Ruth 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Naomi edri erini nga ’yo eri tia, Ma zia, ma ma nda pari mini ava lizuri, e’yo mini ma ovu ani onyiru beni ku ya?

2Te Boazi nde mini muzu ezoanzi erini ma eseliari eri ori’ba amani yo ya? Mi ndre, andru ini ’disi eri ondu co akuma dria.

3Ka’dini mi mu mi rua oji ra, mi efi mi rua odusi, mi su bongo mini, mi si akuma dria; te mi ma ece mi agu nde dri ku de nga eri deni nyaka nyaza, afa mvuza be ku.

4Te eri nga eca ’dini, eri ka la ’bo, mi nga pari erini lazuri ndre kaka; mi di nga fi bongo eri ma paari zi lazu va; eri nga e’yo mini ngale ’yeleri olu mi tia.

5Eri nga e’yo omvi tinia, E’yo dria mini ’yoleri ma nga ’ye ra.

6Eri nga di si akuma dria ani, nga e’yo dria i ma edrini azileri ’ye ra.

7Boazi ka nya de ’bo, ka mvu fudri indi, eri ma asi ka ovu ayikosi, eri mu la va anya okuleri ma kalaa. Ka’dinile eri nga mu e’yere bongo paniri zi, lazu va.

8Eri nga eca ’dini, iniayii agu nde nga ga ci urisi, nga i oja ra, azini mi ndre, oku la va eri ma paaleru

9Eri nga ’yo ra, Mi a’di’i ya? Eri nga e’yo omvi, Ma ati’bo mini Rutu’i; mi ma ’be mi bongo ati’bo mini ma dria, mini lovule ori’ba ogogonirisi.

10Eri ’yo ra, Yehova ma fe mi dri asi ndriza, ma zia la! Mi ece yiki mini curu’do aga mini ecele okori dria ra, mini karile, kani alioru kani afa e’iro, ma vuti bile kurisi.

11Te di, ma zia la, mi ma ru ku; ma nga mi dri e’yo mini ’yoleri ’ye dria ra; a’disiku ’ba amani aku amboru ma alia ’diyi dria yi ni ra mi ovu oku acipi kililiruri.

12Adaru ma ovu ori’ba mini ovupi mi be ogogori ra ’bo, te di, ’ba azini ovupi ogogo to ma agapi rari indio

13Mi ma te ’doa ini ’dorisi, o’bitisi eri nga ovu ’dini, agu nde ka le ini azi ori’baniri nga mi dri, onyiru; eri ma nga azi nde ori’baniri ra; te eri ka le azi ori’baniri nga mi dri ku, ekile Yehovani ovule idri berile, ma nga azi nde ori’baniri nga mi dri ma’i, Mi la va kpere o’bitisi.

14Ka’dinile eri la eri ma paaleru kpere o’bitisi, te eri enga drio de nga ’ba econi yi agyi nizaru ’di a’di’i yari ku; te eri ’yo ra, ’Ba ma ni kini oku emu teakumadriara, ’diniku.

15Eri ’yo ra, Mi ma eji bongo ’beza mini ogogo, mi bi tini ci, Eri nga eri bi ra, eri o’bi eri dri ondu afazu azia fe drinia; eri nga di mvi aku amborua ndo,

16Eri ka mvi edri vu ’bo, edri ’yo ra, E’yo ngoni ya, ma zia 1a? Eri nga ani e’yo dria agu ndeni ’yele eri beri ece.

17Eri ’yo vini indi, Eri fe ma dri ondu afazu azia ’doyi, a’disiku eri ’yo ra, Mi ma mvi mi edri vu pirini ku.

18Eri nga ’yo ani, Mi ri nga e’yere, ma zia la, de nga mi nini e’yo nga i de ngoni yari ku, a’disiku agu nde ngani avami ku de nga deni e’yo dria andru ku.

← Chapter 2 Jump to: Chapter 4 →