Amos 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Gʼuiˬsha ngaˬ hta‸ awˬ ha hkʼaw chi hkʼe hpeu‸ maˍ laˇ ve yoˬ. Jawˇmawˇ ve zuhˇ teˇ hpaˍ hta‸ gʼeu‸ yuˬ peuˬ hkʼaw‸ nawˉ, zuhˇ awˬ suhˉ teˇ pawˆ kʼaw‸ caˍ la chehˇ ve teˇ yanˇ, Gʼuiˬsha lehˬ paˉ ce‸ hkʼa biˇ te hpanˍ chehˇ ve hta‸ ngaˬ gʼa mawˬ ve yoˬ.

2Paˉ ce‸ oˇ ve teˇ hpaˍ lehˬ, mvuhˇmiˬ hkʼaw hkʼa cawˬ taˍ ve awˬ hpa‸ nawˉ lehˍ cawˬ ve awˬ ceuˬ hkʼa peu-eˬ ve hta‸ caˇ baˬ chehˇ ve yoˬ. Oˇ htaˇ ngaˬ lehˬ, Gʼuiˬsha-oˬ, nawˬ ve chaw teˇ hpaˍ ve venˇbaˆ hta‸ a ciˉ hpehˇ piˇ-oˆ. Yawˇ hui hkʼaˬ hkʼe te leh te‸ chehˇ hpeh‸ tuˬ le. Yawˇ hui lehˬ, i jaˇ leh awˬ gʼaˇ nuˇ jaˇ ve yoˬ, teh‸ kʼoˆ piˇ ve yoˬ.

3Oˇ htaˇ Gʼuiˬsha nyi ma kʼaw‸ pa leh, Nawˬ gʼa mawˬ ve awˬ ceuˬ oˇ ve awˬ tehˬ awˬ na hpeh‸ la tuˬ ve maˇ heˆ, teh‸ kʼoˆ ve yoˬ.

4Gʼuiˬsha ngaˬ hta‸ awˬ ha hkʼaw chi hkʼe kʼaw‸ hpeu‸ maˍ laˇ ve yoˬ. Gʼuiˬsha lehˬ aˬ miˍ hta‸ cuˇ leh chaw yaˇ teˇ hpaˍ hta‸ ciˍ yanˍ piˇ tuˬ gu chehˇ ve hta‸ ngaˬ gʼa mawˬ ve yoˬ. Aˬ miˍ oˇ ve lehˬ, miˬguiˬ awˬ hawˉ lo cawˬ ve laˇ tsuhˇ gʼuiˬ hta‸ to‸ baˬ chehˇ leh, miˬguiˬ hta‸ htawˇ tanˬ to‸ la chehˇ ve yoˬ.

5Oˇ htaˇ ngaˬ lehˬ, Gʼuiˬsha-oˬ, aˬ miˍ hta‸ taˇ to‸ laˬ piˇ lawˬ-o‸. Nawˬ ve chaw teˇ hpaˍ hkʼaˬ hkʼe te leh te‸ chehˇ hpeh‸ tuˬ ve le. Yawˇ hui lehˬ i jaˇ leh, awˬ gʼaˇ nuˇ jaˇ ve yoˬ, teh‸ kʼoˆ piˇ ve yoˬ.

6Oˇ htaˇ Gʼuiˬsha nyi ma kʼaw‸ pa leh, Chi ve htawˇ awˬ tehˬ awˬ na hpeh‸ la tuˬ ve maˇ heˆ, teh‸ kʼoˆ ve yoˬ.

7Gʼuiˬsha ngaˬ hta‸ awˬ ha hkʼaw chi hkʼe kʼaw‸ hpeu‸ maˍ laˇ ve yoˬ. Gʼuiˬsha lehˬ, tehˆ nyi tuˬ ve aˉ caˆ hkeh teˇ maˬ yuˬ taˍ leh, gʼo‸ pa teˇ maˬ awˬ paˇ lo huˉ taˍ ve hta‸ ngaˬ gʼa mawˬ ve yoˬ.

8Oˇ htaˇ Gʼuiˬsha lehˬ, Aˍmoˆ-oˬ, nawˬ aˬ hto‸ ma hta‸ gʼa mawˬ ve le, teh‸ ngaˬ hta‸ na nyi laˇ ve yoˬ. Tehˆ nyi tuˬ ve aˉ caˆ hkeh teˇ maˬ hta‸ ngaˬ gʼa mawˬ ve yoˬ, teh‸ ngaˬ kʼaw‸ yaw hkʼaw‸ piˇ ve yoˬ. Oˇ htaˇ yawˇ kʼoˆ ve, Ngaˬ tehˆ nyi tuˬ ve aˉ caˆ hkeh chi ve hta‸ yuˬ taˍ ve lehˬ, ngaˬ ve chaw teˇ hpaˍ hta‸ lawˇ nyi tuˬ awˬ pon hpeh‸ ve yoˬ. Yawˇ hui lehˬ hkʼa deh‸ maˇ tehˆ nyi leh te taˍ ve gʼo‸ pa hkʼa shuˍ hpeh‸ ve yoˬ. Yawˇ hui hta‸ ciˍ yanˍ piˇ tuˬ, chi teˇ pawˆ ngaˬ nyi ma hta‸ kʼaw‸ pa tuˬ ve maˇ heˆ.

