Nahum 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Chi ve lehˬ, Niˇnaˍveˍ venˇ hta‸ caˉ da‸ leh Eˇlaˍkawˆshaˆ venˇ yaˇ Naˍhunˍ awˬ ha awˬ hkʼaw lo gʼa mawˬ ve awˬ lawn teˇ hpaˍ hpeh‸ ve yoˬ.

2Gʼuiˬsha lehˬ yawˇ hta‸ kʼaw‸ hpfuhˆ ve chaw hui hta‸ hkʼe leˇ ponˬ piˇ tuˬ ve maˇ heˆ. Yawˇ hta‸ tawˍ taˍ ve chaw hta‸ Yawˇ ciˍ yanˍ piˇ leh, nyi ma zuhˆ ve awˬ hkʼaw lo yawˇ hui hta‸ kʼaw‸ te hkʼaw‸ piˇ ve yoˬ.

3Gʼuiˬsha lehˬ, nyi ma haˆ haˆ maˇ zuhˆ puiˉ. Ya‸ hkʼaˇ, Yawˇ lehˬ kanˇ paˆ uiˍ jaˇ leh, venˇbaˆ cawˬ ve chaw hta‸ hkʼe leˇ ponˬ piˇ tuˬ ve maˇ heˆ. Gʼuiˬsha hkʼa kʼai kuiˬ lo mvuhˇ haw mvuhˇ yeˬ lonˉ laˬ leh, moˬ teˇ hpaˍ lehˬ yawˇ ve hkui sheh hawˉ lo ve je‸ meu-e hpeh‸ ve yoˬ.

4Yawˇ laˇ tsuhˇ gʼuiˬ hta‸ tawˇ piˇ leh, laˇ tsuhˇ gʼuiˬ oˇ ve fiˍ kʼai ve yoˬ. Yawˇ lehˬ, iˉ kaˆ lawˬ teˇ hpaˍ hta‸ htawˇ fiˍ kʼai piˇ lawˬ ve yoˬ. Baˍshanˍ mvuhˇmiˬ hkʼaw cawˬ ve ti mi teˇ hpaˍ goˇ kʼai leh, Kaˍmeˍ laˆ hkʼaw htawˇ shiˉ-ehˍ hpeh‸ la ve yoˬ. Leˍbaˍnonˍ hkʼaw hkʼoˆ lo cawˬ ve suhˉ veˆ teˇ hpaˍ htawˇ ho-eˍ kʼai ve yoˬ.

5Hkʼaw pui teˇ hpaˍ Gʼuiˬsha mehˆ gʼuˇ suhˍ hiˆ hiˆ naˇ naˇ hpeh‸ la leh hkʼaw pui ehˉ teˇ hpaˍ yawˇ mehˆ gʼuˇ suhˍ lo kuiˬ kʼai ve yoˬ. Gʼuiˬsha tawˆ la ve teˇ yanˇ miˬ hiˆ jaˇ leh, miˬguiˬ chaw yaˇ hkʼa peu-eˬ kawˆ cheˇ jaˇ ve yoˬ.

6Yawˇ nyi ma zuhˆ la ve teˇ yanˇ, a shu teˇ gʼaˇ te‸ chehˇ hpeh‸ tuˬ ve le. Yawˇ nyi ma zuhˆ ve teˇ ceuˬ hta‸ ngeuˍ baˬ ve teˇ yanˇ, haˉ hpawˇ teˇ hpaˍ yawˇ mehˆ gʼuˇ suhˍ lo je‸ meu-e hkʼa shuˍ hpeh‸ la ve yoˬ.

7Gʼuiˬsha lehˬ da‸ jaˇ tehˬ ve yoˬ. Dawˇ haˍ kuiˬ awˬ hkʼaw lo yawˇ ve chaw teˇ hpaˍ hta‸ yawˇ ponˬ piˇ leh, yawˇ geh kʼaw‸ hpfuhˆ kʼaw‸ la ve chaw hui hta‸ yawˇ ha‸ shaˉ piˇ ve yoˬ.

