Joel 1

Lugbara (E’yo Siza Alatararu Munguniri BIBLIA)

Jump to: Chapter 2 →

1E’yo Munguni ecapi Yoeli Petueli mvi vuri:

2Emi eri e’yo ’diri, emi mbaza, emi co bile emini, emi ’ba ovupi angu ndea ’diyi dria! E’yo ’dirile ovu ewu eminisi, kani ewu emi a’bipinisi ya?

3Emi olu e’yo nderi emi anzipi tia, azini anzi emini ma olu e’yo nderi yi anzipi tia indi, yi anzipi ma olu vini yi anzi ma tia.

4Ma ombi kakawiani kule nyakokoruri ombi iniari nyani; te afa ombi iniarini kule nyakokoruri ombi kulumburu nyani; te afa ombi kulumburuni kule nyakokoru o’dova nyani.

5Emi oru, emi ’ba atipi ewasi ’diyi; emi ma owu; emi ga lulu, ’ba patiefi ma su mvupi ’diyiru dria, patiefi ma su aluzaruri ma e’yosi, a’disiku eri ku emi tile ndru.

6A’disiku juru etu angu mania ’bo, yi okporu lakokoru indi; siniri kami sile, eri ovu si lili be ekile kamiandri dririle.

7Eri eza pati raza zabibuni maniri ’bo, eri nye eliopati maniri ’bo; eri opi oguru’balani ra, gu eri va; arakalani ofu emveru.

8Mi ’ba imvo ekile aliria koliba supi i ruaarini imvo ’bale anziagosirile.

9Edeta anyafurani pi de yi jo Yehovaniarisi edeta ’mvuzaruri be Kuhani yi owu ovu, yi ’ba azi ngapi Yehova dri ’diyi.

10Amvu du ra, nyakuni owu ovu; a’disiku anya eza i ’bo, patiefi ma su nzu ra, oduni ’ye i de de.

11Drinza ma bi emi, emi ’ba amvu ’yapi ’diyi la! Emi ’ba pati zabibuni edepi ’diyi, emi ga lulu nganu pisi anya azini be; a’disiku afa kapi nyakua ’diyi ja dri ra.

12Zabibu pati ’wi ra, elio pati onyu ra. Pomegranate pati pi onyu ’bo, itu pati pie, mala pati pie, pati dria angua ’diyi pie; ayiko de i ’ba anziyi ma eselia ’bo.

13Emi su koliba, emi ’ba imvo, emi kuhaniru ’diyi, emi ga lulu, emi ’ba pari edeta edezuri ma azi ’yepi ’diyi. Emi emu ola koliba be ini rra, emi ’ba azi ’yepi Mungu mani dri ’diyi, a’disiku edeta anyafurasiri pini ovule ogazaru edeta mvuzaruri pie jo Mungu eminirinia ’borisi.

14Emi ’ba o’du nyaka ’dazuri alaru, emi eku okuta inzizaruri. Emi oku mbaza piyi angu e’ipi be dria, yi ma mu jo Yehova Mungu eminirinia; emi owu Yehova vu.

15Ma ye O’du nderisi! A’disiku o’du Yehovani esi ogogo, azini eri eca ekile dri jazale, engazu Mungu Okpo be Turi vu.

16Nyaka deni i ama dri, amani ndrele indiru ku ya? Ayiko pi nyona be kuni jo Mungu amanirini ndru ku ya?

17Ori ma o’diti etia ma ma, ku ero mboloru; jo afa ta mbazu ’diyi asu yi va, te anya ’wi ra.

18Anyapa yi ono ono ’doni! Ti yi otropi tualu ’diyi aba bali yini ovule iribi kokorurisi; ada, kabilo ongulumuru ’diyi isu cocona tu.

19Opi la, ma owu mi vu. A’disiku aci ve iribi nyamuko rokoari ma driari ra, aciandre ve pati angua ’diyi dria.

20Anyapa asea ’diyi yi tile ozi mi vu a’disiku yi ara nzu ra, azini aci ve iribi nyamuko rokoari ma driari ra.

Jump to: Chapter 2 →