Luke 6 — Lahu Bible Edited © Thailand Bible Society and Bible Society of Myanmar, 2010, 2020.

1Shinˉ nyi teˇ nyi awˬ hkʼaw lo, Yeˍsuˆ heh hkʼaw hpanˍ kʼai chehˇ htaˇ, yawˇ ve awˬ la‸ gʼawˇ hui caˬ nu hta‸ chehˆ leh, yawˇ hui ve la‸ sheh ye‸ leh caˇ ve yoˬ.

2Hpaˍriˍsehˇ teˇ hpaˍ hpaˍ kʼoˆ ve, Shinˉ nyi htaˇ te maˇ keunˍ te maˇ cawˇ ve hta‸ nawˬ hui aˬ hto‸ ma pa taw te ve le teh‸ kʼoˆ ve yoˬ.

3Yeˍsuˆ yawˇ hui hta‸ kʼaw‸ kʼoˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ ve teˇ yanˇ,

4Gʼuiˬsha ve yehˬ awˬ hkʼaw lo lo‸-e leh, paw hkuˇ teˇ hpaˍ maˇ heˆ kʼo teˇ gʼaˇ ka‸ caˇ maˇ keunˍ caˇ maˇ cawˇ ve, tanˇ taˍ ve hkaoˍmonˇ hta‸ yuˬ caˇ leh, yawˇ ve awˬ chawˇ teˇ hpaˍ hta‸ htawˇ caˍ piˇ ve awˬ lawn hta‸ nawˬ hui maˇ gʼaw jaw leh laˇ teh‸ kʼoˆ piˇ ve yoˬ.

5Peuˬ leh yawˇ kʼaw‸ kʼoˆ ve, Chaw yaˇ ve Yaˇ hpu lehˬ, shinˉ nyi ve awˬ jawˇmawˇ hpeh‸ ve yoˬ teh‸ yawˇ hui hta‸ kʼoˆ piˇ ve yoˬ.

6Awˬ kaˍ awˬ nu shinˉ nyi teˇ nyi kʼaw‸ gaˬ leh, bon yehˬ awˬ hkʼaw lo Yeˍsuˆ lo‸-e leh maˍ piˇ chehˇ htaˇ, oˇ kaˬ lo la‸ sha paˉ la‸ sheh suh ve chaw teˇ gʼaˇ chehˇ taˍ ve yoˬ.

7Yeˍsuˆ hta‸ venˇbaˆ taˍ gʼa tuˬ, shinˉ nyi htaˇ chaw naˬ oˇ ve hta‸ yawˇ gu na-e piˇ tuˬ leh naˍ teh‸, li‸ bvuh‸ paˍ leh Hpaˍriˍsehˇ teˇ hpaˍ yawˇ hta‸ hkʼa deh‸ nyi taˍ ve yoˬ.

8Yeˍsuˆ lehˬ, yawˇ hui dawˇ ve hta‸ shiˍ leh, la‸ sheh teˇ paˉ suh ve chaw hta‸, Nawˬ tu leh awˬ kʼaw ji lo ca huˉ la-o teh‸ kʼoˆ piˇ htaˇ, yawˇ tu leh huˉ taˍ ve yoˬ.

9Yeˍsuˆ yawˇ hui hta‸ kʼoˆ piˇ ve, Ngaˬ nawˬ hui hta‸ na nyi shaˍ. Shinˉ nyi htaˇ da‸ tuˬ te cawˇ laˇ, maˇ heˆ kʼo luˬ tuˬ te cawˇ laˇ. Shu ve a sha‸ hta‸ ponˬ piˇ cawˇ laˇ, maˇ heˆ kʼo te luˬ cawˇ laˇ teh‸ na nyi ve yoˬ.

10Yawˇ hui hkʼa peu-eˬ hta‸ yawˇ hkʼa caw zuhˇ nyi leh, chaw oˇ ve hta‸, Nawˬ ve la‸ sheh che-o teh‸ kʼoˆ piˇ ve yoˬ. Oˇ htaˇ, chaw oˇ ve la‸ sheh che leh na-e la ve yoˬ.

11Yawˇ hui nyi ma zuhˆ jaˇ leh, Yeˍsuˆ hta‸ hkʼaˬ hkʼe gʼa te tuˬ teˇ gʼaˇ leh teˇ gʼaˇ jehˬ da‸ ve yoˬ.

