Zechariah 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Jawˇmawˇ Gʼuiˬsha kʼaw‸ kʼoˆ ve, Awˬ yanˇ oˇ ve gaˬ la htaˇ, Daˍviˆ ve awˬ ceuˬ awˬ hkʼaˇ leh Yeˍruˆsaˍlehnˍ venˇ yaˇ teˇ hpaˍ ve venˇbaˆ hta‸ tsuhˇ baˬ tuˬ, iˉ kaˆ gʼuiˬ tuˇ teˇ maˬ tawˆ la tuˬ yoˬ.

2Oˇ htaˇ ngaˬ lehˬ mvuhˇmiˬ hkʼaw cawˬ ve shaˉ ho‸ teˇ hpaˍ ve awˬ meh hta‸ yuˬ baˬ leh, chaw teˇ gʼaˇ ka‸ awˬ meh oˇ ve teˇ hpaˍ hta‸ kʼaw‸ dawˇ nawˇ tuˬ ve maˇ heˆ. Maˇ hteˇ maˇ cawˇ ve tcuh kaˍ paˍ teˇ hpaˍ hta‸ htawˇ ngaˬ yuˬ baˬ leh, shaˉ ho‸ hta‸ oˉ kʼoˍ pui gaˇ ve nyi ma hta‸ htawˇ yuˬ baˬ piˇ tuˬ yoˬ.

3Ngaˬ oˇ hkʼe te piˇ taˍ ve ka‸, chaw teˇ gʼaˇ gʼaˇ tcuh kaˍ paˍ hkʼa shuˍ te gaˇ ve chaw cawˬ sheˍ ve kʼo, yawˇ ve awˬ pa awˬ e lehˬ, Nawˬ gʼa suh tuˬyoˬ, teh‸ yawˇ hta‸ gʼa kʼoˆ piˇ tuˬ yoˬ. Awˬ lawn kʼo, yawˇ lehˬ Gʼuiˬsha ve tawˇ hta‸ yaw chehˇ ve yoˬ teh‸ kʼoˆ ve htawˇ, heˍ ve tawˇ ceh tiˉ yaw ve pa taw yoˬ. Yawˇ ve awˬ pa awˬ e lehˬ, chaw oˇ ve hta‸ gʼa juˆ pehˍ piˇ ve yoˬ.

4Awˬ yanˇ oˇ ve gaˬ la htaˇ, tcuh kaˍ paˍ hkʼaˬve teˇ gʼaˇ maˇ kʼoˆ, yawˇ gʼa mawˬ ve awˬ ha hta‸ pa taw caˆ muiˬ ve nyi ma cawˬ tuˬ ve maˇ heˆ. Tcuh kaˍ paˍ ve veu‸ kʼaˇ hta‸ veu‸ deh leh, tcuh kaˍ paˍ hkʼa shuˍ te tuˬ ve maˇ heˆ.

5Ya‸ hkʼaˇ, yawˇ lehˬ Ngaˬ tcuh kaˍ paˍ maˇ heˆ. Ngaˬ lehˬ muiˬ caˇ paˍ hpeh‸ leh, ngaˬ teˇ co-e muiˬ caˇ ve kanˉ hta‸ tiˉ te laˬ ve yoˬ, teh‸ kʼoˆ tuˬ yoˬ.

6Oˇ htaˇ chaw teˇ gʼaˇ lehˬ Hkʼe te kʼo, nawˬ ve nyi ma pui hkʼoˆ lo cawˬ ve awˬ kuiˉ awˬ haiˇ oˇ ve aˬ hto‸ ma le, teh‸ yawˇ hta‸ na nyi piˇ ve kʼo, Awˬ kuiˉ awˬ haiˇ chi hta‸ ngaˬ shu ve yehˬ hkʼaw gʼa taˍ ve yoˬ, teh‸ kʼaw‸ yaw hkʼaw‸ piˇ tuˬ yoˬ, teh‸ Gʼuiˬsha kʼoˆ ve yoˬ.

7Kanˇ paˆ uiˍ ve Gʼuiˬsha kʼoˆ ve, Aˉhtaw-oˬ, tu la leh ngaˬ ve kanˉ hta‸ te chehˇ ve yawˬ hawˉ paˍ hta‸ ca tiˇ pehˍ piˇ-oˆ. Oˇ hkʼe te ve kʼo, yawˬ ehˉ teˇ hpaˍ hpaˆ da‸ guiˇ da‸ kʼai tuˬ yoˬ. Ngaˬ ve chaw teˇ hpaˍ hta‸ ngaˬ te luˬ leh,

8mvuhˇmiˬ hkʼaw ngaˬ ve chaw shehˆ pun nyiˇ pun suh-e tuˬ yoˬ.

9Hpu lehˬ aˬ miˍ hta‸ pa taw da‸ kehˬ la ve hkʼe, cawˬ taˍ sheˍ ve chaw shehˆ pun teˇ pun ve hta‸ ngaˬ lawˇ nyi tuˬ yoˬ. Shi hta‸ lawˇ nyi ve hkʼe ngaˬ yawˇ hui hta‸ lawˇ nyi tuˬ yoˬ. Oˇ htaˇ yawˇ hui ngaˬ geh bon lawˬ leh, ngaˬ lehˬ yawˇ hui ve bon lawˬ hkawˇ hta‸ na yuˬ piˇ tuˬ yoˬ. Yawˇ hui lehˬ ngaˬ ve chaw hpeh‸ ve awˬ lawn, ngaˬ yawˇ hui hta‸ hto piˇ leh, ngaˬ lehˬ yawˇ hui ve Gʼuiˬsha hpeh‸ ve hta‸ shiˍ la tuˬ yoˬ, teh‸ Gʼuiˬsha kʼoˆ ve yoˬ.

← Chapter 12 Jump to: Chapter 14 →