Galatians 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Ngaˬ kʼoˆ gaˇ ve lehˬ chi hkʼe yoˬ. Awˬ shinˉ caˇ shehˍ hpaˇ teˇ gʼaˇ lehˬ, awˬ shinˉ hkʼa peu-eˬ awˬ hkʼoˆ hta‸ yawˇ jawˇmawˇ hpeh‸ ve htawˇ, yawˇ yaˇ ehˉ hpeh‸ chehˇ ve teˇ yanˇ htaˇ, awˬ ceˬ teˇ gʼaˇ hta‸ maˇ peun da‸.

2Awˬ pa tinˍ taˍ ve awˬ yanˇ maˇ gaˬ sheˍ ve ceh ceh, yaˇ ehˉ lehˬ shaw shehˍ hpaˇ leh ha‸ shaˉ shehˍ hpaˇ teˇ hpaˍ awˬ hawˉ lo chehˇ taˍ ve yoˬ.

3Oˇ ve hkʼa shuˍ shuˍ, ngaˬ hui yaˇ ehˉ hpeh‸ chehˇ sheˍ ve teˇ yanˇ, miˬguiˬ hta‸ caˉ da‸ ve awˬ liˇ awˬ hkʼaˇ teˇ hpaˍ awˬ hawˉ lo awˬ ceˬ gʼa te chehˇ ve yoˬ.

4Awˬliˇtawˇhkawˇ awˬ hawˉ lo hpeh taˍ ve chaw teˇ hpaˍ hta‸ vuiˬ hkʼaw‸ piˇ leh, ngaˬ hui Gʼuiˬsha ve awˬ yaˇ hpeh‸ la tuˬ, awˬ yanˇ biˇ la ve teˇ yanˇ, Gʼuiˬsha yawˇ ve Yaˇ hpu hta‸ peu laˇ ve yoˬ.

5Yaˇ hpu lehˬ, yaˇ miˇ teˇ gʼaˇ geh paw la leh, awˬliˇtawˇhkawˇ awˬ hawˉ lo paw la ve yoˬ.

6Nawˬ hui lehˬ, awˬ yaˇ awˬ duˬ hpeh‸ ve pa taw, Gʼuiˬsha lehˬ yawˇ ve Yaˇ hpu ve Awˬ ha hpu ngaˬ hui ve nyi ma awˬ hkʼaw lo peu laˇ leh, Awˬ ha hpu lehˬ, Aˍbaˆ A pa-oˬ teh‸ kuˬ ve yoˬ.

7Hkʼe te leh, nawˬ lehˬ awˬ ceˬ maˇ kʼaw‸ hpeh‸. Nawˬ lehˬ awˬ yaˇ hpeh‸ ve yoˬ. Awˬ yaˇ hpeh‸ ve kʼo, Gʼuiˬsha hta‸ pa taw awˬ shinˉ caˇ shehˍ hpaˇ htawˇ hpeh‸ ve yoˬ.

8Nawˬ hui Gʼuiˬsha hta‸ maˇ shiˍ sheˍ ve teˇ yanˇ, maˇ heˆ heˆ ve gʼuiˬsha teˇ hpaˍ awˬ hawˉ lo nawˬ hui awˬ ceˬ te chehˇ ve yoˬ.

9Ya‸ hkʼaˇ, chi beu‸ nawˬ hui Gʼuiˬsha hta‸ shiˍ ve awˬ hkʼoˆ ka‸, awˬ tehˬ kʼoˆ kʼo Gʼuiˬsha nawˬ hui hta‸ shiˍ chehˇ ve yoˬ. Hkʼe ka‸, awˬ gʼaˇ nuˇ leh haˍ gʼawˇ jaˇ ve awˬ ceuˬ teˇ hpaˍ geh aˬ hto‸ ma te nawˬ hui kʼaw‸ hpfuhˆ kʼo‸-e ve le. Awˬ ceuˬ oˇ ve teˇ hpaˍ awˬ hawˉ lo aˬ hto‸ ma te nawˬ hui awˬ ceˬ kʼaw‸ te gaˇ ve le.

10Nawˬ hui lehˬ, awˬ hkʼaw‸ awˬ nyi, ha pa, awˬ tcuhˉ awˬ yanˇ teˇ hpaˍ hta‸ kʼaw‸ ce kan chehˇve law leˇ.

11Ngaˬ nawˬ hui awˬ pon gʼaˇ hte‸ gʼaˇ na te ve lehˬ, hkʼe leˇ hpeh‸ ve yoˬ hehˉ teh‸ ngaˬ dawˇ haˍ ve yoˬ.

