Amos 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Gʼuiˬsha ngaˬ hta‸ awˬ ha hkʼaw chi hkʼe hpeu‸ maˍ laˇ ve yoˬ. Awˬ ha oˇ ve hkʼaw, iˉ shiˍ keu taˍ ve hkʼawˍ lawˇ teˇ maˬ hta‸ ngaˬ gʼa mawˬ ve yoˬ.

2Oˇ htaˇ Gʼuiˬsha lehˬ, Aˍmoˆ-oˬ, nawˬ aˬ hto‸ ma hta‸ gʼa mawˬ le, teh‸ ngaˬ hta‸ na nyi laˇ ve yoˬ. Iˉ shiˍ keu taˍ ve hkʼawˍ lawˇ teˇ maˬ hta‸ ngaˬ gʼa mawˬ ve yoˬ, teh‸ kʼaw‸ yaw hkʼaw‸ piˇ ve yoˬ. Oˇ htaˇ Gʼuiˬsha ngaˬ hta‸ chi hkʼe kʼoˆ laˇ ve yoˬ. Ngaˬ ve Iˉsaˍreˍlaˆ chaw teˇ hpaˍ lehˬ, luˬ kuiˬ sheˆ kuiˬ lo gaˬ la paˇ neˇ peuˬ ve yoˬ. Yawˇ hui hta‸ ciˍ yanˍ piˇ tuˬ ngaˬ ve nyi ma hta‸ kʼaw‸ pa tuˬ ve maˇ heˆ.

3Oˇ ve teˇ nyi gaˬ kʼo, hawˉ yehˬ hkʼaw kʼa chehˇ ve kʼa muiˬ hkawˇ teˇ hpaˍ lehˬ, dawˇ haˍ leh kuˬ hawˬ ve awˬ hkawˇ kʼaw‸ hpeh‸ la tuˬ yoˬ. Teˇ kaˬ le le lo suh taˍ ve awˬ to hkʼa biˇ cawˬ taˍ leh, gawˬ cu gawˬ pehˆ hpeh‸ la tuˬ yoˬ, teh‸ ngaˬ hta‸ kʼoˆ laˇ ve yoˬ.

4Mvuhˇmiˬ hkʼaw chehˇ ve haˍ ve gʼawˇ ve chaw hui hta‸ naˆ tinˍ taˍ leh, yawˇ hui hta‸ te luˬ te sheˆ piˇ tuˬ gʼaˇ hte‸ coˇ caˇ chehˇ ve nawˬ hui teˇ hpaˍ, chi hta‸ na taˍ sheˍ.

5Ngaˬ hui ve awˬ shiˍ awˬ nu teˇ hpaˍ hta‸ ca hawˇ tuˬ, da‸ kehˬ ve awˬ nyi teˇ hpaˍ ponˬ kʼai htaˇ hkʼa gaˬ ca law chehˇ maˇ hpeh‸. Ngaˬ hui ve mawˇ teˇ hpaˍ hta‸ kʼaw‸ caˉ hawˇ hpeh‸ tuˬ, shinˉ nyi hkʼaˬ htaˆ peuˬ tuˬ le. Oˇ htaˇ, ngaˬ hui lehˬ mawˇ hpfuhˇ kʼaw‸ te hkʼaˆ piˇ leh, shu hta‸ heˍ caˇ tuˬ yoˬ.

6Maˇ da‸ ve caˬ shiˍ hta‸, ngaˬ hui awˬ hpfuhˇ hkʼaˆ chaweh te hawˇ piˇ tuˬ yoˬ. Hkuiˉ nuˆ teˇ ceh ka‸ vuiˬ tcuhˉ maˇ gʼa leh, shu ve jeˬ hta‸ kʼaw‸ shaiˍ piˇ maˇ gʼa ve haˍ gʼawˇ jaˇ ve chaw hui hta‸ ngaˬ hui vuiˬ yuˬ leh ngaˬ hui ve awˬ ceˬ te tcuh tuˬ yoˬ, teh‸ nawˬ hui kʼoˆ chehˇ ve yoˬ.

7Iˉsaˍreˍlaˆ ve jawˇmawˇ Gʼuiˬsha chi hkʼe kʼoˆ leh hkanˍ taˍ ve yoˬ. Yawˇ hui te ve haiˬ ve kanˉ teˇ hpaˍ hta‸ ngaˬ teˇ pawˆ ka‸ leunˇ kʼai tuˬ ve maˇ heˆ.

