Galatians 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to:

1Awˬ viˉ awˬ nyi teˇ hpaˍ-oˬ, chaw teˇ gʼaˇ gʼaˇ lehˬ venˇbaˆ teˇ ceuˬ ceuˬ te chehˇ ve hta‸ nawˬ hui gʼa mawˬ ve kʼo, yawˇ kʼaw‸ da‸ la tuˬ, nawˬ hui co ha hpawˇ awˬ gʼaˇ cawˬ ve chaw teˇ hpaˍ lehˬ, nyi ma nuˇ nehˬ ve awˬ hkʼaw lo yawˇ hta‸ kʼaw‸ gu piˇ-oˆ. Nawˬ htawˇ, beˬ ve lawˇ ve awˬ hkʼaˇ suh maˇ gʼa kʼai tuˬ, nawˬ awˬ to shaˍ ti‸ te-o.

2Nawˬ hui teˇ gʼaˇ leh teˇ gʼaˇ ve awˬ vuiˬ hta‸ ga pfuhˇ da‸-o‸. Chi hkʼe te ve kʼo, Hkri‸ ve awˬliˇtawˇhkawˇ hta‸ nawˬ hui te biˇ la tuˬ yoˬ.

3Chaw teˇ gʼaˇ gʼaˇ lehˬ, yawˇ te‸ chiˉ te maˇ puiˉ ve ka‸, ngaˬ lehˬ, cheuˬ ve yoˬ teh‸ yawˇ dawˇ ve kʼo, yawˇ lehˬ yawˇ awˬ to hta‸ heˍ ve yoˬ.

4Chaw teˇ gʼaˇ le le lehˬ, a shu yawˇ te taˍ ve kanˉ hta‸ dawˇ nyi tehˆ nyi-o. Oˇ hkʼe te ve kʼo, shu te taˍ ve kanˉ awˬ hkʼaw lo yawˇ gʼa ha lehˬ tuˬ ve teˇ ceuˬ maˇ heˆ. Yawˇ awˬ to te taˍ ve kanˉ awˬ hkʼaw lo ceh tiˉ yawˇ gʼa ha lehˬ tuˬ yoˬ.

5Awˬ lawn kʼo, chaw teˇ gʼaˇ le le lehˬ, a shu yawˇ ve awˬ vuiˬ hta‸ gʼa pfuhˇ tuˬ yoˬ.

6Bon hkawˇ hta‸ gʼa henˇ ve chaw teˇ gʼaˇ lehˬ, yawˇ hta‸ maˍ laˇ shehˍ hpaˇ teˇ gʼaˇ hta‸ da‸ ve awˬ ceuˬ hkʼa peu-eˬ pehˬ piˇ cawˇ ve yoˬ.

7Taˇ dawˇ ya‸. Gʼuiˬsha hta‸ hkʼa mvuhˇ hkʼa na te maˇ hpeh‸. Chaw teˇ gʼaˇ lehˬ, yawˇ awˬ yawˇ sheˍ ve hkʼe yawˇ gʼa gʼeu‸ tuˬ yoˬ.

8A shu yawˇ awˬ suhˍ awˬ shaˍ hta‸ caˉ da‸ ve teˇ ceuˬ hta‸ sheˍ ve kʼo, awˬ suhˍ awˬ shaˍ hta‸ caˉ da‸ ve awˬ hkʼaw lo luˬ ve sheˆ ve hta‸ gʼa gʼeu‸ tuˬ yoˬ. Awˬ ha hpu hta‸ caˉ da‸ ve teˇ ceuˬ hta‸ sheˍ ve kʼo, Awˬ ha hpu awˬ hkʼaw lo co ti‸ ha ti‸ hta‸ gʼa gʼeu‸ tuˬ yoˬ.

9Da‸ ve hta‸ te ve awˬ hkʼaw lo awˬ gʼaˇ maˇ nuˇ leh te-a veuˬ. Awˬ lawn kʼo, ngaˬ hui nyi ma maˇ luˬ ve kʼo, awˬ yanˇ cawˇ ve teˇ yanˇ ngaˬ hui gʼa gʼeu‸ tuˬ yoˬ.