12Awˬ viˉ awˬ nyi teˇ hpaˍ-oˬ, ngaˬ nawˬ hui hkʼa shuˍ shuˍ hpeh‸ la peuˬ ve pa taw, nawˬ hui htawˇ ngaˬ hkʼa shuˍ shuˍ hpeh‸ la tuˬ ngaˬ nawˬ hui hta‸ lawˬ hkawˉ ve yoˬ. Nawˬ hui ngaˬ hta‸ te‸ chiˉ maˇ te ya‸ laˇ jaw.

13Ngaˬ awˬ to naˬ ve pa taw, ngaˬ nawˬ hui hta‸ awˉ lawˉ teˇ pawˆ ha lehˬ ve bon hkawˇ gʼa maˍ laˇ ve hta‸ nawˬ hui shiˍ ve yoˬ.

14Ngaˬ awˬ to naˬ ve chi lehˬ, nawˬ hui awˬ pon hkanˍ haˍ ve htawˇ, nawˬ hui ngaˬ hta‸ maˇ shawˍ maˇ caˆ maˇ te, ngaˬ hta‸ maˇ baˬ taˉ. Nawˬ hui lehˬ, Gʼuiˬsha ve mvuhˇ naw ma tcuh yaˇ hta‸ ha‸ yuˬ ve hkʼa shuˍ shuˍ maˇ kʼoˆ, Yeˍsuˆ Hkri‸ hta‸ ha‸ yuˬ ve hkʼa shuˍ shuˍ maˇ kʼoˆ, ngaˬ hta‸ ha‸ yuˬ laˇ ve yoˬ.

15Ponˬ laˬ htaˇ nawˬ hui ha lehˬ puiˉ ve teˇ ceuˬ chi beu‸ hkʼaˬ lo mehˉ kʼai ve le. Awˬ lawn kʼo, nawˬ hui ve mehˆ shiˍ hta‸ kʼehˉ tawˆ leh ngaˬ hta‸ pe‸ laˇ hpeh‸ ve hkʼe kʼo, pe‸ laˇ peuˬ teh‸, nawˬ hui awˬ lawn ngaˬ shaˉ hkiˆ hkanˍ hpeh‸ ve yoˬ.

16Chi beu‸ ngaˬ nawˬ hui hta‸ hteˇ lehˍ kʼoˆ laˇ ve pa taw, ngaˬ nawˬ hui ve canˇ paˍ hpeh‸ la ve laˇ.

17Chaw oˇ ve teˇ hpaˍ lehˬ, nawˬ hui awˬ pon gʼaˇ hte‸ awˬ bon te laˇ ve htawˇ, da‸ ve teˇ ceuˬ hta‸ dawˇ law leh te ve maˇ heˆ. Yawˇ hui awˬ pon nawˬ hui gʼaˇ hte‸ awˬ bon te piˇ tuˬ yawˇ hui dawˇ law ve pa taw, nawˬ hui hta‸ awˬ baˬ hpawˇ lo chehˇ tcuh gaˇ ve yoˬ.

18Da‸ ve teˇ ceuˬ awˬ pon shu nawˬ hui hta‸ gʼaˇ hte‸ awˬ bon te laˇ ve lehˬ, hkʼaˬ htaˆ ka‸ da‸ ve yoˬ. Ngaˬ nawˬ hui geh chehˇ ve teˇ yanˇ ceh tiˉ da‸ ve maˇ heˆ.

19Ngaˬ ve yaˇ ehˉ teˇ hpaˍ-oˬ, Hkri‸ nawˬ hui awˬ hkʼaw lo hkʼa biˇ chehˇ la htaˇ hkʼa gaˬ, yaˇ paw tuˬ naˬ ve hta‸ nawˬ hui awˬ pon ngaˬ teˇ pawˆ gʼa kʼaw‸ hkanˍ chehˇ ve yoˬ.

20Ngaˬ nawˬ hui awˬ lawn dawˇ maˇ tawˆ ve pa taw, chi beu‸ ngaˬ nawˬ hui geh teˇ geh chehˇ gaˇ leh, ngaˬ kʼoˆ hehnˇ ve awˬ hkawˇ hta‸ kʼaw‸ pa gaˇ ve yoˬ.

21Awˬliˇtawˇhkawˇ awˬ hawˉ lo chehˇ gaˇ ve chaw teˇ hpaˍ-oˬ, awˬliˇtawˇhkawˇ hta‸ nawˬ hui maˇ kaˇ laˇ. Ngaˬ hta‸ hto laˇ-oˆ.

22Awˬ lawn kʼo, Li‸ hpu hkʼaw chi hkʼe bvuh‸ taˍ ve, Aˍbraˍhanˍ lehˬ yaˇ paˍ nyiˇ gʼaˇ cawˬ ve yoˬ. Teˇ gʼaˇ lehˬ, awˬ ceˬ ma ve yaˇ hpeh‸ leh, teˇ gʼaˇ lehˬ awˬ ceˬ ma maˇ heˆ ve yaˇ miˇ teˇ gʼaˇ ve yaˇ hpeh‸ ve yoˬ.