12Awˬ nyi awˬ haˉ oˇ ve teˇ hpaˍ awˬ hkʼaw lo, yawˇ bon lawˬ tuˬ hkʼaw pui hkʼoˆ lo taˆ-e leh, oˇ ve teˇ haˉ mvuhˇ hkʼa htiˇ Gʼuiˬsha geh bon lawˬ chehˇ ve yoˬ.

13Mvuhˇ htiˇ la ve teˇ yanˇ, yawˇ ve awˬ la‸ gʼawˇ teˇ hpaˍ hta‸ yawˇ kuˬ yuˬ leh, yawˇ hui awˬ hkʼaw lo chaw teˇ chi nyiˇ gʼaˇ hta‸ leuˆ yuˬ ve yoˬ. Yawˇ hui teˇ hpaˍ hta‸ tcuh yaˇ teh‸ yawˇ meh piˇ ve yoˬ.

14Chaw oˇ ve teˇ hpaˍ lehˬ, Peˍtruˆ teh‸ yawˇ meh piˇ ve Siˉmonˍ leh yawˇ ve awˬ nyi paˍ Anˍdrehˍ, Yaˍkoˆ leh Yoˇhanˬ, Hpiˇliˇpuˆ leh Baˍhtawˇlaˍmehˇ,

15Ma‸htehˍ leh Htoˉma‸, Aˍlaˍhpehˇ ve awˬ yaˇ paˍ Yaˍkoˆ leh Seˍluˆ teh‸ kʼoˆ ve Siˉmonˍ,

16Yaˍkoˆ ve awˬ yaˇ paˍ Yuˇda‸ leh, Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ.

17Peuˬ leh, yawˇ yawˇ hui geh teˇ geh ya‸ la leh, miˬ tawˬ kuiˬ lo huˉ chehˇ ve yoˬ. Yawˇ ve awˬ la‸ gʼawˇ awˬ moˍ lonˉ maˇ kʼoˆ, Yuˇda‸ mvuhˇ miˬ teˇ kaˬ le le, Yeˍruˆsaˍlehnˍ venˇ leh laˇ tsuhˇ gʼuiˬ pfuhˍ paˇ Tuˇruˆ leh Siˉdonˍ mvuhˇ miˬ lo chehˇ ve chaw awˬ moˍ lonˉ maˇ kʼoˆ, yawˇ ve tawˇ hkawˇ hta‸ na tuˬ leh, yawˇ hui ve naˬ ve gawˬ ve teˇ hpaˍ hta‸ yawˇ gu na-e laˇ tuˬ, yawˇ geh hpawnˬ chehˇ taˍ ve yoˬ.

18Neˇ cha‸ chiˆ fawˉ mehˍ chehˇ ve chaw teˇ hpaˍ hta‸ htawˇ yawˇ gu na-e piˇ ve yoˬ.

19Chaw awˬ moˍ lonˉ hkʼa peu-eˬ yawˇ hta‸ gʼa htawˇ tuˬ te ve yoˬ. Awˬ lawn kʼo, yawˇ awˬ hkʼaw lo kanˇ paˆ tawˆ la leh, yawˇ hui hkʼa peu-eˬ hta‸ gu na-e piˇ ve yoˬ.

20Oˇ htaˇ, yawˇ ve awˬ la‸ gʼawˇ teˇ hpaˍ hta‸ yawˇ chiˇ nyi leh kʼoˆ piˇ ve, Nawˬ hui haˍ ve gʼawˇ ve chaw hui awˬ bon uiˍ ve yoˬ. Awˬ lawn kʼo, Gʼuiˬsha ve mvuhˇmiˬ lehˬ nawˬ hui ve mvuhˇmiˬ hpeh‸ ve yoˬ.

21Chi beu‸ nawˬ hui meu‸ chehˇ kaˆ chehˇ ve chaw hui awˬ bon uiˍ ve yoˬ. Awˬ lawn kʼo, nawˬ hui gʼa caˇ bvuhˆ dawˬ bvuhˆ tuˬ yoˬ. Chi beu‸ nawˬ hui hawˬ chehˇ ve chaw hui awˬ bon uiˍ ve yoˬ. Awˬ lawn kʼo, nawˬ hui gʼa gʼuiˬ tuˬ yoˬ.

22Chaw yaˇ ve Yaˇ hpu hta‸ pa taw shu nawˬ hui hta‸ canˇ laˇ ve, shawˍ baˬ laˇ ve, hkʼa mvuhˇ hkʼa na kʼoˆ laˇ ve leh, nawˬ hui ve awˬ meh hta‸ te luˬ laˇ ve kʼo, nawˬ hui awˬ bon uiˍ ve yoˬ.

