Mark 7

Lahu LHINT (Lahu Shi)

← Chapter 6 Jump to: Chapter 8 →

1Awg yand u ve haq, Yer ruq sar lehnr med lo lag che Phar rir sehd ted pa he lehq liq buhq var te pehg Yer suq chehd huh phoz lag che yaog.

2Yawd ved awg laq ghuhd teq pa laq kuhr mad daq kehg lehq awr cad chehd che haq i hehd gha mawg che yaog. Laq kuhr mad daq kehg lehd koz che awr lehr, awg lid cawg che heh laq kuhr ma chuhd che haq koz che yaog.

3Awg lawn ghod ver, Phar rir sehd teq pa he lehq Yud daq chaw awg gha lia, chaw mawd teq pa pid lar che awg lid teq pa heh te lehq, laq kuhr ma chuhd ver, cad tug ma cad.

4Kax ca hox kawaq huh liz, i hehd a kaz ma chuhd peg ver, cad tug ma cad. Kawz khehd, a khehd, kid mawq khu teq pa haq chuhd che awg lid he lehq awg kag awr ve awg lid laex ceng haq i hehd yehd chehd te chehd che yaog.

5Awg yand u ve haq, Phar rir sehd teq pa he lehq liq buhq var teq pa Yer suq haq na ngawx che, “Nawg ved awg laq ghuhd teq pa awr lehr, chaw mawd teq pa awg lid pehar lar che heh a thoq haq te lehq maq te le. Laq kuhr mad daq kehg lehq a thoq te cad tug cad cheawg le.”

6Yer suq kawq koz vid che, “Chaw her ka var teq paog, nig hehd awg lawn Id sar yaq koz lar che tawd khuhd awr lehr cawd jad che yaog. Yawd buhq lar che, ‘Chaw che ted ceng awr lehr, i hehd ve mawq kaw ngag haq yawz yan chehd liz i hehd ve ni ma awr lehr ngag haq vid daq jad che yaog.

7Chaw yad teq pa teh lar che awg lid awg khad teq pa haq mar vid cheaq te lehq, i hehd ngag haq a kor pi che awr lehr, cuhx kig teq chaweh mad cawg,’ lehd koz buhq lar che yaog.

8Ghig sa pehar lar che tawd khuhd teq pa haq nig hehd chid bag lar haz lehq, chaw yad teq pa ve awg lid teq pa haq nig hehd yug cid chehd che yaog.”

9Yer suq i hehd haq kawq koz vid che, “Nig hehd ve awg lid teq pa haq te gha tug, Ghig sa pid lar che tawd khuhd teq pa haq nig hehd chid bag lar haz gha che law.

10Awg lawn ghod ver Mod ser koz lar che, Nawg ved awr pa awr ye haq yawz yawz yan yan teo. Kheh te lehq, A sug yawd ved awr pa awr ye haq kha muhd kha na koz che chaw te ghad awr lehr, awg cehg mag gha suh che yaog lehd koz lar che yaog.

11Kheh ma khuhd nig hehd awr lehr, Chaw te ghad ghad yawd ved awr pa awr ye haq, ‘Ngag geh kha cawg che nig hehd gha cawd che med nged teq pa awr lehr, Kawr banr phehq che yaog,’ lehd yawd koz ver, yawd ved awr pa awr ye haq nig hehd a cehax liz mad kawq ga vid cuh.

13Teq cax peg teq cax chaw yad geh gha che awg lid teq pa haq nig hehd yehd lehq Ghig sa ve tawd khuhd haq te pehz vid che yaog. U kheh te che awg lid laex ceng haq nig hehd te che yaog,” lehd koz vid che yaog.

14Awg yand u ve khuhn, chaw awg mor nux haq yawd chehd lo kawq kug yug lehq koz che, “Nig hehd awg gha lia ngag ved tawd haq na lehq sir-oq.

15Awg bag phawd awr ve awg ceng awr lehr, chaw yad awg khuhn gehe lehq chaq chiz tug te maq gha. Kheh ma khuhd, chaw yad awg khuhn lo tuhaz che awg ceng awr lehr, chaw yad haq chaq chiz tug te che yaog,” lehz yawd koz che yaog.

17Chaw awg mor nux haq yawd phaz daq lehq yehg khuhn gehe che te yand, tawd par hax u ve awg lawn yawd ved awg laq ghuhd teq pa yawd haq na ngawx che yaog.

18Yer suq i hehd haq kawq koz vid che, “Nig hehd liz na maq gha lehq la. Chaw te ghad awg khuhn, awg bag phawd awr te lehq awg khuhn phawd awr kha gehe che awg ceng gha lia yawd haq chaq chiz tug te maq gha.

19Awg lawn ghod ver, yawd ved ni ma khuhn lo maq gehe. Yawd ved ux peg awg khuhn gehe lehq, khuhd kog yehg khuhn chid bag vehr che yaog,” lehz yawd koz vid che yaog. (Yawd che kheh koz che awr lehr, cad tug dawg tug awg gha lia daq che kehg che yaog lehd koz gad che yaog.)

20Kheh te peg lehq yawd kawq koz che, “Chaw te ghad awg khuhn tuhaz che awg ceng awr lehr, yawd haq chaq chiz tug te che yaog.

21Awg lawn ghod ver, chaw yad ni ma khuhn lo tuhaz che teq pa awr lehr, haeg che haq duhd che, gid yaq che, su med nged khuhd che, chaw haq dawz vehr che, hax chawd hax paz te che, su ved med nged jeg kor haq sex lae che, awg haeg te che, su haq her ka che, te pong te lex che, khawehx che, maq sawnr ma caz koz che, ni ma ir che muh che, ma duhd ngawx vix che, che teq pa yaog.

23Haeg che che awg gha lia awr lehr, awg khuhn phawd awr ve tuhaz lehq, chaw yad haq chaq chiz tug te che yaog,” lehd yawd koz che yaog.

24Awg yand u ve khuhn, yawd u huh tuhz kae lehq, Tud ruq he lehq Sid donr muhd mig phawd awr lo kae che yaog. Yawd yehg te yehg khuhn gehe lehq, chaw te ghad-eg haq liz maq sir cuh vid gad liz, yawd ca khuhd jaz maq gha.

25Kheh ma khuhd, ned chaq chiz geh chehd che yad mid nehax te ghad ve awr ye awr lehr, teq pear lehax Yer suq awg lawn gha kad lehq, yawd yawd chehd lo lag lehq yawd ved khi pad huh boz cuhx chehd che yaog.

26Yawd ved yad mid awg khuhn ned haq ghaq tuhz tug yawd Yer suq haq lawg khawx che yaog. Yad mid u ve awr lehr, Sud rid phid niq muhd mig khuhn chehd che Yud daq chaw ma hez che chaw phehq che yaog.

27Yer suq awr lehr, “Awg yad teq pa haq awg kawd kha buhz ghad car vid ser. Awg yad teq pa ve cad tug haq yug lehq phid teq pa haq car vid ma cawd hawg,” lehz yawd haq koz vid che yaog.

28Yad mid kawq koz che, “Jawd mawd-og, nawg koz che awr lehr cawd che yaog. Kheh ma khuhd, phid teq pa awr lehr, chaw yad nehax teq pa cad sez dawg sez lar che haq teh cuh awg huhx lo ghawz cad che yaog,” lehd kawq koz vid che yaog.

29Yer suq awr lehr, “Nawg che kheh koz cheaq te lehq, koeq lor. Nawg ved yad mid awg khuhn ned tuhz veh che yaog,” lehz yawd haq koz vid che yaog.

30Yad mid u ve yawd yehg lo kawq gaeg che te yand, yawd ved yad mid nehax yuhq phi khuhn yuhq chehd che haq liz, ned tuhz veh vehr che haq liz yawd gha mawg che yaog.

31U ve awg khaz nuhr, Yer suq Tud ruq muhd mig khuhn kawq tuhz veh che yaog. Yawd Sid donr muhd mig huh te lehq Der kar pawd liq muhd mig awg kaw jen huh phanr kae lehq, Gar liq lehd ghig po nux huh gag vehr che yaog.

32Awg yand u ve khuhn, nar puh bag lehq tawd kha nehax yaw maq gha che chaw te ghad haq su Yer suq chehd lo sir veha lag lehq, yawd awg thag huh laq kuhr tar tug i hehd yawd haq lawg che yaog.

33Kheh te lehq, chaw awg mor nux khuhn Yer suq yawd haq sir ve tuhez lehq, awg bag lo veh che yaog. Chaw u ve nar puh khuhn yawd ved laq nuh bez ke lehq, cux ghig pheq lehq yawd ved ha lez haq yug hehr vid che yaog.

34Awg yand u ve haq, Yer suq muhd nuh maq lo chid ngawx peg lehq har kax jad che khuhn sax nux maz ghawg lar lehq, “Ed phar taq” lehd koz che yaog. Cuhx kig awr lehr, phaw vid-oq lehd koz gad che yaog.

35Kheh te lehq, chaw u ve nar puh kad vehr lehq, ha lez awg kud caz nud vehr lehq tawd kha nehax kawq yaw gha che yaog.

36Awg lawn che chaw te ghad-eg haq liz maq gha koz vid tug, Yer suq i hehd haq tawd yuhz vid che yaog. Kheh ma khuhd, yawd i hehd haq sang tawr lar chehd liz, i hehd sang lex lehq su haq koz mar vid che yaog.

37I hehd teq pa and jad lehq koz che, “Yawd awg gha lia haq kha daq ghad te peor. Nar puh bag che chaw teq pa kad vid tug yawd te lehq, kar che chaw teq pa tawd yaw vix tug liz te che yaog,” lehd i hehd koz che yaog.

← Chapter 6 Jump to: Chapter 8 →