23Awˬ ceˬ ma ve yaˇ paˍ lehˬ, awˬ suhˍ awˬ shaˍ a loˍ hta‸ pa taw paw la ve yoˬ. Awˬ ceˬ ma maˇ heˆ ve yaˇ miˇ teˇ gʼaˇ ve yaˇ paˍ lehˬ, ka ti‸ piˇ taˍ ve hta‸ caˉ da‸ ve awˬ hkʼaw lo paw la ve yoˬ.

24Awˬ lawn chi hta‸ tehˆ nyi leh henˇ yuˬ tuˬ cawˬ ve yoˬ. Yaˇ miˇ oˇ ve nyiˇ gʼaˇ lehˬ, ka ti‸ shaˉ caˆ oˇ ve nyiˇ ceuˬ hpeh‸ ve yoˬ. Teˇ gʼaˇ lehˬ, Siˉnaˆ hkʼaw hta‸ caˉ da‸ ve Haˍgaˍraˆ yoˬ. Yawˇ yaˇ paw la piˇ ve lehˬ, awˬ ceˬ hpeh‸ la tuˬ awˬ pon paw la piˇ ve yoˬ.

25Haˍgaˍraˆ lehˬ, Aˍraˆ mvuhˇmiˬ awˬ hkʼaw lo cawˬ ve Siˉnaˆ hkʼaw hpeh‸ leh, chi beu‸ cawˬ taˍ ve Yeˍruˆsaˍlehnˍ venˇ hta‸ shuˍ ve yoˬ. Awˬ lawn kʼo, yawˇ lehˬ yawˇ ve awˬ yaˇ teˇ hpaˍ geh teˇ geh awˬ ceˬ hpeh‸ ve yoˬ.

26Ya‸ hkʼaˇ, mvuhˇ naw ma lo cawˬ ve Yeˍruˆsaˍlehnˍ venˇ lehˬ, awˬ ceˬ ma maˇ heˆ ve yaˇ miˇ hpeh‸ leh, ngaˬ hui ve awˬ e hpeh‸ ve yoˬ.

27Awˬ lawn kʼo, Li‸ hpu hkʼaw chi hkʼe bvuh‸ taˍ ve, Yaˇ maˇ paw jaw ve chaw meh ma-oˬ, ha lehˬ chehˇ-oˆ. Yaˇ paw tuˬ maˇ gʼa hkanˍ ve yaˇ miˇ-oˬ, ha lehˬ leh gʼaˇ hte‸ kuˬ chehˇ-oˆ. Awˬ lawn kʼo, awˬ hpawˇ maˇ cawˬ ve yaˇ miˇ lehˬ, awˬ hpawˇ cawˬ ve yaˇ miˇ a‸ kehˉ awˬ yaˇ awˬ duˬ cawˬ maˇ ve yoˬ teh‸ bvuh‸ taˍ ve yoˬ.

28Awˬ viˉ awˬ nyi teˇ hpaˍ-oˬ, ngaˬ hui lehˬ Iˉcaˆ hkʼa shuˍ shuˍ, ka ti‸ piˇ taˍ ve hta‸ caˉ da‸ ve awˬ yaˇ awˬ duˬ teˇ hpaˍ hpeh‸ ve yoˬ.

29Oˇ htaˇ, awˬ suhˍ awˬ shaˍ a loˍ hta‸ pa taw paw la ve yaˇ teˇ gʼaˇ hta‸ fawˉ mehˍ ve hkʼa shuˍ shuˍ, chi beu‸ ka‸ oˇ hkʼe hpeh‸ ve yoˬ.

30Ya‸ hkʼaˇ, Li‸ hpu hkʼaˬ hkʼe kʼoˆ taˍ ve le. Awˬ ceˬ ma leh yawˇ ve yaˇ paˍ hta‸ gʼa‸ kʼoˬ-o‸. Awˬ lawn kʼo, awˬ ceˬ ma ve yaˇ paˍ lehˬ, awˬ ceˬ ma maˇ heˆ ve yaˇ miˇ teˇ gʼaˇ ve yaˇ paˍ geh teˇ geh awˬ shinˉ hta‸ a ciˉ ka‸ gʼa caˇ tuˬ maˇ heˆ teh‸ kʼoˆ taˍ ve yoˬ.

31Hkʼe te leh awˬ viˉ awˬ nyi teˇ hpaˍ-oˬ, ngaˬ hui lehˬ awˬ ceˬ ma ve yaˇ hpeh‸ ve maˇ heˆ. Awˬ ceˬ ma maˇ heˆ ve yaˇ miˇ teˇ gʼaˇ ve yaˇ hpeh‸ ve yoˬ.

← Chapter 3 Jump to: Chapter 5 →