8Gʼuiˬ uiˍ haˉ uiˍ la ve hkʼa shuˍ, Gʼuiˬsha lehˬ yawˇ ve canˇ paˍ teˇ hpaˍ hta‸ te luˬ te sheˆ piˇ ve yoˬ. Yawˇ hta‸ tawˍ taˍ ve chaw hui hta‸ Yawˇ suh-e piˇ lawˬ ve yoˬ.

9Aˬ hto‸ ma pa taw nawˬ Gʼuiˬsha hta‸ kʼaw‸ hpfuhˆ tuˬ dawˇ nyi chehˇ ve le. Yawˇ nawˬ hta‸ te luˬ te sheˆ laˇ tuˬ yoˬ. Chaw teˇ gʼaˇ ka‸ Yawˇ hta‸ nyiˇ pawˆ tawˍ taˍ maˇ gʼa.

10Aˉ chuˇ buiˇ leh goˇ kʼai peuˬ ve mvuh‸ hkʼa shuˍ, nawˬ lehˬ tuˉ baˬ ve hta‸ gʼa hkanˍ tuˬ yoˬ.

11Niˇnaˍveˍ venˇ-oˬ, nawˬ geh lo Gʼuiˬsha hta‸ kʼaw‸ hpfuhˆ leh haiˬ ve dawˇ hkʼaˇ hkʼa biˇ cawˬ ve chaw teˇ gʼaˇ chehˇ taˍ ve yoˬ.

12Gʼuiˬsha lehˬ yawˇ ve Iˉsaˍreˍlaˆ chaw teˇ hpaˍ hta‸ chi hkʼe kʼoˆ piˇ taˍ ve yoˬ. Aˍsuˇriˆ chaw teˇ hpaˍ maˇ jaˇ leh awˬ gʼaˇ uiˍ jaˇ ve htawˇ, yawˇ hui luˬ kʼai sheˆ kʼai leh mehˉ kʼai tuˬ yoˬ. Ngaˬ ve chaw teˇ hpaˍ-oˬ, ngaˬ nawˬ hui hta‸ tu‸ hkanˍ piˇ lawˬ ve htawˇ, awˬ hkʼaw‸ nawˉ teˇ pawˆ ka‸ nawˬ hui hta‸ oˇ hkʼe kʼaw‸ te laˇ tuˬ ve maˇ heˆ.

13Chi beu‸ ngaˬ nawˬ hui hta‸ Aˍsuˇriˆ chaw hui ve kanˇ paˆ awˬ hawˉ lo ponˬ laˇ leh, yawˇ hui hpeh taˍ ve aˉ caˆ hkeh hta‸ hpui baˬ laˇ tuˬ yoˬ.

14Aˍsuˇriˆ chaw hta‸ caˉ da‸ leh Gʼuiˬsha chi hkʼe kʼoˆ ve yoˬ. Yawˇ hui mehˉ kʼai tuˬ yoˬ. Ngaˬ lehˬ yawˇ hui ve bon yehˬ hkʼaw teh taˍ ve shaˉ ho‸ teˇ hpaˍ hta‸ te luˬ te sheˆ piˇ tuˬ yoˬ. Yawˇ hui lehˬ te‸ chehˇ maˇ keunˍ ve chaw teˇ hpaˍ hpeh‸ ve pa taw, yawˇ hui awˬ pon ngaˬ tuˍ hpfuh duˇ taˍ peuˬ.

15Nyi loˬ. Hkʼaw hkʼoˆ lo ha lehˬ ve tawˇ hkawˇ ca hto la ve chaw laˬ chehˇ taˍ peuˬ. Yuˇda‸ chaw teˇ hpaˍ-oˬ, ha lehˬ ha kʼa pawehˇ te leh, nawˬ hui Gʼuiˬsha hta‸ piˇ tuˬ ka ti‸ te taˍ ve awˬ ceuˬ teˇ hpaˍ yawˇ hta‸ tanˇ piˇ-oˆ. Haiˬ ve chaw teˇ hpaˍ lehˬ, nawˬ hui ve mvuhˇmiˬ hta‸ teˇ pawˆ ka‸ ca kʼaw‸ bawˆ la tuˬ ve maˇ heˆ. Yawˇ hui hkʼa peu-eˬ luˬ kʼai sheˆ kʼai peuˬ.

Jump to: Chapter 2 →