2 Timothy 4

Lugbara (E’yo Siza Alatararu Munguniri BIBLIA)

← Chapter 3 Jump to:

1Ma azita fe mi dri Mungu ma milia, azini vini Kristo Yesu ngapi ’ba draza pi ma e’yo lipi ’ba idriru ’diyi beri ma milia, e’data erini e’dazuri pi ma e’yosi opi nyaza erini be:

2mi ma olu e’yo, mi ma olu ’dani ewu ’bani lele raria azini ewu ’bani lele kuria ti, mi ma ece e’yo adari, mi ma ega ’ba dria, mi ma omi ’ba asi, asi teza pisi imbata be dria.

3Te ewu yini ngazu imbata alaruri a’izu kuri nga eca ra, te yi ma bileni ngale fole forisi yi nga yi dri ’ba yi imbapi ’diyi oku yini lelerile,

4yi nga yi ma bile oja yi kazu e’yo adaruri erizu ku, yi nga yi oja e’yo ’yoza toko toko o’dukoru ’diyi erizu,

5Te mi’i, mi ma te mi agei e’yo driasi, mi ma a’i candi isuzu, mi ma ’ye azi ’ba e’yo bari olupiriniri ra, mi ma ’ye azi yini fele mi driri dria.

6A’disiku yi ’ye ma fe edetaru curu’do; etu mani drazuri eca ’bo.

7Ma ’di a’di onyiruri ’bo, ma de nzuta ongu nzuzuri ’bo, ma mba a’ita ma ta ’bo.

8Engazu curu’do yi mba ekilaza e’yo kililirurini ma ta ma dri, Opi ’ba ma e’yo lipi kililirurini ngale fele ma dri o’du ’darisiri; te ma dri a’dule ku, te ’ba dria e’data erini i e’dazuri lepi ’bo ’diyi dri indi.

9Mi ma o’bi asi driasi emuzu ma vu mbele,

10A’disiku Dema ku ma ra, erini e’yo nyaku ’dorini lelerisi, eri mu Tesalonikia ’bo; Kereseke mu Galatiaa, Tito mu Dalama tiaa.

11Lukani a’dule ovu ma beni. Mi e’du Marakoni, ejizu mi be indi; erini dri fule onyiru ma aza kozurisi.

12Te ma pe Tukiko ma ti Efesoa ’bo.

13Bongo ’beza mani kule Troaa Karipo vuri mi eji indi mini emuria, azini buku ’diyi, te agapiri mi eji enyi edele karatasiru waraga sizu ’diyi.

14Alegezanda ’ba mola dipiri ’ye ndra ma vu e’yo onzi kakau; Opini nga eri ofe ’yeta erini ’yele ’diyi vusi.

15Mi ma ovu mile be eri ma e’yosi indi, a’disiku eri aru ama dri tu e’yo amani ’yolerisi.

16Mani e’yo mani ma eti nzeria ’ba e’yo lipiri ma milia pale okoria, ’ba aluni pa sopi ma beni yo; te yi dria ku ma ra. Ma la e’yo ’diri yi ma dria e’yo onzi yiniru ku fo

17Te Opi so ndra pa ma beni, eri fe okpo ma dri e’yo bari oluzu ani kililiru fudri ci, ’ba jururu ’diyi dria ma eri e’yoni beni. Te eri pa ma kami tilia ra.

18Opini nga ma pa ’yeta onzi dria ma alia, azini eri nga ma ta mba cazu suru ini ’buaria, Diza ma ovu eri vu ’dani ’dani ewule ewule Amena.

19Mi zi Pirisika pi Akula be ci ci, ’ba ovupi Onesiforo vile joa ’diyi pie.

20Erasito awi ndra Korintoa; ma ku ndra Turofimoni azoru Miletoa ’dale.

21Mi ma o’bi asi driasi emuzu de nga ewu anguni ambizuri eceani ku, Eubulo pi zi mi ci ci, Pudente pie, Lino pie, Kilaudia pie, adripi pie dria.

22Opi ma ovu orindi mini be. Yeta anzutiri ma ovu mi be.

← Chapter 3 Jump to: