Luke 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Awˬ yanˇ oˇ ve awˬ hkʼaw lo chaw teˇ hpaˍ hpaˍ laˬ leh, jawˇmawˇ Piˉla‸ lehˬ, Gaˍliˍlehˇ chaw teˇ hpaˍ hpaˍ ve awˬ suhˍ leh yawˇ hui tanˇ chehˇ ve ceˇ caˬ awˬ suhˍ hta‸ hkaw‸ da‸ ve awˬ lawn Yeˍsuˆ hta‸ hto piˇ ve yoˬ.

2Yeˍsuˆ kʼaw‸ kʼoˆ ve, Gaˍliˍlehˇ chaw oˇ ve teˇ hpaˍ lehˬ, chi hkʼe gʼa hkanˍ ve pa taw, Gaˍliˍlehˇ chaw hkʼa peu-eˬ a‸ kehˉ yawˇ hui venˇbaˆ uiˍ ve teh‸ nawˬ hui dawˇ ve laˇ.

3Ngaˬ nawˬ hui hta‸ kʼoˆ laˇ ve, yawˇ hui leuˉ leh venˇbaˆ uiˍ ve maˇ heˆ. Nawˬ hui lehˬ, venˇbaˆ hta‸ maˇ dawˇ hpfuhˆ kʼo, nawˬ hui hkʼa peu-eˬ htawˇ yawˇ hui hkʼa shuˍ shuˍ luˬ kʼai sheˆ kʼai tuˬ yoˬ.

4Chi hkʼoˆ ka‸, Siˉlonˍ hkʼaˆ hkʼaw mvuh ve yehˬ teˇ yehˬ paiˍ leh, teˍ pehˍ ve chaw teˇ chi hiˉ gʼaˇ lehˬ, Yeˍruˆsaˍlehnˍ venˇ hkʼaw lo chehˇ ve chaw hkʼa peu-eˬ a‸ kehˉ yawˇ hui te ya‸ ve teh‸ nawˬ hui dawˇ ve laˇ.

5Ngaˬ nawˬ hui hta‸ kʼoˆ laˇ ve, yawˇ hui leuˉ leh te ya‸ ve maˇ heˆ. Nawˬ hui lehˬ, venˇbaˆ hta‸ maˇ dawˇ hpfuhˆ ve kʼo, nawˬ hui hkʼa peu-eˬ htawˇ yawˇ hui hkʼa shuˍ shuˍ luˬ kʼai sheˆ kʼai tuˬ yoˬ teh‸, yawˇ hui hta‸ kʼoˆ piˇ ve yoˬ.

6Oˇ htaˇ yawˇ tawˇ pa haˉ te maˍ leh kʼoˆ ve, Chaw teˇ gʼaˇ lehˬ, yawˇ ve a pehˉ meuˇ hko awˬ hkʼaw lo ti taˍ ve maˉ nawˆ cehˬ teˇ cehˬ cawˬ ve yoˬ. Maˉ nawˆ cehˬ oˇ ve hta‸ yawˇ awˬ shiˍ ca nyi la ve htawˇ maˇ mawˬ.

7Hkʼe te leh, hko ha‸ shaˉ shehˍ hpaˇ hta‸ yawˇ kʼoˆ piˇ ve, Shehˆ hkʼaw‸ hkʼa gaˬ maˉ nawˆ cehˬ chi hta‸ ngaˬ awˬ shiˍ ca nyi la ve htawˇ maˇ mawˬ. Awˬ cehˬ chi hta‸ htu baˬ loˬ. Aˬ hto‸ ma te miˬguiˬ hta‸ chehˇ kuiˬ hkʼe leˇ te peuˬ piˇ ve le teh‸ kʼoˆ piˇ ve yoˬ.

8Hko ha‸ shaˉ shehˍ hpaˇ kʼaw‸ kʼoˆ ve, Jawˇmawˇ-oˬ, chi teˇ hkʼaw‸ teh taˍ piˇ sheˍ. Awˬ hkuiˉ puiˍ lo ngaˬ hkʼa caw zuhˇ duˇ sheˬ leh, hkuiˇ keu piˇ shaˍ.

9Awˬ hkʼaw‸ nawˉ awˬ shiˍ naw‸ la ve kʼo, da‸ ve yoˬ. Ya‸ hkʼaˇ, awˬ shiˍ maˇ naw‸ la ve kʼo, nawˬ htu baˬ hpeh‸ ve yoˬ teh‸, yawˇ hta‸ kʼoˆ piˇ ve yoˬ.

