Jonah 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Yoˇnaˆ lehˬ, ngaˇ lonˉ gʼoˇ peˬ hkʼaw chehˇ taˍ leh Gʼuiˬsha geh bon chi hkʼe lawˬ ve yoˬ.

2Gʼuiˬsha-oˬ, dawˇ tui‸ gaˇ tui‸ jaˇ ve hkʼaw, ngaˬ nawˬ hta‸ kuˬ leh nawˬ ngaˬ hta‸ kʼaw‸ yaw hkʼaw‸ laˇ ve yoˬ. Ngaˬ lehˬ suh mvuhˇmiˬ hkʼaw chehˇ taˍ leh, nawˬ hta‸ kuˬ chehˇ ve yoˬ. Nawˬ lehˬ ngaˬ kuˬ ve awˬ hkawˇ hta‸ na yuˬ laˇ ve yoˬ.

3Nawˬ lehˬ ngaˬ hta‸ naˉ jaˇ kuiˬ laˇ tsuhˇ gʼuiˬ tawˬ lo baˬ keu laˇ ve yoˬ. Iˉ kaˆ teˇ hpaˍ ngaˬ hta‸ caw zuhˇ chehˇ taˍ leh, uiˍ jaˇ ve gʼuiˬ baˇ teˇ hpaˍ ngaˬ hkʼoˆ taˆ taˆ ya‸ ya‸ te chehˇ ve yoˬ.

4Ngaˬ lehˬ, nawˬ mehˆ gʼuˇ suhˍ lo yuˬ baˬ ve hta‸ gʼa hkanˍ leh, nawˬ ve da‸ kehˬ ve bon yehˬ hta‸ teˇ pawˆ ka‸ gʼa kʼaw‸ mawˬ tuˬ ve maˇ heˆ, teh‸ ngaˬ dawˇ taˍ ve yoˬ.

5Iˉ kaˆ teˇ hpaˍ ngaˬ awˬ hkʼoˆ hoˆ beh taˍ leh, ngaˬ lehˬ shaˉ gʼawˬ maˇ gʼa ve yoˬ. Laˇ tsuhˇ gʼuiˬ ngaˬ hta‸ hoˆ beh taˍ leh, laˇ tsuhˇ gʼuiˬ hkʼaw cawˬ ve mvuh‸ teˇ hpaˍ ngaˬ ve oˉ kʼoˍ hta‸ hawˆ tiˍ taˍ laˇ ve yoˬ.

6Ngaˬ hkʼaw hkuiˉ puiˍ lo ya‸-e leh, miˬguiˬ hawˉ lo cawˬ ve mvuhˇmiˬ hkʼaw chehˇ taˍ ve yoˬ. Ya‸ hkʼaˇ, ngaˬ ve Jawˇmawˇ Gʼuiˬsha-oˬ, nawˬ lehˬ naˉ jaˇ kuiˬ lo ngaˬ hta‸ kʼaw‸ yuˬ tawˆ laˇ ve yoˬ.

7Ngaˬ ve a sha‸ leh la paˇ neˇ ve teˇ yanˇ, ngaˬ nawˬ geh bon lawˬ ve yoˬ. Ngaˬ ve bon lawˬ hkawˇ lehˬ nawˬ ve da‸ kehˬ ve bon yehˬ hkʼaw lo nawˬ geh gaˬ peuˬ ve yoˬ.

8Te‸ chiˉ tcuhˉ kuiˬ maˇ cawˬ ve shaˉ ho‸ teˇ hpaˍ hta‸ oˉ kʼoˍ pui chehˇ ve chaw hui lehˬ, nawˬ hta‸ chiˇ baˬ ve yoˬ.

9Ya‸ hkʼaˇ, ngaˬ nawˬ hta‸ kʼa muiˬ chiˇ mvuh tuˬ yoˬ. Ngaˬ nawˬ hta‸ tuˉ tanˇ leh, ngaˬ ka ti‸ te taˍ peuˬ ve hkʼe te tuˬ yoˬ. Htaiˍ hkʼaw‸ ve teˇ ceuˬ Gʼuiˬsha geh laˬ ve yoˬ, teh‸ kʼoˆ ve yoˬ.

10Oˇ htaˇ Gʼuiˬsha lehˬ, ngaˇ lonˉ oˇ ve hta‸ tawˇ yaw piˇ leh, Yoˇnaˆ hta‸ laˇ tsuhˇ gʼuiˬ pfuhˍ lo ca hpe‸ baˬ tcuh ve yoˬ.

← Chapter 1 Jump to: Chapter 3 →