10Te hpeh‸ ve hkʼe, chaw hkʼa peu-eˬ awˬ pon da‸ ve hta‸ te-a veuˬ. Yehˬ yaˇ kʼa yaˇ teh‸ kʼoˆ ve yonˍ ve chaw teˇ hpaˍ awˬ pon leuˉ leh da‸ ve hta‸ te-a veuˬ.

11Ngaˬ awˬ to ngaˬ ve la‸ sheh nawˬ hui hta‸ bvuh‸ laˇ ve li‸ mehˆ chi teˇ hpaˍ hkʼaˬ ma uiˍ ve hta‸ nyi-o.

12Awˬ suhˍ awˬ shaˍ hpawˇ awˬ liˇ teˇ hpaˍ nyi sha tuˬ te gaˇ ve chaw teˇ hpaˍ lehˬ, nawˬ hui awˬ guiˬ meuˇ gʼa shoˍ tuˬ nawˬ hui hta‸ nyiˉ leh te tcuh laˇ ve yoˬ. Yawˇ hui chi hkʼe te ve lehˬ, Hkri‸ ve la‸ ka hta‸ pa taw fawˉ ve mehˍ ve hta‸ yawˇ hui maˇ gʼa hkanˍ tuˬ te ve ceh tiˉ yoˬ.

13Awˬ lawn kʼo, awˬ guiˬ meuˇ shoˍ ve hta‸ hkanˍ yuˬ ve chaw teˇ hpaˍ lehˬ, yawˇ hui awˬ to ka‸ awˬliˇtawˇhkawˇ hta‸ hkʼa biˇ na yuˬ ve maˇ heˆ. Nawˬ hui ve awˬ suhˍ awˬ shaˍ hta‸ pa taw yawˇ hui nyi ma uiˍ kuiˬ cawˬ tuˬ, nawˬ hui hta‸ awˬ guiˬ meuˇ shoˍ tcuh gaˇ ve yoˬ.

14Ya‸ hkʼaˇ ngaˬ lehˬ, ngaˬ hui ve Jawˇmawˇ Yeˍsuˆ Hkri‸ ve la‸ ka awˬ hkʼaw lo ceh tiˉ nyi ma uiˍ kuiˬ cawˬ tuˬ yoˬ. Awˬ kaˍ awˬ nu awˬ hkʼaw lo nyi ma uiˍ kuiˬ cawˬ tuˬ maˇ heˆ. La‸ ka oˇ ve hta‸ pa taw miˬguiˬ ve awˬ liˇ awˬ hkʼaˇ teˇ hpaˍ ngaˬ awˬ pon suh peuˬ leh, ngaˬ htawˇ miˬguiˬ ve awˬ liˇ awˬ hkʼaˇ teˇ hpaˍ hta‸ suh baˬ taˉ peuˬ.

15Awˬ lawn kʼo, awˬ guiˬ meuˇ shoˍ ve maˇ kʼoˆ, maˇ shoˍ ve maˇ kʼoˆ, te‸ chiˉ awˬ bon maˇ cawˬ. Chaw awˬ suhˉ hpeh‸ la ve teˇ ceuˬ ceh tiˉ awˬ bon cawˬ ve yoˬ.

16Chaw awˬ suhˉ hpeh‸ la ve awˬ liˇ chi awˬ hkʼaˇ suh kʼai chehˇ ve chaw hkʼa peu-eˬ awˬ hkʼoˆ hta‸ maˇ kʼoˆ, Gʼuiˬsha ve Iˉsaˍreˍlaˆ chaw hui awˬ hkʼoˆ hta‸ maˇ kʼoˆ, dawˇ sha gaˇ sha ve teˇ ceuˬ leh ha kʼaˉ ve teˇ ceuˬ cawˬ piˇ-oˆ.

17Ya‸ nyi hkʼaw‸ nawˉ kʼo, chaw teˇ gʼaˇ ka‸ ngaˬ hta‸ taˇ kʼaw‸ sho‸ sha‸ laˇ. Awˬ lawn kʼo, ngaˬ ve awˬ to hta‸ Yeˍsuˆ ve awˬ maiˉ teˇ hpaˍ cawˬ taˍ ve yoˬ.

18Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hkʼaw lo cawˬ piˇ-oˆ. A menˬ

← Chapter 5 Jump to: