Ruth 4

Lugbara (E’yo Siza Alatararu Munguniri BIBLIA)

← Chapter 3 Jump to:

1Boazi nga di mu aku amboru ma kalitilia, nga ri va ’dale; azini mi mire, ’ba nde ori’baru ndraka Boazini e’yoni ’yoleri aga letia. Eri nga eri omve ’dini, Ma agyi afa la! mi oja mi, mi ri va ’doa. Eri nga i oja ri va ani.

2Eri nga ’ba ’wara aku ndea ’diyi omve mudri, nga ’yo yi tia, Emi ri va ’dia. Yi nga ri ra.

3Eri nga di ’yo ori’ba tekari ma tia kini, Naomi emvipi angu Moabuasiri fe angu esele ndra ovupi adripi amani Elimeleki vileri je.

4Te ma ega e’yo nde ecezu mi tia kini, Mi ma je eri ’ba ovupi ’doa ’diyi ma milia, ’ba ’wara amani ma milia indio Mi ka le eri je dika, mi je ki; te mi ka le je ku, mi olu mani, ma ma ni ani. A’disi ya ’ba azini ngapi jepiri yo pe lu mi’i, mi vutia ma’i. Eri ’yo ra, Ma nga eri je ra.

5Boazi nga di ’yo dika, Etu mini amvu jezu Naomi dririsi, mi ma je eri Rutu Moabu ezorori dri indi, eri agu drapiri ma awuzi, mi ma idri ’ba drapi ’bori ma ru angu erini a’ile awitaruri ma alia ani.

6Ori’ba nde ogogori nga di ’yo ra, Ma econi eri je afa maniru ku, ma kazu awita ma vileri ezazu ku. Mi ma fi ma paria angu jezu mi’i ka, mani ecole eri jele kurisi.

7Isu adriza a’bini andra driorisi ’ ’ba Israelini ma eselia ovu ’dini, ’bani angu jeria dika, kani afa aleria: yi ka le e’yo ma ti efi okporu, kini ’ba adri enyiriko paari tru fe i ma agyi dri; e’yo a’izu adaru asi driasiri ’ba ece ndra ani ’dini.

8Ka’dinile ori’ba nde nga ’yo Boazi ma tia, Mi je mi’i ka. Eri nga di enyiriko paari tru ra.

9Boazi nga di ’yo ’ba ’wara ’diyi ma tia ’ba dria be, kini, Emi ovu andru ’ba e’yo eti ndrepi ’diyiru, kini, ma je ma’i Naomi dri afa ovupi ndra Elimeleki vile ’diyi dria ’bo, azini afa dria ndra ovupi Kiliona pi vile Malona be ’diyi indi.

10Azini dika ma omvi Rutu Moabu ezoru, Malona vile awuziri oku maniru ’bo, ’ba drapi ’bori ma ru idrizu angu erini a’ile awitaruri ma alia, ’ba drapi ’bori ma ru kazu avizu adripi erini ma eselia ku, pari erini ma kalitilia ku indi; emi ovu di ’ba e’yo eti ndrepi ’diyiru andru,

11’Ba dria ovupi kalitilia ’diyi nga ’yo ’ba ’wara be indi, kini, Ama ovu ’ba e’yo eti ndrepi ’diyiru ra. Yehova ma fe oku fipi mi joa ’diri ma ovu ekile Rakeli pile Lea be, oku nde iri yi fe ndra suru ’ba Israelini ezu ra. Mi ma ’ye onyiru Efrata ma alia, mi ru ma ku Betelehemua fo;

12anzi Yehovani ngale fele mi dri oku ’disi ’diyi ma fe jo mini ma ovu Perezi, Tamarini tile Yuda driri, ma jole.

13E’yo ’dirisi Boazi omvi di Rutuni ra, eri nga ovu oku eriniru; eri nga fi eri vu ani, Yehova nga fe eri ma isu mva, eri nga agimva osi.

14Oku azi nga ani ’yo Naomi tia kini, Awa’difo, Yehova ma ovu inzizaru erini andru mi kule ori’ba ogogori kokoru kurisi; ru erini ma ku Israeli ma eselia!

15Eri nga ovu mi dri ’ba idri fepi dikariru, nga mi dri nyaka fe de mi ovu dezaru; a’disiku mi zia mi lepiri, ovupi mi dri onyiru aga agianzi aziri rari ti erini.

16Naomi nga mva ’du ’ba i ma agatia, nga ofu eri ma endriaru.

17Ka’dinile oku azi ovupi eri ma jo ejelia ’diyi nga di ’yo kini, Osi di agupimva Naomi dri ’bo Yi nga ru erini ’da Obedi’i; eri ovu Yese Daudi ad ma ati’i.

18A’bianzi Perezini ovu ’diyi: Perezi ti Hezironi,

19Hezironi ti Ramu’i, Ramu ti Aminadabu’i,

20Aminadabu ti Nasoni’i, Nasoni ti Salimoni’i,

21Salimoni ti Boazi’i, Boazi ti Obedi’i,

22Obedi ti Yese’i, Yese ti Daudinini.

← Chapter 3 Jump to: