Jonah 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Oˇ htaˇ, Gʼuiˬsha Yoˇnaˆ hta‸ teˇ pawˆ kʼaw‸ kʼoˆ piˇ ve,

2Niˇnaˍveˍ venˇ lo kʼai leh, ngaˬ nawˬ hta‸ kʼoˆ piˇ taˍ ve tawˇ oˇ ve teˇ hpaˍ yawˇ hui hta‸ ca hto piˇ-oˆ, teh‸ yawˇ hta‸ kʼoˆ piˇ ve yoˬ.

3Chi teˇ pawˆ Yoˇnaˆ lehˬ Gʼuiˬsha kʼoˆ ve hkʼe Niˇnaˍveˍ venˇ lo kʼai ve yoˬ. Niˇnaˍveˍ venˇ lehˬ uiˍ jaˇ ve venˇ teˇ maˬ hpeh‸ leh, venˇ choˬ hpawˇ teˇ ceˍ lo te leh oˇ hpawˇ teˇ ceˍ lo gaˬ tuˬ shehˆ nyi gʼa kʼai ve yoˬ.

4Yoˇnaˆ venˇ hkʼaw lo‸-e leh teˇ nyi tanˇ vanˇ te toˇ peuˬ hkʼaw‸ nawˉ, awˇ chi nyi ponˬ peuˬ kʼo venˇ chi luˬ kʼai tuˬ yoˬ, teh‸ kʼoˆ ve yoˬ.

5Niˇnaˍveˍ venˇ yaˇ teˇ hpaˍ Gʼuiˬsha ve tawˇ hta‸ yonˍ ve yoˬ. Hkʼe te leh, yawˇ hui hkʼa peu-eˬ caˇ tuˬ ce tuˬ dawˇ cheˆ peuˬ hkʼaw‸ nawˉ, chaw mawˇ hta‸ te leh yaˇ ehˉ teˇ gʼaˇ htaˇ hkʼa gaˬ, a shu yawˇ ve venˇbaˆ dawˇ hpfuhˆ ve hta‸ hpeu‸ maˍ tuˬ, meh htuˉ pui hpa hta‸ veu‸ deh taˍ ve yoˬ.

6Venˇ yaˇ teˇ hpaˍ chi hkʼe te chehˇ ve awˬ hkawˇ hta‸ Niˇnaˍveˍ jawˇmawˇ gʼa kaˇ ve teˇ yanˇ, yawˇ mui chehˇ ve kʼaw jaw hkʼoˆ ya‸-e ve yoˬ. Yawˇ ve veu‸ kʼaˇ kʼehˆ baˬ leh meh htuˉ pui hpa veu‸ deh peuˬ hkʼaw‸ nawˉ, hkʼaw‸ laˉ hkʼaw mui taˍ ve yoˬ.

7Yawˇ venˇ yaˇ teˇ hpaˍ hta‸ tawˇ shanˍ feu piˇ leh kʼoˆ ve, Chi lehˬ jawˇmawˇ leh yawˇ ve a ma‸ lonˉ teˇ hpaˍ ve tawˇ hpeh‸ ve yoˬ. Chaw teˇ gʼaˇ ka‸ caˇ tuˬ te‸ chiˉ maˇ ga caˇ. Chaw yaˇ leh to nuˇ to shaˆ hkʼa peu-eˬ, te‸ chiˉ maˇ gʼa caˇ maˇ gʼa dawˬ.

8Chaw yaˇ leh to nuˇ to shaˆ hkʼa peu-eˬ meh htuˉ pui hpa gʼa veu‸ deh ve yoˬ. Chaw teˇ gʼaˇ le le Gʼuiˬsha geh bon gʼaˇ hte‸ gʼa lawˬ leh, a shu yawˇ te chehˇ ve cha‸ chiˆ ve kanˉ hkʼa peu-eˬ hta‸ gʼa baˬ taˉ ve yoˬ.

9Oˇ hkʼe te ve kʼo, Gʼuiˬsha nyi ma kʼaw‸ pa leh, ngaˬ hui hta‸ maˇ kʼaw‸ ciˍ yanˍ laˇ naˍ maˇ shiˍ, teh‸ kʼoˆ ve yoˬ.

10Gʼuiˬsha lehˬ, venˇ yaˇ oˇ ve teˇ hpaˍ cha‸ chiˆ ve kanˉ hta‸ baˬ taˉ peuˬ ve hta‸ gʼa mawˬ ve yoˬ. Hkʼe te leh, yawˇ ve nyi ma kʼaw‸ pa leh yawˇ kʼoˆ taˍ ve hkʼe yawˇ hui hta‸ maˇ kʼaw‸ ciˍ yanˍ piˇ ve yoˬ.

← Chapter 2 Jump to: Chapter 4 →