23Awˬ nyi oˇ ve awˬ hkʼaw lo ha lehˬ leh pawˆ chehˇ-oˆ. Awˬ lawn kʼo, mvuhˇ naw ma hkʼoˆ lo nawˬ hui ve la‸ shawnˍ uiˍ jaˇ ve yoˬ. Yawˇ hui ve awˬ puˍ awˬ pi teˇ hpaˍ lehˬ, Gʼuiˬsha ve tcuh kaˍ paˍ teˇ hpaˍ hta‸ oˇ hkʼe te ve yoˬ.

24Ya‸ hkʼaˇ nawˬ hui paw sha ve chaw teˇ hpaˍ lehˬ, gʼa dawˇ haˍ jaˇ tuˬ yoˬ. Awˬ lawn kʼo, nawˬ hui lehˬ a shu yawˇ dawˇ sha ve teˇ ceuˬ hta‸ gʼa peuˬ.

25Chi beu‸ nawˬ hui gʼa caˇ bvuhˆ dawˬ bvuhˆ chehˇ ve chaw hui gʼa dawˇ haˍ jaˇ tuˬ yoˬ. Awˬ lawn kʼo, nawˬ hui gʼa meu‸ gʼa kaˆ tuˬ yoˬ. Chi beu‸ nawˬ hui gʼuiˬ chehˇ ve chaw hui gʼa dawˬ haˍ jaˇ tuˬ yoˬ. Awˬ lawn kʼo, nawˬ hui gʼa dawˇ haˍ gaˇ haˍ leh gʼa hawˬ tuˬ yoˬ.

26Chaw hkʼa peu-eˬ nawˬ hui hta‸ chiˇ mvuh laˇ ve teˇ yanˇ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, yawˇ hui ve awˬ puˍ awˬ pi teˇ hpaˍ htawˇ, maˇ heˆ heˆ ve tcuh kaˍ paˍ teˇ hpaˍ hta‸ oˇ hkʼe chiˇ mvuh jaw ve yoˬ.

27Nawˬ hui hkʼa gʼa kaˇ ve chaw teˇ hpaˍ hta‸ ngaˬ kʼoˆ laˇ ve, nawˬ hui ve canˇ paˍ teˇ hpaˍ hta‸ ha‸-o‸. Nawˬ hui hta‸ nyi bawˬ ve chaw hui hta‸ da‸ ve teˇ ceuˬ te piˇ-oˆ.

28Nawˬ hui hta‸ hkeu laˇ ve chaw teˇ hpaˍ hta‸ bon na‸ piˇ-oˆ. Nawˬ hui hta‸ hkʼa mvuhˇ hkʼa na te laˇ ve chaw teˇ hpaˍ awˬ pon bon lawˬ-o‸.

29Nawˬ ve mehˆ hpfuhˇ diˬ teˇ paˉ hta‸ hta laˇ ve chaw hta‸ teˇ paˉ kʼaw‸ hpfuhˆ hkʼo piˇ sheˍ. Nawˬ ve aˉ po‸ zuhˬ ma hta‸ yuˬ gaˇ ve chaw hta‸ nawˬ ve aˉ po‸ hta‸ htawˇ yuˬ tuˬ taˇ tawˍ taˍ.

30Nawˬ geh hkʼa lawˬ ve chaw teˇ gʼaˇ le le hta‸ piˇ-oˆ. Nawˬ ve mawˇ hta‸ yuˬ ve chaw geh taˇ kʼaw‸ lawˬ hkʼaw‸.

31Shu nawˬ hui hta‸ te laˇ piˇ lawˬ gaˇ ve hkʼe, nawˬ hui shu hta‸ oˇ hkʼe te piˇ-oˆ.

32Nawˬ hui hta‸ ha‸ ve chaw hui hta‸ ceh kʼaw‸ ha‸ ve kʼo, nawˬ hui awˬ pon aˬ hto‸ ma awˬ bon cawˬ le. Venˇbaˆ yaˇ teˇ hpaˍ htawˇ, yawˇ hui hta‸ ha‸ ve chaw hui hta‸ yawˇ hui kʼaw‸ ha‸ ve yoˬ.

33Nawˬ hui hta‸ da‸ ve awˬ ceuˬ te laˇ ve chaw hui hta‸ ceh da‸ ve kʼaw‸ te piˇ ve kʼo, nawˬ hui awˬ pon aˬ hto‸ ma awˬ bon cawˬ le. Venˇbaˆ yaˇ teˇ hpaˍ htawˇ chi hkʼa shuˍ shuˍ te ve yoˬ.

34Nawˬ hui kʼaw‸ gʼa tuˬ yoˬ teh‸ dawˇ law taˍ ve chaw hui hta‸ ceh chiˇ piˇ ngaˍ piˇ ve kʼo, nawˬ hui awˬ pon aˬ hto‸ ma awˬ bon cawˬ le. Venˇbaˆ yaˇ hui htawˇ, yawˇ hui chiˇ piˇ ngaˍ piˇ taˍ ve hkʼe kʼaw‸ gʼa tuˬ, awˬ kaˍ awˬ nu venˇbaˆ yaˇ hui hta‸ chiˇ piˇ ngaˍ piˇ ve yoˬ.

35Nawˬ hui lehˬ, nawˬ hui ve canˇ paˍ teˇ hpaˍ hta‸ ha‸ leh da‸ ve awˬ ceuˬ te piˇ-oˆ. Kʼaw‸ gʼa tuˬ ve hta‸ maˇ dawˇ law ve awˬ hkʼaw lo shu hta‸ chiˇ piˇ ngaˍ piˇ-oˆ. Oˇ hkʼe te ve kʼo, nawˬ ve la‸ shawnˍ uiˍ jaˇ leh, uiˍ jaˇ mvuh jaˇ ve Awˬ shehˍ hpaˇ ve awˬ yaˇ teˇ hpaˍ nawˬ hui hpeh‸ tuˬ yoˬ. Awˬ lawn kʼo, yawˇ lehˬ awˬ bon hta‸ maˇ shiˍ puiˉ ve chaw leh haiˬ ve chaw hui hta‸ awˬ bon te piˇ puiˉ ve yoˬ.

36Nawˬ hui ve Awˬ pa ha kʼaˉ puiˉ ve hkʼa shuˍ shuˍ nawˬ hui htawˇ ha kʼaˉ puiˉ ve chaw hpeh‸ piˇ-oˆ.

37Nawˬ hui shu hta‸ venˇbaˆ taˇ taˍ. Oˇ hkʼe maˇ taˍ ve kʼo, nawˬ hui hta‸ htawˇ shu venˇbaˆ maˇ taˍ. Shu hta‸ suhˉ taˇ taˆ. Oˇ hkʼe maˇ taˆ ve kʼo, nawˬ hui hta‸ htawˇ shu suhˉ maˇ taˆ. Shu ve venˇbaˆ hta‸ hpehˇ piˇ-oˆ. Oˇ hkʼe te ve kʼo, nawˬ hui ve venˇbaˆ hta‸ ka‸ shu hpehˇ laˇ tuˬ yoˬ.

38Shu hta‸ piˇ-oˆ. Oˇ hkʼe piˇ ve kʼo, nawˬ hui hta‸ ka‸ shu kʼaw‸ pe‸ laˇ tuˬ yoˬ. Yawˇ hui pe‸ laˇ ve teˇ yanˇ htaˇ, kawˬ tuˬ uiˍ ve hta‸ kʼaw‸ kawˬ laˇ ve awˬ hkʼoˆ ka‸, biˇ sheˆ htaˇ hkʼa gaˬ nyiˉ keu hiˆ keu leh nawˬ hui ve taˉ poˆ hkʼaw keu laˇ tuˬ yoˬ. Awˬ lawn kʼo, nawˬ hui shu hta‸ kawˬ piˇ ve hkʼe shu nawˬ hui hta‸ kʼaw‸ kawˬ laˇ tuˬ yoˬ teh‸ kʼoˆ ve yoˬ.

39Chi hkʼoˆ ka‸, yawˇ yawˇ hui hta‸ tawˇ pa haˉ kʼoˆ piˇ ve, Mehˆ cuˉ ve chaw lehˬ, mehˆ cuˉ ve chaw hta‸ ya‸ kʼaw maˍ piˇ hpeh‸-aw laˇ. Yawˇ huiˉ maˬ nyiˇ gʼaˇ gʼaˇ miˬ kʼoˍ hkʼaw ce lo‸-e tuˬ maˇ heˆ laˇ.

40Awˬ la‸ gʼawˇ lehˬ, yawˇ ve saˍ la‸ a‸ kehˉ uiˍ ve maˇ heˆ, Hkʼa biˇ biˇ henˇ yuˬ peuˬ ve chaw teˇ gʼaˇ le le lehˬ, a shu yawˇ ve saˍ la‸ hkʼa shuˍ shuˍ hpeh‸ tuˬ yoˬ.

