2 Timothy 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo, ’ba Kristo Yesuni tini peleri, ekile e’yo Munguni lelerile ekile aziza idrini ovupi Kristo Yesu ma aliarile,

2Timoteo, mva mani leleri vu: ’Yeta anzutiri pi, yiki pie, asi anzuru be, engazu Mungu Ata vu azini Kristo Yesu Opi amaniri vu,

3Ma ’yo awa’difo Mungu dri, mani azi ngazu vunia asisile alarusi engazu ma a’bipi vuri’i, mani e’yo mini egaria Mungu ziza mani ma alia inisi etusi ’dani.

4Ma le mi ndre avasi, mani mindre mini ma e’yo egaria, ayiko ma ga ma asia tre ani.

5Ma ega a’ita lokiri kokoru ma e’yo ovupi mi alia, te ovupi ndra okorisi mi idi Loisi ma alia azini mi andri Eunike ma aliari, te ma ni adaru a’ita i nde ’diri ovu mi alia indi.

6E’yo ’dirisi ma fe di egata mi dri, mi ma fe ani feta Munguni ovupi mi alia mani ndra ma dri ’bale mi driarisiri ma enga dizu acile dika;

7a’disiku Mungu feni ama dri orindi asi urioururini ku, te orindi asi okpo beri pini leta avasiri pie, asi e’yereruri pie.

8E’yo ’dirisi mi ma ovu drinzasi e’yo eti nzeza Opi amanirini ma e’yosi ku, kani ma’i ’ba aruru eriniri ma e’yosi ku indi, te mi ma-a’i candi isuzu e’yo barisi okpo Munguni, felerisi,

9eri ama papi, ama omvepi omveta alatararusiri’i, omveni ama ’yeta amanisi ku, te e’yo eri ma ngulupini lelerisi, azini ’yeta anzutiri erinirisi, ’yeta anzutiri nde erini fele ama dri Kristo Yesu ma alia engazu ewu driorisi,

10te ecele curu’do e’data ’Ba ama Papiri Kristo Yesunisiri’i, te eri fu dra ma okpo ra, fe idri pini i e’dazu e’yo ’bani dri jazu kuri be e’yo barisi.

11Te yi ’ba ma ovuzu ’ba e’yo nde bari olupiriru, azini ’ba ti peleriru, azini ’ba ’ba imbapiriru;

12e’yo ’dirisi ma ovu ani ecandizaru ’dini. Te ma ovuni drinzasi ku, a’disiku ma ni ’ba mani a’ile ’bori ra, azini ma ovu a’itasi nizu eri eco afa mani kule tani mbazu eri vuri ma agei tezaru cazu kpere o’du ’darini ecaria.

13Mi bi eceta e’yo ’yoza onyiru ’diyi ecepi, mini erile ma vuri ci, a’itasi azini leta avasi ovupi Kristo Yesu ma aliarisi;

14mi ma te e’yo onyiru kule mi dri tani mbazuri ma agei, Orindi Alatararu ovupi ama aliarisi.

15Mi ni e’yo ’ba dria ovupi Asiaa ’diyini ma kuzuri ra; Figelo pi ovu ’ba ’diyi ma eselia Heremogene be.

16Opi ma ovu yikisi ’ba Onesiforo vile joa ’diyi vu, a’disiku eri fe ava ’diru ma dri pale kakau; eri ovuni drinzasi anziriku mani ma e’yosi ku,

17te eri ka ovu Rumia eri ndru ma asi driasi, eri isu ma ra-

18Opi ma fe erini yiki isuzu Opi ma milia o’du ’darisi-te e’yo kakau erini ’yele Efesoa ’ba ma aza kozu ’diyi, mi ni e’yoni onyiru tu mi’i.

Jump to: Chapter 2 →