8Chi hta‸ pa taw, miˬ hiˆ la leh mvuhˇmiˬ hkʼaw chehˇ ve chaw hkʼa peu-eˬ gʼa dawˇ haˍ jaˇ tuˬ yoˬ. Iˉsaˍreˍlaˆ mvuhˇmiˬ hkʼa peu-eˬ, Niˍlaˆ iˉ kaˆ lawˬ hkʼa shuˍ uiˍ taˆ la taˉ leh kʼaw‸ yawn kʼai tuˬ yoˬ.

9Oˇ ve teˇ nyi gaˬ kʼo, mvuhˇ nyi lehˬ sha gʼuˇ htaˇ lo‸-e tuˬ yoˬ. Hkʼe te leh tanˇ vanˇ htaˇ miˬguiˬ hkʼoˆ naˆ ho‸ lehˍ hpeh‸ la tuˬ yoˬ. Ngaˬ Gʼuiˬsha chi hkʼe kʼoˆ taˍ ve yoˬ.

10Nawˬ hui te chehˇ ve pawehˇ teˇ hpaˍ hta‸ ngaˬ dawˇ haˍ tuˬ awˬ ceuˬ hpeh‸ la piˇ leh, nawˬ hui ve kʼa muiˬ hkawˇ teˇ hpaˍ hta‸ kuˬ hawˬ paˆ hawˬ ve awˬ hkawˇ kʼaw‸ hpeh‸ la piˇ tuˬ yoˬ. Nawˬ hui oˉ kʼoˍ nuˆ leh meh htuˉ pui hpa gʼa veu‸ deh tuˬ ngaˬ te laˇ tuˬ yoˬ. Nawˬ hui lehˬ, a shu yawˇ ve yaˇ paˍ awˬ pon dawˇ haˍ chehˇ ve awˬ pa awˬ e hkʼa shuˍ hpeh‸ la tuˬ yoˬ. Awˬ nyi oˇ ve teˇ nyi lehˬ, awˬ leh meuˇ hkʼa gaˬ dawˇ haˍ jaˇ ve awˬ nyi hpeh‸ tuˬ yoˬ.

11Mvuhˇmiˬ awˬ hkʼaw lo ngaˬ meu‸ lonˉ kaˆ lonˉ gaˬ la piˇ tuˬ awˬ yanˇ neˇ la chehˇ ve yoˬ. Chaw yaˇ teˇ hpaˍ caˇ tuˬ maˇ cawˬ leh meu‸ ve kaˆ ve teˇ ceuˬ maˇ heˆ. Yawˇ hui iˉ kaˆ maˇ cawˬ leh iˉ kaˆ shiˉve ka‸ maˇ heˆ. Yawˇ hui lehˬ, Gʼuiˬsha ve tawˇ hkawˇ hta‸ meu‸ jaˇ kaˆ jaˇ tuˬ yoˬ. Ngaˬ Gʼuiˬsha chi hkʼe kʼoˆ taˍ ve yoˬ.

12Chaw yaˇ teˇ hpaˍ lehˬ, awˬ na hpawˇ lo te leh awˬ hawˉ hpawˇ lo maˇ kʼoˆ, mvuhˇ nyi tawˆ hpawˇ lo te leh mvuhˇ nyi kʼehˬ hpawˇ lo maˇ kʼoˆ hpaw-e tuˬ yoˬ. Yawˇ hui gaˬ ve chehˇ kuiˬ teˇ kaˬ le le lo, Gʼuiˬsha ve tawˇ hkawˇ hta‸ gʼa‸ ca toˇ chehˇ tuˬ yoˬ. Ya‸ hkʼaˇ, ca mawˬ tuˬ ve maˇ heˆ.

13Oˇ ve teˇ nyi htaˇ, da‸ jaˇ ve yaˇ miˇ haˉ teˇ hpaˍ leh, awˬ gʼaˇ uiˍ ve chaw haˉ paˍ teˇ hpaˍ htawˇ, iˇ kaˆ shiˉ jaˇ ve pa taw maˇ nawˇ maˇ hteh te paiˍ tuˬ yoˬ.

14Saˍmaˍriˆ mvuhˇmiˬ hkʼaw cawˬ ve shaˉ ho‸ teˇ hpaˍ hta‸ gʼaˇ va chehˇ ve chaw hui leh, Danˍ ve gʼuiˬsha, Beˍraˍsheˍbaˆ ve gʼuiˬsha ve awˬ meh hta‸ cuˇ leh hkanˍ taˍ ve chaw hkʼa peu-eˬ paiˍ tuˬ yoˬ. Yawˇ hui lehˬ, teˇ pawˆ ka‸ kʼaw‸ tu la gaˬ tuˬ ve maˇ heˆ, teh‸ Gʼuiˬsha kʼoˆ ve yoˬ.

← Chapter 7 Jump to: Chapter 9 →