10Shinˉ nyi teˇ nyi htaˇ bon yehˬ teˇ yehˬ awˬ hkʼaw lo yawˇ maˍ piˇ chehˇ ve yoˬ.

11Oˇ htaˇ, teˇ chi hiˉ hkʼaw‸ hkʼa gaˬ neˇ geh leh naˬ chehˇ ve yaˇ miˇ teˇ gʼaˇ oˇ kaˬ lo chehˇ taˍ ve yoˬ. Yawˇ lehˬ, caw‸ kʼaw‸ lehˍ hpeh‸ leh, yawˇ hkʼaˇ yawˇ a ciˉ ka‸ hteˇ lehˍ te maˇ gʼa.

12Yeˍsuˆ lehˬ, yaˇ miˇ oˇ ve hta‸ gʼa mawˬ htaˇ yawˇ hta‸ kuˬ yuˬ leh, Yaˇ miˇ-oˬ, nawˬ ve a naˍ hta‸ nawˬ gʼa ponˬ peuˬ teh‸ yawˇ hta‸ kʼoˆ piˇ ve yoˬ.

13Yaˇ miˇ oˇ ve awˬ hkʼoˆ hta‸ yawˇ ve la‸ sheh taˍ piˇ leh, teˇ cawˬ haˉ yaˇ miˇ oˇ ve lehˬ caw‸ hteˇ lehˍ te leh, Gʼuiˬsha hta‸ chiˇ uiˍ chiˇ mvuh ve yoˬ.

14Shinˉ nyi awˬ hkʼaw lo chaw naˬ hta‸ Yeˍsuˆ gu na-e piˇ ve pa taw, bon yehˬ awˬ hoˉ nyi ma zuhˆ leh, chaw chi ma ve hta‸ kʼoˆ piˇ ve, Kanˉ te cawˇ ve awˬ nyi hkaw‸ nyi cawˬ ve yoˬ. Nawˬ hui ve a naˍ na-e la tuˬ, awˬ nyi oˇ ve teˇ hpaˍ awˬ hkʼaw lo laˬ-o‸. Shinˉ nyi teˇ nyi htaˇ taˇ laˬ teh‸, yawˇ hui hta‸ kʼoˆ piˇ ve yoˬ.

15Oˇ htaˇ Jawˇmawˇ Yeˍsuˆ yawˇ hta‸ kʼaw‸ kʼoˆ piˇ ve, Heˍ puiˉ ve chaw teˇ hpaˍ-oˬ, nawˬ hui teˇ gʼaˇ le le shinˉ nyi htaˇ a shu yawˇ ve nuˇ leh piˉ laˬ hta‸ hpui leh, hkawˆ hkʼaw sheh tawˆ-e leh iˉ kaˆ ca taw piˇ ve maˇ heˆ laˇ.

16Aˍbraˍhanˍ ve yaˇ miˇ chi hta‸ teˇ chi hiˉ hkʼaw‸ hkʼa gaˬ Saˍtanˍ hpeh tiˍ taˍ ve yoˬ. Hpeh taˍ ve chi hta‸ shinˉ nyi teˇ nyi awˬ hkʼaw lo hpui hpehˇ piˇ ve maˇ cawˇ laˇ teh‸ kʼoˆ piˇ ve yoˬ.

17Yawˇ chi hkʼe kʼoˆ ve teˇ yanˇ yawˇ ve canˇ paˍ hkʼa peu-eˬ ya‸ taw ve yoˬ. Chaw awˬ moˍ lonˉ hkʼa peu-eˬ lehˬ, yawˇ te ve awˬ me‸ awˬ hponˇ hkʼa biˇ cawˬ ve kanˉ hkʼa peu-eˬ hta‸ ha lehˬ jaˇ ve yoˬ.

18Hkʼe te leh yawˇ kʼoˆ ve, Gʼuiˬsha ve mvuhˇ miˬ lehˬ, aˬ hto‸ ma hta‸ shuˍ ve le. Ngaˬ aˬ hto‸ ma hta‸ yuˬ leh gʼa tehˆ da‸ nyi tuˬ ve le.

19Gʼuiˬsha ve mvuhˇmiˬ lehˬ, chaw teˇ gʼaˇ yawˇ ve hko awˬ hkʼaw lo sheˍ taˍ ve gʼawˇ caˉ yawˇ hta‸ shuˍ ve yoˬ. Awˬ yawˇ oˇ ve lehˬ, yeˬ la uiˍ la leh, awˬ cehˬ lonˉ hpeh‸ la ve yoˬ. Mvuhˇ hpe lo poˬ ve ngaˆ teˇ hpaˍ lehˬ, awˬ kʼaˉ teˇ hpaˍ awˬ hkʼoˆ gʼaˇ jehˇ ve yoˬ teh‸ kʼoˆ ve yoˬ.

20Yawˇ teˇ pawˆ kʼaw‸ kʼoˆ ve, Gʼuiˬsha ve mvuhˇmiˬ hta‸ ngaˬ aˬ hto‸ ma yuˬ leh gʼa tehˆ da‸ nyi tuˬ ve le.

21Gʼuiˬsha ve mvuhˇmiˬ lehˬ, diˇ hta‸ shuˍ ve yoˬ. Yaˇ miˇ teˇ gʼaˇ diˇ hta‸ yuˬ leh hkaoˍmonˇ meu-e shehˆ hkʼawˍ lawˇ awˬ hkʼaw lo keu ve teˇ yanˇ hkʼa peu-eˬ hta‸ ciˇ la piˇ lawˬ ve yoˬ teh‸ kʼoˆ ve yoˬ.

22Oˇ ve hkʼaw‸ nawˉ Yeˍsuˆ lehˬ, Yeˍruˆsaˍlehnˍ venˇ lo kʼai ve yoˬ. Yawˇ kʼai ve teˇ yanˇ, ya‸ kʼaw kʼaˉ lo cawˬ ve venˇ hkʼaˆ teˇ hpaˍ awˬ hkʼaw lo maˍ piˇ kʼai ve yoˬ.

23Oˇ htaˇ, chaw teˇ gʼaˇ kʼoˆ ve, Jawˇmawˇ-oˬ, htaiˍ hkʼaw‸ ve hta‸ gʼa ve chaw lehˬ, a ciˉ ceh tiˉ cawˬ ve laˇ teh‸ yawˇ hta‸ na nyi htaˇ, Yeˍsuˆ yawˇ hui hta‸ kʼaw‸ kʼoˆ piˇ ve,

24Maˇ kʼoˍ ve yehˬmiˉhpe‸ awˬ hkʼaw lo gʼa lo‸-e tuˬ gʼaˇ hte‸ te-o. Ngaˬ nawˬ hui hta‸ kʼoˆ laˇ ve, chaw maˇ maˇ lo‸-e tuˬ te ve htawˇ, lo‸-e maˇ hpeh‸.

25Yehˬ shehˍ hpaˇ tu leh yehˬ miˉ hta‸ hoˆ taˍ peuˬ hkʼaw‸ nawˉ, nawˬ hui awˬ baˬ hpawˇ lo huˉ taˍ leh, yehˬ miˉ hta‸ htawˆ tuˬ yoˬ. Jawˇmawˇ-oˬ, ngaˬ hui hta‸ yehˬ miˉ a ciˉ hpaw laˇ-oˆ teh‸ kʼoˆ ve teˇ yanˇ, yehˬ shehˍ hpaˇ lehˬ, Nawˬ hui hkʼaˬ lo laˬ ve hta‸ ngaˬ maˇ shiˍ teh‸, nawˬ hui hta‸ kʼaw‸ kʼoˆ laˇ tuˬ yoˬ.

26Oˇ htaˇ nawˬ hui chi hkʼe kʼaw‸ kʼoˆ tuˬ yoˬ. Ngaˬ hui lehˬ nawˬ geh teˇ geh gʼa caˇ gʼa dawˬ peuˬ. Ngaˬ hui ve venˇ hkʼaw cawˬ ve ya‸ kʼaw teˇ hpaˍ lo htawˇ nawˬ maˍ laˇ peuˬ teh‸ kʼoˆ tuˬ yoˬ.

27Yehˬ shehˍ hpaˇ chi hkʼe kʼaw‸ kʼoˆ laˇ tuˬ yoˬ. Nawˬ hui hkʼaˬ lo laˬ ve hta‸ ngaˬ maˇ shiˍ teh‸ ngaˬ nawˬ hui hta‸ kʼoˆ laˇ ve yoˬ. Haiˬ ve hta‸ te ve chaw hkʼa peu-eˬ-oˬ, ngaˬ geh tawˆ kʼai-o teh‸ yawˇ kʼoˆ laˇ tuˬ yoˬ.

28Aˍbraˍhanˍ, Iˉcaˆ, Yaˍkoˆ leh Gʼuiˬsha ve tcuh kaˍ paˍ hkʼa peu-eˬ Gʼuiˬsha ve mvuhˇ miˬ awˬ hkʼaw lo chehˇ taˍ ve hta‸ nawˬ hui gʼa mawˬ leh, nawˬ hui awˬ to awˬ baˬ hpawˇ lo gʼa‸ tawˆ ve hta‸ gʼa hkanˍ ve teˇ yanˇ, nawˬ hui hawˬ leh ciˬ geu‸ tuˬ yoˬ.

29Oˇ htaˇ mvuhˇ nyi tawˆ mvuhˇ nyi kʼehˬ, awˬ hawˉ awˬ na lo chehˇ ve chaw hui laˬ leh, Gʼuiˬsha ve mvuhˇmiˬ awˬ hkʼaw lo gʼa mui caˇ tuˬ yoˬ.

30Shu awˬ hkʼaw‸ nawˉ chehˇ ve chaw teˇ hpaˍ hpaˍ lehˬ, shu awˬ gʼuˇ suhˍ chehˇ tuˬ yoˬ. Shu awˬ gʼuˇ suhˍ chehˇ ve chaw teˇ hpaˍ hpaˍ lehˬ, shu awˬ hkʼaw‸ nawˉ chehˇ tuˬ yoˬ teh‸ kʼoˆ piˇ ve yoˬ.

31Awˬ yanˇ oˇ ve awˬ hkʼaw, Hpaˍriˍsehˇ teˇ hpaˍ hpaˍ laˬ leh, Choˬ kaˬ lo tawˆ kʼai-o. Jawˇmawˇ Heˍroˆ nawˬ hta‸ tiˇ pehˍ gaˇ ve yoˬ teh‸ yawˇ hta‸ kʼoˆ piˇ ve yoˬ.

32Yeˍsuˆ yawˇ hui hta‸ kʼaw‸ kʼoˆ piˇ ve, Nawˬ hui kʼai leh heh hpuiˇ oˇ ve hta‸ chi hkʼe kʼoˆ piˇ-oˆ. Ya‸ nyi leh shawˉ pawˍ neˇ teˇ hpaˍ hta‸ ngaˬ gʼa‸ kʼoˬ leh chaw naˬ teˇ hpaˍ hta‸ gu na-e piˇ tuˬ yoˬ. Shehˆ nyi teˇ nyi gaˬ kʼo, ngaˬ ve kanˉ biˇ la tuˬ yoˬ teh‸ ca kʼoˆ piˇ-oˆ.

33Ya‸ hkʼaˇ ya‸ nyi, shawˉ pawˍ leh hpa‸ nyi ngaˬ gʼa kʼai tuˬ sheˍ ve yoˬ. Awˬ lawn kʼo, Yeˍruˆsaˍlehnˍ venˇ awˬ hkʼaw lo maˇ heˆ kʼo, Gʼuiˬsha ve tcuh kaˍ paˍ maˇ gʼa luˬ maˇ gʼa sheˆ.

34Yeˍruˆsaˍlehnˍ venˇ-oˬ, Yeˍruˆsaˍlehnˍ venˇ-oˬ, nawˬ lehˬ Gʼuiˬsha ve tcuh kaˍ paˍ teˇ hpaˍ hta‸ hkʼaˬ htaˆ ka‸ tiˇ pehˍ leh, nawˬ geh peu laˇ ve chaw teˇ hpaˍ hta‸ hkʼaˬ htaˆ ka‸ haˉ pui baˬ pehˍ ve yoˬ. Gʼaˆ ma peuˍ lehˬ, yawˇ ve awˬ yehˇ teˇ hpaˍ hta‸ toˍ la‸ kʼuˉ awˬ hawˉ lo hpoˆ chehˇ piˇ lawˬ ve hkʼe, nawˬ ve awˬ yaˇ awˬ duˬ teˇ hpaˍ hta‸ ngaˬ awˬ hawˉ lo hkʼaˬ nyiˇ pawˆ hpoˆ chehˇ piˇ lawˬ gaˇ ve htawˇ, nawˬ maˇ te.

35Nyi loˬ, nawˬ hui ve yehˬ lehˬ, gawˬ cu gawˬ pehˆ hpeh‸ la tuˬ yoˬ. Ngaˬ nawˬ hui hta‸ kʼoˆ laˇ ve, Jawˇmawˇ Gʼuiˬsha ve awˬ meh awˬ hawˉ lo laˬ ve chaw teˇ gʼaˇ hta‸ awˬ bon uiˍ piˇ-oˆ teh‸, nawˬ hui maˇ kʼoˆ ve ceh ceh, nawˬ hui ngaˬ hta‸ maˇ gʼa kʼaw‸ mawˬ teh‸ kʼoˆ ve yoˬ.

← Chapter 12 Jump to: Chapter 14 →