Job 7

Kituba (BIBILIYA NA KITUBA)

← Chapter 6 Jump to: Chapter 8 →

1Luzingu ya muntu na ntoto, kele mutindu luzingu ya kinwani, luzingu ya muntu kele mutindu ya kisadi yina ba ke futaka.

2Yandi kele mutindu mundongo yina ke na kusala na yisi ya ntangu, mpe ke na kusosa mpewo, yandi kele mutindu kisadi, yina me tula kivuvu na difuta ya yandi.

3Na yina me tadila munu, mvwilu ya munu kele ni bangonda ya mpamba, mpe kikunku ya munu ni bampimpa ya mpasi.

4Na ntangu ya kulala, mu ke tuba: «Wapi ntangu mu ke vumbuka?» Mpimpa me kuma yinda, mu me fuluka na mayindu ya kidi-kidi tii na suka-suka.

5Nzutu ya munu me fuluka na bangambu mpe mvindu, mutindu ntoto ya kuyuma, mpusu ya nzutu ya munu ke na kubeba mpe bamputa ke na kwendaka basisa maza.

6Luzingu ya munu ke na kwenda nswalu-nswalu mutindu kisadulu ya kisyeti, yawu me manisa, mu ke dyaka na kivuvu ata fyoti ve! *

7Nzambi ya munu, kuzimbana ve ti, luzingu ya munu kele kaka mupepe ya mpamba, mu ke tala dyaka ve buyenge na luzingu ya munu.

8Nge yina vwandaka tala munu, nge ke tala dyaka munu ve. Na ntangu meso ya nge ke banda na kusosa munu, mu ke vwanda dyaka ve.

9Dituti ke kwendaka mpe ke zimbanaka, ni mutindu yina mpe muntu ke kwendaka na yinsi ya bafwa mpe ke vutukaka ve.

10Yandi ke vutuka dyaka ve na yinzo ya yandi, mpe kisika yina yandi vwandaka zinga ke zimbana yandi.

11Ni yawu yina, mu ke kanga ve yinwa, mu ke zonza samu na bampasi ya munu, mu ke yawula samu ti munu ke na mpasi na ntima.

12Samu na yinki nge ke na kukeba munu mutindu yayi? Mu kele mubu to kibulu ya nene ya nsisi ya mubu?

13Ntangu mu ke tubaka ti: «Mfulu ya munu ke bomba munu, pongi ya munu ke fuka bampasi ya munu»,

14kasi nge ke pesaka munu boma na bandosi ya nge ya yimbi, nge ke talisaka munu boma na balumoni ya nge.

15Ya kele mbote ti nge nyema kwandi munu na laka mu kufwa. Lufwa me lutila kwandi mbote na kuvwanda mikwa na mikwa!

16Mu ke na kulenda dyaka ve, mu ke zinga ve ya mankululu. Bika kwandi munu, luzingu ya munu ke kaka mupepe ya mpamba. *

17Muntu yina ke kufwa, yinki yandi kele, samu ti nge banzila yandi? Yinki yandi kele, samu ti nge kufwila yandi kyadi?

18Yinki yandi kele, samu na kufyongoninaka yandi konso suka? Yinki yandi kele, samu na kumekaka yandi konso ntangu?

19Wapi ntangu nge ke bika na kusikika meso ya nge na munu? Wapi ntangu nge ke bika ti mu mina mante?

20Mu me sala disumu? Yinki mu me sala nge, nge yina kele nkebi ya bantu? Samu na yinki nge ke na kusosa na kutalisa kaka munu mpasi? Luzingu ya munu me kuma dema na maboko ya nge?

21Samu na yinki nge ke na kulemvokila ve yimbi ya munu, mpe nge ke na kuzimbana ve yimbi ya munu? Ntangu kaka fyoti me bikana, mu ke lala na zulu ya fundu-fundu. Nge ke sosa munu, mpe ke tala dyaka munu ve.

← Chapter 6 Jump to: Chapter 8 →