41Nawˬ hui a shu yawˇ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ maˇ dawˇ nyi leh, aˬ hto‸ ma te nawˬ ve awˬ viˉ awˬ nyi ve mehˆ shiˍ hkʼaw lo cawˬ taˍ ve mehˆ puˉ hta‸ nyi chehˇ ve le.

42Nawˬ hui a shu yawˇ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ maˇ mawˬ leh, Awˬ viˉ awˬ nyi-oˬ, nawˬ ve mehˆ shiˍ hkʼaw lo cawˬ taˍ ve mehˆ puˉ hta‸ ngaˬ yuˬ tawˆ laˇ shaˍ teh‸, aˬ hto‸ ma te nawˬ ve awˬ viˉ awˬ nyi hta‸ ca kʼoˆ ve le. Heˍ puiˉ ve chaw hui-oˬ, nawˬ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ awˉ lawˉ yuˬ tawˆ sheˍ. Awˬ hkʼaw‸ nawˉ, nawˬ awˬ viˉ awˬ nyi ve mehˆ shiˍ hkʼaw cawˬ taˍ ve mehˆ puˉ hta‸ hkʼaˬ hkʼe te yuˬ tawˆ tuˬ nawˬ hkʼa deh‸ mawˬ hpeh‸ tuˬ yoˬ.

43Da‸ ve awˬ cehˬ lehˬ, maˇ da‸ ve awˬ shiˍ naw‸ ve teˇ cehˬ ka‸ maˇ cawˬ. Maˇ da‸ ve awˬ cehˬ lehˬ, da‸ ve awˬ shiˍ naw‸ ve teˇ cehˬ ka‸ maˇ cawˬ.

44Awˬ lawn kʼo, awˬ shiˍ hta‸ nyi leh, awˬ cehˬ teˇ cehˬ le le hta‸ gʼa shiˍ ve yoˬ. Aˉ chuˇ cehˬ lo maˉ nawˆ shiˍ maˇ shaˉ jaw. Aˉ chuˇ buiˇ lo a pehˉ meuˇ shiˍ maˇ shaˉ jaw.

45Da‸ ve chaw lehˬ, a shu yawˇ nyi ma hkʼaw da‸ ve awˬ ceuˬ doˆ taˍ kuiˬ lo, da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hkʼaw lo, haiˬ ve awˬ ceuˬ hta‸ yuˬ tawˆ la ve yoˬ. Awˬ lawn kʼo, nyi ma awˬ hkʼaw lo hkʼa biˇ cawˬ ve hkʼe yawˇ ve maw‸ kʼaw yaw tawˆ la ve yoˬ.

46Ngaˬ kʼoˆ taˍ ve hkʼe nawˬ hui maˇ te leh, aˬ hto‸ ma te ngaˬ hta‸ Jawˇmawˇ-oˬ, Jawˇ mawˇ-oˬ teh‸ kʼoˆ ve le.

47Ngaˬ geh laˬ leh ngaˬ ve tawˇ hkawˇ hta‸ kaˇ leh na yuˬ ve chaw teˇ gʼaˇ le le lehˬ, hkʼaˬ hkʼe ve chaw teˇ gʼaˇ hta‸ shuˍ ve ngaˬ nawˬ hui hta‸ maˍ laˇ shaˍ.

48Yehˬ kawˍ ve teˇ yanˇ, naˉ chaweh duˇ leh, haˉ pui awˬ hkʼoˆ awˬ hkuiˉ puiˍ teh taˍ ve chaw teˇ gʼaˇ hta‸ yawˇ shuˍ ve yoˬ. Iˉ kaˆ uiˍ taˆ la leh, iˉ kaˆ gʼuiˬ dawˇ yehˬ oˇ ve hta‸ htinˍ ve htawˇ, yeˬ chaweh kawˍ taˍ ve pa taw, hiˆ hiˆ naˇ naˇ maˇ te.

49Ya‸ hkʼaˇ, tawˇ hkawˇ hta‸ gʼa kaˇ leh maˇ na yuˬ ve chaw lehˬ, awˬ hkuiˉ puiˍ maˇ kawˍ leh miˬ chaˇ hkʼoˆ ceh yehˬ kawˍ ve chaw teˇ gʼaˇ hta‸ shuˍ ve yoˬ. Iˉ kaˆ gʼuiˬ dawˇ yehˬ oˇ ve hta‸ htinˍ ve teˇ yanˇ, teˇ cawˬ haˉ paiˍ leh, yehˬ oˇ ve luˬ kʼai ve lehˬ jaˇ ve yoˬ teh‸ maˍ piˇ ve yoˬ.