Joel 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Emi vu guka Zionia; emi oga lulu oni alatararu maniri ma dria! ’Ba dria ovupi nyakua ’diyi ma rua ma ya ya, a’disiku o’du Yehovani ’ye eca ’di, te eri ogogo;

2o’du angu bizani, omuniritini, o’du iritini, angu bipi ini inicici idururiniri! Ekile angu atizani adizu oni driarile, suru amboru okpo beri; drio suru azini sini nga yile ku, yi ma vutia suri azini ngani yi si yile ’dani ku indi cazu a’bianzi kakau ma eli vusi.

3Aci ve yi ma drilia, yi ma vutia aciandre ko tini. Nyaku ovu yi drilia ekile nga Edeninirile, te yi ma vutia rokoru, pirini, adaru ’ba aluni i papi yi driani yo.

4Wura yini ekile akanya wurale, yi nzu ekile ’ba nzupi akanya dria ’diyile.

5Yi ombu oni ma dri mbili ’diyia awu be ekile gari ombani ma ididile, ekile ad ma andre ase a ’wi vepirini nolerile, ekile ’ba okporu ’diyini yi otile ngonde a’disirile.

6Suru yi ovu asi otiza be ’ba nde ma milia, mileti dria oja yi forotoru.

7Yi nzu ongusi agupi okpo be ’diyile, yi tu abi dria ekile ’ba ombaru ’diyile. Yi ad ndru ndru asikarile dria alu alu geri yinia, yi ereni yi otiza yiniasi ku.

8’Ba aluni i agyini omipini yo, yi aci ndru ndru asikarile dria alu alu geri yini ma alia; yi asi geri afa ombani ’diyi ma eseliasi, kuni geri yini ku.

9Yi mbu aku amboru dria, yi nzu abi kaliru ma dria; yi tu fi jo alia, yi fi derisasi ekile oguoule.

10Nyakuni ya ya yi ma drilia, ’bu ya indio Etu pi mba pie yi ovu bizaru, ’bi ’bio ku diko ja.

11Yehova ofu o’duko ini asikari ongulumuru ma drilia, a’disiku pari erini hema asozuri ovu amboru tu; ’ba i ma e’yo ’yepiri ovu okporu tu. Te o’du Yehovaniri ovu ambore, eri uriuriru tu; a’dini nga eco anini ya?

12Te di curu’do, Yehova kini, emi oja emi ma vu emi asi driasi, nyaka ’dazu, awu wowo mindresi, candi ’bazu;

13emi osi asi emini, te bongo suza emini’i ku. Emi oja emi Yehova Mungu emini vu, a’disiku eri asi ndriza be yiki be tre, ’bani adra mbele ku, eri ga tre yiki ale berisi, omvi asi ini, e’yo onzi ejizu ’ba dria ku.

14A’di nini ya, kani eri nga oja asi ini omvizu asi ndriza kuzu eri vutia, ada edeta anyafurasiri azini edeta afa mvuzasiri Yehova Mungu emini dri yani?

15Emi vu guka Zionia; emi ’ba o’du nyaka ’dazuri alaru; emi eku okuta inzizaruri;

16emi oku ’ba. Emi ede ’ba ongulumuru alaru; emi oku mbaza; emi oku anzi nyiri odekua ba ndrupi ’diyi pie. Ezio ma efu jo aliza ini aliasi ra, azini amurua ma efu jo ini aliasi ra.

17Kuhani, ’ba azi ngapi Yehova dri ’diyi ma owu mindresi jobileko pi ma eselia pari edeta edezuri be; yi ma ’yo, Mi ku ’ba mini fo, Yehova la! Mi fe yila mini ma ovu onzozaru ku, juru ma nya opi yi drilia ku. ’Ba ma ’yo juru ma eselia kini, Mungu yiniri ngoa ya? ’dini a’disi ya?

180’du ’dasi Yehovani nga ovu a’yasi angu erini ma e’yosi, nga yiki ’ba ’ba erinisi.

19Yehova omvi e’yo ’yozu ’ba ini tia kini, Mi ndre, ma nga nganu pi ma ti pe emi vu patiefi ma su pie, odu pie, te emi nga tra ani; azini ma ngani fe emi onzo juru eselia dika ku.

20Ma nga asikari ongulumuru engapi angu andralerua ’diyi ofu ji emi ageiarisi ziri, ma nga yi dro angu a’wiru piriniria; esele drileri ma nga dro mi etuni efurialerori ma alia, esele vileri ma nga dro miri etuni derialeruri ma alia; aji onzi erini nga efu, nguza erini nga ngu onzi, a’disiku eri ’ye e’yo ambo ambo ’diyi.

21Mi ru ku, angu la; mi ovu ayikosi azini nyonasi, a’disiku Yehova ’ye e’yo ambo ambo ’diyi ’bo

22Emi ru ku, emi anyapa asea ’diyi, a’disiku iribi roko dria ’diyi idi idi; patini efi ’ya ’ya, elio pati pi efi ’ya okposi pati zabibuni be.

23Emi ovu ayikosi, Zioni anziyi la, emi ovu nyonasi Yehova Mungu eminisi; a’disiku fe emi dri ozoo ebaaniri o’biza kililirisi, fe ozooni ’dizu emi dri, ozoo ebaaniri, ozoo ecaaniri be, ekile okorile.

24Akuma dria nganuni nga ga tre, azini imvu ma alia patiefi ma su pi nga ga tre odu be, drini nga era va.

25Ma nga eli ombi iniari pini ndra nyale ombi kulumburu pie, o’dova pie, ombi kakawia pie ’diyi omvi emi dri; diyi ovu asikari ongulumuru ndra mani ti pele emi eselia ’diyi.

26’Dini emi nga afa nya tu, nga tra tu indi, te emi nga ani Yehova Mungu eminiri e’yo osutaru ’yepi emi vuri ma ru inzi. ’Ba mani ngani ovo drinzasi ’dani ’dani ku.

27Te emi nga ni ra kini ma ovu Israeli ma eselia indi, azini ma Yehova Mungu eminiri ma’i, andini yo. ’Ba mani ngani ovu drinzasi ’dani ’dani ku, Munguni Orindi osuzu ’ba driari

28’Di ma vutia eri nga eca ’dini, ma nga Orindi mani osu ’ba rua ari be ’diyi ma dria dria; te agupianzi emini ezoanzi emini be, yi nga e’yo ondri, mbaza emini orobini nga yi obini, karile emini yi nga eceta ndre,

29O’du ’dasi ma nga Orindi mani osu ati’ba pi ma dria oku ati’baru ’diyi be.

30Ma nga eceta osutaru ece ’bua, nyakua indi: ari pi, aci pie, acika pa sopi piriru ’diyi pie.

31Etuni nga i oja iniru, mbani nga i oja ariru, de nga o’du amboru uriuriru Yehovaniri ecani ku.

32Eri nga di eca ’dini, ’ba dria alu alu Yehova ma ru omvepi ’diyi nga yi pa ra; a’disiku oni Zioniaria azini Yerusalemu ma alia ’ba azi ’diyi nga yi pa ra, ekile Yehovani ’yolerile, azini ’ba jolokoru acepi ’diyi ma eselia ’ba Yehovani omvele ’diyi indi.

← Chapter 1 Jump to: Chapter 3 →