nsayi.

14Mu vwandaka lwata ludedomo mutindu kinkuti, ludedomo vwandaka lwata munu. Banzengolo vwandaka mutindu kiyunga ya munu, kitambala ya munu.

15Mu vwandaka meso samu na bampofo, mpe dikulu samu na bantu ya makulu ya kufwa.

16Mu vwandaka tata samu na bamputu, mu vwandaka fyongonina mambu ya bantu yina mu zaba ve.

17Na yina, mu vwandaka mwangisa mubanga ya muntu yina kele ve ya kudedama, mpe mu vwandaka katula yandi mbisi na kati ya meno ya yandi.

18Mu vwandaka tuba mutindu yayi: «Mu ke kufwa na kati ya dizanza ya munu, bilumbu ya luzingu ya munu ke vwanda mingi mutindu munyenge,

19Myanzi ya munu ke kwenda tii na maza, kinoko ke lutisa mpimpa na zulu ya bintala ya munu,

20buzitu ya munu ke talana dyaka, mpe munani ya munu ke vwanda dyaka na ngolo na diboko ya munu.»

21Ntangu yina, bantu vwandaka kuwa munu, bawu vwandaka vingila, na kati ya kudingama, ba vwandaka vingila malongi yina mu ke pesa bawu.

22Ntangu mu vwandaka manisa na kuzonza, ata muntu vwandaka balula yina mu me zonza. Samu ti mambu ya munu vwandaka bwidila bawu na ndembami nyonso.

23Ba vwandaka vingila munu mutindu ba ke vingilaka mvula, ba vwandaka fungula bayinwa mutindu ti ba ke na kuyamba mabete ya mvula ya ntete.

24Ntangu mu vwandaka seka, ba vwandaka kwikila munu ve. Ba vwadaka lenda ve na kuzimbisa nsemo yina vwandaka lezima na kizizi ya munu.

25Mu vwandaka soodila bawu nzila ya kulanda, mpe mu vwandaka twadisa bawu, mu vwandaka mutindu ntinu na kati-kati na bankonga ya binwani ya yandi, mu vwandaka mutindu muntu yina ke kindisaka bayina me lemba.

← Chapter 28 Jump to: Chapter 30 →