2 Thessalonians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo pi, Silivano pie, Timoteo pie, Kanisa ’ba Tesalonikia ’diyini,ovupi Mungu Ata amani pi ma alia Opi Yesu Kristo beri vu:

2’Yeta anzutiri pi ma ovu emi vu lasi anzuru be engazu Mungu Ata vu azini Opi Yesu Kristo vu.

3Le ama ma fe awa’difo Mungu dri emisi etuzu ’dani, adripi, ekile erini ovule onyirurile, a’disiku a’ita eminini zole zorisi, azini leta avasi emi dria alu aluni emi eseliarini i erele ererisi;

4ani ama ma ngulupini adri ama enya emisi kanisa Munguni ma eselia, asi teza emini i e’dapi inzata emini ana pi ma alia candi emini beri pi ma e’yosi a’ita emini be.

5E’yo ’diyi yi ecetaru e’yo liza kililiru Munguniri ecezu, erruru ovuzu ani edezaru onyiru dri fuzu suru Munguni emini candi isule e’yonisiri a’izu beni.

6Te eri ovu e’yo kililiruni Mungu ma milia inzata ma arioti ofezu ’ba emi inzapi ’diyi ma ruaa,

7te emi ovupi ecandizaru ’diyi dri ava liza fezu ama be tualu, o’du Opi Yesuni i ecezu ibizu engazu ’buarisirisi; eri nga jece malaika okpo miniru ’diyi be

8aci andre ma alia, arioti ofezu ’ba Mungu nipi ku ’diyi ma ruaa, ’ba e’yo baru Opi amani Yesuni inzipi ku ’diyi be.

9Eri nga panga onzi ofe yi dri, yi dri jazu ’dani ’dani Opi ma miliarisi, yi ma esele cozu diza okpo erinirini be ziri,

10o’du erini ngazu emuzu diza isuzu ’ba alatararu erini ’diyisi, i e’dazu osutaru ’ba eri a’ipi ’diyisirisi, a’disiku emi a’i e’yo eti amani nzele emi tiari ra.

11E’yo ’disi etu dria ama Mungu zi emi dri, Mungu amani ma ’ba emi ’dere dri fuzu omveta erini emi omvezurisi, azini okpo inisi eri ma fe e’yo dria ayiko fepi i dri ’diyi ma ’ye yi, azi dria a’itani ’diyi be,

12’dini Opi amani Yesu ma ru ma ovu inzizaru emi ma alia, azini emi eri ma alia, ’yeta anzutiri Mungu amanini azini Opi Yesu Kristoniri vusi.

Jump to: Chapter 2 →