Mark 13

Lahu LHINT (Lahu Shi)

← Chapter 12 Jump to: Chapter 14 →

1Yer suq bon yehg nux awg khuhn tuhz kae che te yand, yawd ved awg laq ghuhd te ghad yawd haq koz vid che, “Sar lar-og, ngawx ser. Khawd-ehg taw maq daq jad che huhx meh teq pa he lehq khawd-ehg taw maq daq jad che yehg teq pa chuhr huh cawg che.”

2Yer suq yawd haq kawq koz vid che, “Ir jad che yehg che teq pa haq nawg mawr-a la. Chuhr huh huhx meh ted dig awg thang ted dig mad cawg thad kha gag su te lug tug yaog,” lehd koz che yaog.

3Yer suq awr lehr, bon yehg nux mehz khuhd suhr phawd awr, Sar lonr keh thag lo mi chehd-ag huh, Per troq, Yar koq, Yod hanr he lehq Anr drehr teq pa lag lehq,

4“Awg ceng u ve teq pa khar thad phehaq tuawg le. Che awg gha lia phehq vehr tez che te yand awg hez khawd-ehg kheh te tuhaz tuawg le,” lehz yawd haq a yax yax khuhd na ngawx che yaog.

5Yer suq i hehd haq kawq koz vid che, “Chaw te ghad-eg liz nig hehd haq maq gha her ka yug beg yug tug sa tiq tar-oq.

6Chaw kha peh vad-ag ngag ved awg meh haq puhd veha lag lehq, Ngag awr lehr yawd yaog lehd koz lehq, chaw kha peh haq her ka yug beg yug tug yaog.

7Maq bawz che he lehq bawz daq veg lehd te chehd che awg lawn haq nig hehd gha kad che te yand, nig hehd kuhz ched che ni ma tad cawg vid. Awg ceng che ve teq pa gha phehaq tug yaog. Kheh ma khuhd, awg leh med mad gag ser.

8Chaw ted ceng he lehq ted ceng, muhd mig te pez he lehq te pez yaq daq jiz daq tug yaog. Chehd kig ted kag peg ted kag awg khuhn lo mig hiz lag tug yaog. Meq che kaz che liz cawag tug yaog. Awg ceng che ve teq pa awr lehr, tuq che khanr che awg cuhz penr lehax te ser che yaog.

9Nig hehd a sug yawd awg ton haq sa tiq teo. Awg lawn ghod ver, jehg sehr phad awg mor teq pa ve laq kuhr awg khuhn su nig hehd haq chid aq vid tug yaog. Bon lawg kig teq pa awg khuhn lo su nig hehd haq jawq tug yaog. Ngag haq te lehq nig hehd muhd mig jawd mawd he lehq jawd mawd nux teq pa mehz khuhd suhr huh gha hox lar lehq, i hehd mehz khuhd suhr huh sax khiz gha khanr tug yaog.

10Ha lehg che bon khuhd awr lehr, chaw ceng awg gha lia haq awg kawd gha mar vid tug yaog.

11Nig hehd haq suhx jehg ax tug su nig hehd haq chid aq vid che te yand, tawd khawd-ehg kheh te gha yaw tug haq awg kawd ta duhd har. Awg yand u ve awg khuhn nig hehd haq tawd yaw cuha che heh lehax yaw-og. Awg lawn ghod ver, tawd yaw che phad awr lehr, nig hehd ma hez, Daq che kehg che Awg ha phu yaog.

12Kheh te lehq, a vix a nax te ghad he lehq te ghad suh tug chid aq daq tug yaog. Awr pa liz, a sug yawd ved awg yad haq chid aq tug yaog. Yad par yad mid teq pa liz, a sug yawd ved awg pa awg ye haq phuhz lehq dawz vehr vid tug yaog.

13Ngag ved awg meh haq te lehq chaw awg gha lia nig hehd haq cand tug yaog. Kheh ma khuhd, awg leh kha gag yeg chehd che chaw awr lehr, thaer khuhq che haq gha tug yaog.

14Liq che haq ghawn che chaw awr lehr che kheh sir-oq. Te lug te sez vix che chaq chiz che awg ceng awr lehr, ma chehd cawd che chehd kig huh chehd che haq nig hehd gha mawg che te yand, Yud daq muhd mig awg khuhn lo chehd che chaw teq pa keh thag lo lawg khoq lo phawe lor.

15Kheh te lehq, yehg awg thang huh chehd che chaw tad kawq yaeq. Med nged ted ceng cear ca yug tug, yehg awg khuhn tad kawq gehe.

16Ha khuhn chehd che chaw liz, a sug yawd ved beg ke ca kawq yueg tug, tad koeq.

17Awg yand u ve awg khuhn yad hu ma he lehq cux pehz nux chehd che chaw yad nehax cawg che chaw teq pa awr lehr, gha duhd har jad tug yaog.

18Awg yand u ve awr lehr, muhd kaz yand maq gha cawd tug bon lawr-oq.

19Awg lawn ghod ver, mig gig haq Ghig sa te phanr che teq ni haq tanr lehq yaq ni kha gag mad phehq lag jaw ser lehq, awg khaz nuhr liz mad kawq phehaq tug tuq jad khanr jad che ted ceng awr lehr, awg ni awg hax u ve teq pa awg khuhn phehaq tug yaog.

20Awg yand u ve haq Jawd mawd Ghig sa maq ngeh vid gha che ver, chaw te ghad-eg liz pong maq gha. Kheh ma khuhd, yawd lez yug lar che chaw teq pa haq te lehq, awg yand u ve haq yawd ngeh vid gha tug yaog.

21Awg yand u ve haq, chaw ted pehg pehar awr lehr, Ngawx-oq, Khreq chuhr huh chehd chehd che yaog. U huh chehd chehd che yaog lehz nig hehd haq koz ax ver, taq yonr.

22Awg lawn ghod ver, ma hez hez che Khreq he lehq ma hez hez che cuh kar var teq pa tuhaz tug yaog. I hehd awr lehr, te gha ver lez yug lar che chaw teq pa haq her ka yug beg yug gha tug, and tug he lehq awg hez teq pa haq te mar vid tug yaog.

23Nig hehd sa tiq teo. Mad phehq lag ser thad loar awg ceng gha lia ngag nig hehd haq koz ax lar che yaog.

24Tuq che khanr che awg yand u ve peg khaz nuhr, awg ni awg hax u ve teq pa awg khuhn, muhd ni naz tud vehr lehq, har pa liz awg ghiz mad kawq pawd.

25Muhd ki sir teq pa muhd nuh maq lo cheag lehq, muhd nuh maq lo cawg che kand pax teq pa liz hiz hiz nad nad te veh tug yaog.

26Kheh te lehq, chaw yad ve Yad phu awr lehr, awg mig awg phond he lehq ir jad che kand pax cawg che awg khuhn mog khuhn yaq che haq su gha mawg tug yaog.

27Awg yand u ve haq muhd uhg cir mig uhg phawd awr lo, mig gig awg leh med te lehq muhd nuh maq awg leh med kha gag, muhd nuh maq cuh yad teq pa haq yawd kae pe lehq, yawd lez yug lar che chaw teq pa haq phawng daq vid tug yaog.

28A kud cehg haq tehz mar che tawd par hax che haq hend yur-oq. Awg mar mar-a lehq awg car car vehr che te yand, muhd god yand gag vehr tez che haq nig hehd sir che yaog.

29Che ve heh te lehq, awg ceng che teq pa phehq lag chehd che haq nig hehd gha mawg che te yand, yawd awr lehr ghaz mir khuh awg pad huh lag gag vehr che haq nig hehd sir-oq.

30Ngag nig hehd haq awg cehg mag koz ax laq, che teq co mad pong veh ser huh liz, awg ceng che awg gha lia phehaq tug yaog.

31Muhd nuh maq he lehq mig naz ma mehx vehr tug yaog. Kheh ma khuhd, ngag ved tawd khuhd awr lehr, ma mehx vehr hawg.

32Awg ni awg hax u ve haq chaw te ghad-eg liz maq sir. Muhd nuh maq cuh yad teq pa liz, Yad phu liz maq sir. Awr pa te ghad lehax sir che yaog.

33Awg yand u ve khar thad lag gag tug haq nig hehd maq sir cheaq te lehq, sa tiq te lehq law lar-oq.

34Awg yand u ve awr lehr, chaw te ghad awg kag awr ve muhd mig lo veh che haq sur che yaog. Yawd ved yehg khuhn tuhz veh thad, yawd ved awg ceg te ghad peg te ghad haq a sug yawd ved kanx chid aq vid lar haz lehq, ghaz mir khuh paog par haq liz kha nehax paog lar tug tawd pid lar haz che yaog.

35Kheh te lehq, yehg sehr phad kawq gag tug awr lehr, muhd phiq huh lehq nar, te khend lo lehq nar, ghaz phuh buhag lo lehq nar, muhd sawx lo lehq nar, khar thad kawq gag tug haq nig hehd maq sir cheaq te lehq, law lar-oq.

36Kheh ma hez ver, yawd teq pear lehax kawq gag lehq, nig hehd yuhq mir ka chehd che haq yawd gha mawg tug yaog.

37Nig hehd haq ngag koz ax lar che heh, chaw awg gha lia haq ngag koz vid che, paog lar-oq,” lehz i hehd haq koz vid che yaog.

← Chapter 12 Jump to: Chapter 14 →