9Iˉ caˆ ve awˬ ceuˬ awˬ hkʼaˇ teˇ hpaˍ oˉ kʼoˍ pui chehˇ ve chehˇ kuiˬ teˇ hpaˍ hta‸ ngaˬ te luˬ piˇ tuˬ yoˬ. Iˉsaˍreˍlaˆ chaw hui ve da‸ kehˬ ve chehˇ kuiˬ teˇ hpaˍ htawˇ, luˬ kʼai sheˆ kʼai tuˬ yoˬ. Jawˇmawˇ Yeˍyawˇbaoˍ ve awˬ ceuˬ awˬ hkʼaˇ teˇ hpaˍ hta‸, ngaˬ awˬ leh meuˇ gaˬ la piˇ tuˬ yoˬ, teh‸ kʼoˆ ve yoˬ.

10Oˇ htaˇ, Beˍteˍlaˆ venˇ hkʼaw chehˇ ve paw hkuˇ Aˍmaˍziˆ lehˬ, Iˉsaˍreˍlaˆ ve jawˇmawˇ Yeˍyawˇbaoˍ hta‸ tawˇ chi hkʼe shanˍ feu piˇ ve yoˬ. Aˍmoˆ lehˬ nawˬ hta‸ hpfuhˆ tuˬ awˬ moˍ shawˍ chehˇ ve yoˬ. Yawˇ yaw chehˇ ve tawˇ teˇ hpaˍ lehˬ, mvuhˇmiˬ hta‸ luˬ kʼai piˇ gʼa ve yoˬ.

11Yeˍyawˇbaoˬ lehˬ ma‸ bawˆ kuiˬ lo gʼa suh-e leh, Iˉsaˍreˍlaˆ chaw teˇ hpaˍ lehˬ shu ve mvuhˇmiˬ lo hpeh kʼai ve hta‸ gʼa hkanˍ tuˬ yoˬ teh‸ yawˇ kʼoˆ chehˇ ve yoˬ, teh‸ Yeˍyawˇbaoˍ hta‸ kʼoˆ feu piˇ ve yoˬ.

12Oˇ ve hkʼaw‸ nawˉ, Aˍmaˍziˆ Aˍmoˆ hta‸ kʼoˆ piˇ ve, Tcuh kaˍ paˍ-oˬ, pehˇ-o. Yuˇda‸ mvuhˇmiˬ lo kʼaw‸ kʼo‸-e leh, oˇ kaˬ lo bon ca kʼaw‸ maˍ-o‸. Nawˬ bon maˍ ve pa taw, yawˇ hui nawˬ hta‸ nyi ha‸ shaˉ laˇ piˇ-oˆ.

13Choˬ kaˬ Beˍteˍlaˆ venˇ hkʼaw bon taˇ kʼaw‸ maˍ chehˇ-oˆ. Chehˇ kuiˬ chi lehˬ, jawˇmawˇ oˉ kʼoˍ pui ve chehˇ kuiˬ hpeh‸ leh, bon yehˬ lonˉ choˬ kaˬ lo cawˬ taˍ ve yoˬ, teh‸ kʼoˆ piˇ ve yoˬ.

14Oˇ htaˇ Aˍmoˆ kʼaw‸ yaw hkʼaw‸ leh kʼoˆ ve, Ngaˬ lehˬ gʼaˇ hpfuhˇ caˇ leh bon maˍ toˇ chehˇ ve chaw hpeh‸ ve maˇ heˆ. Ngaˬ lehˬ yawˬ hawˉ paˍ hpeh‸ leh, maˉ nawˆ cehˬ hta‸ ha‸ shaˉ shehˍ hpaˇ hpeh‸ ve yoˬ.

15Ya‸ hkʼaˇ, Gʼuiˬsha lehˬ ngaˬ hta‸ yawˬ hawˉ chehˇ taˍ kuiˬ lo kuˬ yuˬ leh, yawˇ ve Iˉsaˍreˍlaˆ chaw hui hta‸ bon ca maˍ piˇ tuˬ kanˉ chiˇ a‸ laˇ taˍ ve yoˬ.

16Chi hta‸ pa taw, Gʼuiˬsha hkʼaˬ hkʼe kʼoˆ ve hta‸ chi beu‸ na taˍ sheˍ. Iˉsaˍreˍlaˆ chaw hui hta‸ bon maˇ gʼa maˍ piˇ tuˬ leh, hehnˇ chaweh maˇ gʼa deˇ maˍ tuˬ, nawˬ ngaˬ hta‸ tawˍ taˍ laˇ chehˇ ve yoˬ.

17Nawˬ oˇ hkʼe kʼoˆ ve pa taw, Aˍmaˍziˆ-oˬ, Gʼuiˬsha nawˬ hta‸ chi hkʼe kʼoˆ ve yoˬ. Nawˬ miˇ ma lehˬ, venˇ chi hkʼaw meh maˬ lanˉ hpeh‸ la leh, nawˬ ve yaˇ teˇ hpaˍ lehˬ ma‸ bawˆ kuiˬ lo gʼa suh-e tuˬ yoˬ. Nawˬ ve miˬguiˬ teˇ hpaˍ hta‸ shu pehˬ yuˬ leh, nawˬ lehˬ buiˇshaˆaˉnaˆ chaw hui ve mvuhˇmiˬ hkʼaw gʼa suh-e tuˬ yoˬ. Iˉsaˍreˍlaˆ chaw teˇ hpaˍ htawˇ, shu ve mvuhˇmiˬ lo hpeh kʼai ve hta‸ gʼa hkanˍ tuˬ yoˬ, teh‸ Aˍmaˍziˆ hta‸ kʼoˆ piˇ ve yoˬ.

← Chapter 6 Jump to: Chapter 8 →